മൂവാറ്റുപുഴ : ചോദ്യ കടലാസില് ഇസ്ലാം മതത്തെ അവഹേളിക്കുന്ന രീതിയിലുള്ള ചോദ്യം തയ്യാറാക്കി എന്ന കാരണത്താല് സസ്പെന്ഷനില് ആയ അധ്യാപകന്റെ കൈപ്പത്തി ഒരു സംഘം ആളുകള് വെട്ടി മാറ്റി. തൊടുപുഴ ന്യൂമാന് കോളജിലെ അദ്ധ്യാപകന് പ്രൊഫ. ടി. ജെ. ജോസഫിനാണ് ഇന്ന് രാവിലെ പള്ളിയില് പോയി മടങ്ങുന്ന വഴിയില് ആക്രമണം ഏറ്റത്. ജോസഫും കുടുംബവും സഞ്ചരിച്ച കാര് നിര്ത്തിയ ശേഷം എല്ലാവരെയും പുറത്തിറക്കി മര്ദ്ദിച്ച ശേഷമാണ് ആക്രമികള് ജോസഫിന്റെ കൈപ്പത്തി വെട്ടി മാറ്റിയത്.
കഴിഞ്ഞ മാര്ച്ചില് ജോസഫ് തയ്യാറാക്കിയ ബി. കോം. മലയാളം പരീക്ഷയുടെ ചോദ്യ കടലാസിലാണ് വിവാദമായ ചോദ്യം ഉണ്ടായിരുന്നത്. വിവാദ ചോദ്യ കടലാസിനെ കുറിച്ച് അന്വേഷണം നടത്തിയ മഹാത്മാ ഗാന്ധി സര്വകലാശാല ജോസഫിന്റെയും കോളേജ് പ്രധാനാധ്യാപകന്റെയും അംഗീകാരം ഒരു വര്ഷത്തേയ്ക്ക് റദ്ദ് ചെയ്തു.
വിവാദത്തെ തുടര്ന്ന് ഒട്ടേറെ സംഘടനകളും വ്യക്തികളും സംഭവത്തിനെതിരെ രംഗത്തെത്തുകയും കോളേജില് സംഘര്ഷാവസ്ഥ സൃഷ്ടിക്കുകയും ചെയ്തിരുന്നു.
ചോദ്യത്തിന് ആസ്പദമായ ഭാഗം ഒട്ടേറെ പ്രഗല്ഭരുടെ തിരക്കഥാ നുഭവങ്ങള് അടങ്ങിയ “തിരക്കഥയുടെ രീതിശാസ്ത്രം” എന്ന പുസ്തകത്തില് നിന്നും എടുത്തതാണ്. ഈ പുസ്തകത്തില് എം. ടി. വാസുദേവന് നായര്, വിജയ കൃഷ്ണന്, സത്യന് അന്തിക്കാട്, അടൂര് ഗോപാലകൃഷ്ണന് എന്നിങ്ങനെ ഒട്ടേറെ പേരുടെ അനുഭവങ്ങളും കുറിപ്പുകളുമുണ്ട്. ഇതില് ഇടതു പക്ഷ സഹയാത്രികനായ പി. ടി. കുഞ്ഞു മുഹമ്മദിന്റെതായി വന്ന ഭാഗത്ത് നിന്നും എടുത്തതാണ് വിവാദമായ 11ആമത്തെ ചോദ്യത്തിലെ വരികള്. സംഭാഷണത്തിന് ഉചിതമായ ചിഹ്നം കൊടുക്കുവാനാണ് ചോദ്യം.
മാവേലിക്കര : കോളിളക്കം സൃഷ്ടിച്ച ചെറിയനാട് തുരുത്തി മേല് ഭാസ്കര കാരണവര് വധ ക്കേസില്, കാരണവരുടെ പുത്ര ഭാര്യ ഷെറിന് ഉള്പ്പെടെ നാലു പ്രതികളും കുറ്റക്കാരാണെന്നു മാവേലിക്കര അഡീഷണല് സെഷന്സ് അതിവേഗ കോടതി കണ്ടെത്തി. ശിക്ഷ നാളെ ( ജൂണ് 11 ) വിധിക്കും. 
കോഴിക്കോട് : പ്രമുഖ പരിസ്ഥിതി പ്രവര്ത്തകനായ സി. ആര്. നീലകണ്ഠനെ ഒരു സംഘം ഡി.വൈ.എഫ്.ഐ. പ്രവര്ത്തകര് മര്ദ്ദിച്ചു പരിക്കേല്പ്പിച്ചു. പേരാമ്പ്ര പാലേരിയില് “മാവോയിസ്റ്റുകള് ഉണ്ടാകുന്നത്” എന്ന വിഷയത്തില് പ്രതി ചിന്ത എന്ന സംഘടന സംഘടിപ്പിച്ച സംവാദത്തില് മുഖ്യ പ്രഭാഷണം നടത്താന് എത്തിയതായിരുന്നു അദ്ദേഹം. പ്രസംഗിക്കാന് മൈക്കിനു മുന്പില് എത്തി ആദ്യ വാചകം പറഞ്ഞു തുടങ്ങിയ ഉടനെ ഒരു സംഘം ആളുകള് വടികളും കസേരകളുമായി സ്റ്റേജിനു മുകളില് കയറി നീലകണ്ഠനെ ആക്രമിച്ചു. അടിയേറ്റ് താഴെ വീണ അദ്ദേഹത്തെ ചുറ്റും വളഞ്ഞു നിന്ന് ചവിട്ടിയും അടിച്ചും മര്ദ്ദനം തുടര്ന്നു. കൈ കാലുകള്ക്കും, വയറിനും, നെഞ്ചത്തും, ദേഹം ആസകലവും പരിക്കേറ്റ അദ്ദേഹത്തെ ഏറെ നേരത്തേക്ക് ആശുപത്രിയില് എത്തിക്കാനും ഇവര് സമ്മതിച്ചില്ല.
പാലക്കാട് : പുത്തൂര് ഷീല വധ കേസില് പോലീസ് പിടിയിലായ സമ്പത്ത് പോലീസ് കസ്റ്റഡിയില് വെച്ച് കൊല്ലപ്പെട്ട കേസില് 12 പോലീസുകാരെ പ്രതികളാക്കി ക്രൈം ബ്രാഞ്ച് കുറ്റപത്രം സമര്പ്പിച്ചു. രണ്ട് സബ് ഇന്സ്പെക്റ്റര്മാരും, ഒരു അസിസ്റ്റന്റ് സബ് ഇന്സ്പെക്റ്ററും ഇതില് ഉള്പ്പെടുന്നു.
