വിദ്യാബാലന് നായികയായി അഭിനയിച്ച ബോളിവുഡ് ചിത്രം ഡെര്‍ട്ടി പിക്ചര്‍ വീണ്ടും വാര്‍ത്തകളില്‍ ഇടം പിടിക്കുന്നു. ചിത്രം പകല്‍ സമയത്ത് സം‌പ്രേക്ഷണം ചെയ്യരുതെന്ന് വാര്‍ത്താവിതരണ മന്ത്രാലയം ആവശ്യപ്പെട്ടു. സോണി ടി. വിയാണ് ഞായറാഴ്ച ഉച്ചക്ക് 12 മണിക്കും രാത്രി 8 മണിക്കും ചിത്രം സം‌പ്രേക്ഷണം ചെയ്യുമെന്ന് പറഞ്ഞിരുന്നത്. ഇതിന്റെ പേരില്‍ ധാരാളം പരസ്യവും അടുത്ത ദിവസങ്ങളില്‍ സോണി ടി. വി.യില്‍ വന്നിരുന്നു. ചിത്രത്തിന്റെ സം‌പ്രേക്ഷണാവകാശം എട്ടുകോടിക്കാണ് നിര്‍മ്മാതാവായ ഏക്‍ദ കപൂറില്‍ നിന്നും വാങ്ങിയത്.
ചൂടന്‍ രംഗങ്ങളുടെ അതിപ്രസരം ഉണ്ടെന്നതിന്റെ പേരില്‍ ഏറെ വിവാദങ്ങള്‍ ഉണ്ടാക്കിയ ചിത്രമാണ് ഇത്. മിലാന്‍ ലുധീരിയ ഒരുക്കിയ ചിത്രം വന്‍ ഹിറ്റായിരുന്നു. തെന്നിന്ത്യന്‍ മാദക റാണിയായിരുന്ന സില്‍ക്ക് സ്മിതയുടെ ജീവിത്തോട് സാദൃശ്യം ഉണ്ടെന്ന് പറയപ്പെടുന്ന ചിത്രത്തിലെ അഭിനയത്തിന് വിദ്യാബാലന് മികച്ച നടിക്കുള്ള ദേശീയ പുരസ്കാരം ലഭിച്ചിരുന്നു.
- എസ്. കുമാര്‍
അനുബന്ധ വാര്‍ത്തകള്‍
വായിക്കുക: actress, controversy, television
