പ്രതിസന്ധിയില് ആയ എയര് ഇന്ത്യയെ സഹായിക്കാനായി സര്ക്കാര് ഉടന് തന്നെ 1200 കോടിയുടെ ഒരു ധന സഹായ പാക്കേജ് പ്രഖ്യാപിക്കും എന്ന് സിവില് വ്യോമയാന വകുപ്പ് മന്ത്രി പ്രഫുല് പട്ടേല് അറിയിച്ചു. 1000 കോടിയുടെ വായ്പ കമ്പനി ഇതിനോടകം ആവശ്യപ്പെട്ടു കഴിഞ്ഞു. ഇത് മന്ത്രാലയം അംഗീകരിച്ചിട്ടുമുണ്ട്. ഒരു മാസത്തിനകം ഇത് സംബന്ധിച്ച് തീരുമാനം ഉണ്ടാകും എന്നാണ് സൂചന. 40,000 കോടി രൂപക്ക് പുതിയ വിമാനങ്ങള് വാങ്ങുവാനുള്ള ഓര്ഡര് നല്കി കഴിഞ്ഞ എയര് ഇന്ത്യ ഇന്ധന വില വര്ധനവും യാത്രക്കാരുടെ എണ്ണത്തില് വന്ന കുറവും കാരണം കടുത്ത സാമ്പത്തിക പ്രതിസന്ധി നേരിടുകയാണ്. എഴുപത്തി ഏഴ് വര്ഷം പഴക്കമുള്ള കമ്പനി കഴിഞ്ഞ വര്ഷം ഇന്ത്യന് എയര്ലൈന്സും ആയി ലയിച്ചിരുന്നു. വര്ധിച്ച ഇന്ധന വില മൂലം പ്രതിസന്ധി നേരിടുന്ന കമ്പനിക്ക് ആഗോള സാമ്പത്തിക മാന്ദ്യത്തെ തുടര്ന്ന് ഈ വര്ഷം ഉദ്ദേശം 2300 കോടിയെങ്കിലും നഷ്ടം സഹിക്കേണ്ടി വരും എന്നാണ് കരുതപ്പെടുന്നത്.
 |
 |
 |
 |
 |
 |
 |
 |
 |
 |
 |
 |
 |
 |
മാലേഗാവ് സ്ഫോടനവുമായി ബന്ധപ്പെട്ട് ഹിന്ദു സന്യാസിനിയെ പോലീസ് അറസ്റ്റ് ചെയ്തപ്പോള് സന്യാസിനിക്ക് അനുകൂലമായ നിലപാടുമായി ബി. ജെ. പി. രംഗത്ത് വന്നത് ഹിന്ദു വികാരങ്ങളെ മുതലെടുക്കാന് മാത്രമാണെന്ന് അഖില ഭാരത ഹിന്ദു മഹാ സഭ അഭിപ്രായപ്പെട്ടു. തീവ്ര വാദം ആരു നടത്തിയാലും അത് തങ്ങള്ക്ക് അനുകൂലിക്കാനാവില്ല. ബോംബ് സ്ഫോടനത്തിന് ഉത്തരവാദികള് ആയവരെ പിന്താങ്ങുന്ന ബി. ജെ. പി. യുടെ നിലപാടിനു പുറകില് രാഷ്ട്രീയ ലക്ഷ്യങ്ങള് മാത്രമാണ്. നേരത്തേ ബി.ജെ.പി. രാമ ജന്മ ഭൂമി പ്രശ്നത്തിലും ഇത്തരം ഒരു മുതലെടുപ്പാണ് നടത്തിയത്. തങ്ങളെ നിരന്തരം ഇത്തരത്തില് വഞ്ചിച്ചു കൊണ്ടിരിക്കുന്ന ബി. ജെ. പി. യേയും സംഘ പരിവാറിനേയും കൊണ്ട് ഇന്ത്യയിലെ ഹിന്ദുക്കള് വലഞ്ഞിരിക്കുകയാണ്. മാലേഗാവ് സ്ഫോടന കേസിലെ പ്രതികള്ക്ക് നിയമ സഹായം ലഭ്യം ആക്കുന്നതിന് വേണ്ടി പണ പിരിവും ഇപ്പോള് ഇവര് തുടങ്ങിയിരിക്കുന്നു. ബി.ജെ.പി., വിശ്വ ഹിന്ദു പരിഷദ്, ബജ്റംഗ് ദള്, ആര്.എസ്.എസ്., അബിനവ ഭാരത് എന്നീ സംഘടനകള് ഹിന്ദുക്കള്ക്കും ഹിന്ദുത്വത്തിനു വേണ്ടി ഇന്നു വരെ ഒരു നല്ല കാര്യവും ചെയ്തിട്ടില്ല. നേരെ മറിച്ച് ഇവര് ഹിന്ദുക്കളേയും മുസ്ലിങ്ങളേയും തമ്മില് അടിപ്പിച്ച് എല്. കെ. അദ്വാനിയെ പ്രധാന മന്ത്രി ആക്കാനുള്ള കളം ഒരുക്കുകയാണ് ചെയ്യുന്നത് എന്നും അഖില ഭാരത ഹിന്ദു മഹാ സഭ ദേശീയ അധ്യക്ഷന് ചന്ദ്ര പ്രസാദ് കൌശിക് ആരോപിച്ചു.
