ടെഹ്റാന് : ഇറാന്റെ സമ്പദ് വ്യവസ്ഥയെ ഒറ്റപ്പെടുത്തി തങ്ങളുടെ മേല് സമ്മര്ദ്ദം ചെലുത്താനുള്ള പാശ്ചാത്യ ലോകത്തിന്റെ തന്ത്രം വിലപ്പോവില്ല എന്ന് ഇറാന് വ്യക്തമാക്കി. ഇന്നലെ പാശ്ചാത്യ രാജ്യങ്ങള് ഇറാന് എതിരെ പ്രഖ്യാപിച്ച പുതിയ സാമ്പത്തിക ഉപരോധങ്ങളെ കുറിച്ച് പ്രതികരിക്കുകയായിരുന്നു ഇറാന്. അമേരിക്ക, ബ്രിട്ടന്, കാനഡ എന്നീ രാജ്യങ്ങള് ഇന്നലെ ഇറാനെതിരെ പുതിയ സാമ്പത്തിക ഉപരോധങ്ങളും ഫ്രാന്സ് “ചില പുതിയ” ഉപരോധങ്ങളുമാണ് പ്രഖ്യാപിച്ചത്. ഇറാന്റെ സെന്ട്രല് ബാങ്ക് സ്വത്തുക്കള് മരവിപ്പിക്കുകയും എണ്ണ വില്പ്പന നിര്ത്തി വെയ്ക്കുകയും അടങ്ങുന്ന നടപടികളാണ് പുതിയ ഉപരോധത്തില് ഉള്പ്പെടുക.
ആണവ പദ്ധതികള് നിര്ത്തി വെയ്ക്കണം എന്നാണ് ഉപരോധം ഏര്പ്പെടുത്തുന്നവരുടെ ആവശ്യം.
ഇത്തരം നടപടികള്ക്ക് മറ്റു രാജ്യങ്ങളുമായുള്ള ഇറാന്റെ സാമ്പത്തിക ബന്ധങ്ങളെയും വ്യാപാരത്തെയും ഒരു തരത്തിലും സ്വാധീനിക്കാന് കഴിയില്ല എന്നാണ് ഇതേ സംബന്ധിച്ച് ഇറാന് പറയുന്നത്.
ന്യൂയോര്ക്ക് : ഇറാനെതിരെ ഐക്യ രാഷ്ട്ര സഭയുടെ സുരക്ഷാ സമിതി പുതിയ ഉപരോധങ്ങള് ഏര്പ്പെടുത്തി. ഇറാന്റെ ആണവ പരിപാടികള്ക്ക് തടയിടാന് ഉദ്ദേശിച്ചുള്ളതാണ് ഇത് എന്നാണു സുരക്ഷാ സമിതി പറയുന്നത്. എന്നാല് ഇത്തരം സാമ്പത്തിക ഉപരോധങ്ങള് കൊണ്ട് ഇറാന്റെ ആണവ പദ്ധതികളുടെ വികസനത്തെ തടയാന് ആവില്ല എന്നാണു വിദഗ്ദ്ധരുടെ അഭിപ്രായം. എന്നാല് സാധാരണ ജനത്തിന്റെ ജീവിതം ഇത്തരം ഉപരോധങ്ങള് കൊണ്ട് നരക തുല്യമാവുകയും ചെയ്യും. കൂടുതല് കനത്ത നിയന്ത്രണങ്ങള് ഉപരോധ പ്രമേയത്തില് ഉണ്ടായിരുന്നെങ്കിലും ചൈനയുടെയും റഷ്യയുടെയും എതിര്പ്പ് മൂലം ഇവ ഒഴിവാക്കുകയായിരുന്നു. ബ്രസീലും തുര്ക്കിയും ഉപരോധത്തെ എതിര്ത്തപ്പോള് ലെബനോന് വോട്ടെടുപ്പില് നിന്നും വിട്ടുനിന്നു.
ന്യൂയോര്ക്ക് : ആണവ നിര്വ്യാപന ഉടമ്പടിയില് ഒപ്പ് വെയ്ക്കാന് ഇന്ത്യയ്ക്കു മേല് ഐക്യരാഷ്ട്ര സഭ സമ്മര്ദ്ദം ചെലുത്തുന്നു. കീഴ് വഴക്കങ്ങള്ക്കു വിരുദ്ധമായി ഇതാദ്യമായാണ് ഒരു രാജ്യത്തെ പേരെടുത്തു പറഞ്ഞു കൊണ്ട് ഐക്യ രാഷ്ട്ര സഭ ഇത്തരമൊരു ആവശ്യം ഉന്നയിക്കുന്നത്. ഇന്ത്യയ്ക്കു പുറമേ പാക്കിസ്ഥാനോടും ഇസ്രയേലിനോടും ഐക്യ രാഷ്ട്ര സഭ ഇനിയും വൈകിക്കാതെയും, മറ്റ് ഉപാധികളൊന്നും മുന്പോട്ടു വെയ്ക്കാതെയും ആണവ നിര്വ്യാപന ഉടമ്പടിയിലും (Non- Proliferation Treaty – NPT) സമഗ്ര പരീക്ഷണ നിരോധന ഉടമ്പടിയിലും (Comprehensive Test Ban Treaty – CTBT) ഒപ്പ് വെയ്ക്കാന് ആവശ്യപ്പെട്ടിട്ടുണ്ട്.