ആര്. എസ്. എസിന്റെ നേതൃത്വത്തില് നടത്തുന്ന വിദ്യാലയങ്ങളില് പഠിപ്പിക്കുന്ന പാഠ പുസ്തകങ്ങളില് ചരിത്രം വളച്ചൊടിക്കുകയും പുനഃസൃഷ്ടിക്കുകയും ചെയ്യുന്നു എന്ന് കേന്ദ്ര മന്ത്രി റാം വിലാസ് പസ്വാന് ആരോപിച്ചു. മാനവ വിഭവ ശേഷി മന്ത്രി അര്ജുന് സിംഗിന് എഴുതിയ കത്തിലാണ് പസ്വാന് ഈ ആരോപണം ഉന്നയിച്ചത്. സര്ക്കാര് വിദ്യാലയങ്ങള്ക്ക് പുറമെയുള്ള വിദ്യാലയങ്ങളില് പഠിപ്പിക്കുന്ന പാഠ പുസ്തകങ്ങള് പരിശോധിക്കുവാനും അവക്ക് അംഗീകാരം നല്കുന്നതിനും നിയന്ത്രിക്കുന്നതിനുമായി സംവിധാനം ഏര്പ്പെടുത്തണം എന്നും കത്തില് ആവശ്യപ്പെട്ടിട്ടുണ്ട്. 
സോമാലിയന് കടല് കൊള്ളക്കാരുടെ ഒരു കപ്പല് കഴിഞ്ഞ ദിവസം നടന്ന രൂക്ഷമായ യുദ്ധത്തിലൂടെ ഇന്ത്യ തകര്ത്ത നടപടിക്ക് ഐക്യ രാഷ്ട്ര സഭ ജെനറല് സെക്രട്ടറി ബെന് കി മൂണ് ശക്തമായ പിന്തുണ പ്രഖ്യാപിച്ചു. തങ്ങള് സോമാലിയന് സര്ക്കാരും, അന്താരാഷ്ട്ര നാവിക സംഘടനയും, നാറ്റോ, യൂറോപ്യന് യൂണിയന് എന്നിവരുമായി ചേര്ന്ന് പ്രവര്ത്തിച്ച് ഈ പ്രശ്നത്തിന് ഒരു അറുതി വരുത്താനുള്ള തീവ്ര ശ്രമത്തിലാണ്. അന്താരാഷ്ട്ര സമൂഹത്തിന്റെ കൂട്ടായ പരിശ്രമം ഇതിന് ആവശ്യമാണ്. ഇന്ത്യന് നാവിക സേനയുടെ പരിശ്രമങ്ങള് മറ്റുള്ള രാജ്യങ്ങള്ക്ക് മാതൃകയാവും. കൂടുതല് സൈന്യങ്ങള് ഈ ഉദ്യമത്തില് പങ്കു ചേരുന്നത് ഈ പ്രശ്നം എന്നെന്നേക്കുമായി പരിഹരിക്കുവാന് സഹായിക്കും എന്നും അദ്ദേഹം പ്രത്യാശ പ്രകടിപ്പിച്ചു.
രൂക്ഷമായ കടല് യുദ്ധത്തിന് ശേഷം ഇന്ത്യന് നാവിക സേനയുടെ ഐ. എന്. എസ്. തബാര് എന്ന യുദ്ധ കപ്പല് സോമാലിയന് കടല് കൊള്ളക്കാരുടെ ഒരു മാതൃയാനം മുക്കി. കഴിഞ്ഞ ആഴ്ച്ച രണ്ട് ചരക്ക് കപ്പലുകള് ഇന്ത്യന് നാവിക സേന ഇതേ കടല് കൊള്ളക്കാരുടെ ആക്രമണത്തില് നിന്നും രക്ഷപ്പെടുത്തിയിരുന്നു. ഒമാനിലെ സലാലയില് നിന്ന് 285 നോട്ടിക്കല് മൈല് അകലെ ഇന്നലെ വൈകീട്ടാണ് നാവിക സേനയുടെ കപ്പല് കൊള്ളക്കാരുടെ കപ്പല് കണ്ടെത്തിയത്. ഇന്ത്യന് സേനയുടെ ഈ യുദ്ധ കപ്പല് കഴിഞ്ഞ ഏതാനും ദിവസങ്ങളായി കടല് കൊള്ളക്കാരുടെ ആക്രമണം ഉണ്ടായതിനെ തുടര്ന്ന് ഈ പ്രദേശത്ത് വിന്യസിച്ചിരിക്കുകയായിരുന്നു. കപ്പല് കണ്ടെത്തിയതിനെ തുടര്ന്ന് ഐ. എന്. എസ്. തബാര് കൊള്ളക്കാരുടെ കപ്പല് പരിശോധിക്കുവാനായി നിര്ത്തുവാന് ആവശ്യപ്പെട്ടു. എന്നാല് അതിനു വഴങ്ങാതെ കൊള്ളക്കാര് തിരിച്ച് ആക്രമിക്കുകയാണ് ഉണ്ടായത്. തോക്കുകളും ആയുധങ്ങളുമായി കടല് കൊള്ളക്കാര് കപ്പലിന്റെ ഡെക്കില് റോന്ത് ചുറ്റുന്നത് കാണാമായിരുന്നുവത്രെ. തങ്ങളുടെ കപ്പലിനു നേരെ ആക്രമണം ഉണ്ടായതിനെ തുടര്ന്ന് ഇന്ത്യന് സൈന്യവും ആക്രമണം ആരംഭിച്ചു. സേനയുടെ ആക്രമണത്തില് കൊള്ളക്കരുടെ കപ്പലില് സംഭരിച്ചു വെച്ചിരുന്ന സ്ഫോടക വസ്തുക്കള്ക്ക് തീ പിടിക്കുകയും വന് പൊട്ടിത്തെറിയോടെ കപ്പല് കടലില് മുങ്ങുകയും ഉണ്ടായി എന്ന് ഒരു നാവിക സേനാ വക്താവ് അറിയിച്ചു.
