പട്ന: ജെ.എന്‍.യു വിദ്യാര്‍ത്ഥി യൂണിയന്‍ മുന്‍ പ്രസിഡന്‍റും വിദ്യാര്‍ത്ഥിസമര നായകനുമായ കനയയ്കുമാര്‍ ബീഹാറിലെ സിപിഐ സ്ഥാനാര്‍ത്ഥിയാകും. ബെഗുസരായി മണ്ഡലത്തില്‍ നിന്നാണ് തീപ്പൊരി നേതാവ് ജനവിധി തേടുക. പ്രതിപക്ഷമഹാസഖ്യം സീറ്റ് നിഷേധിച്ചതോടെയാണ് കനയ്യകുമാറിനെ ബെഗുസരായിയില്‍ മത്സരിപ്പിക്കാന്‍ ഇടതുമുന്നണി തീരുമാനിച്ചത്.

ബീഹാറിലെ പ്രതിപക്ഷമഹാസഖ്യത്തിന്‍റെ സ്ഥാനാര്‍ത്ഥിയായി കനയ്യകുമാര്‍ മത്സരിക്കുമെന്നായിരുന്നു നേരത്തെയുണ്ടായിരുന്ന ധാരണ. എന്നാല്‍, കോണ്‍ഗ്രസും ആര്‍ജെഡിയും നേതൃത്വം നല്‍കുന്ന പ്രതിപക്ഷമഹാസഖ്യം സിപിഐ,സിപിഎം പാര്‍ട്ടികളെ സീറ്റ് വിഭജനത്തില്‍ കയ്യൊഴിഞ്ഞു. ഇടുമുന്നണിയിലെ സിപിഐഎംഎല്‍ന് മാത്രമാണ് ഒരു സീറ്റ് ലഭിച്ചത്. തുടര്‍ന്നാണ് തനിച്ച് മത്സരിക്കാന്‍ സിപിഐയും സിപിഎമ്മും തീരുമാനിച്ചത്.

ലക്നൗ: ലോക്സഭാ തിരഞ്ഞെടുപ്പിൽ മത്സരിക്കാനില്ലെന്ന് വ്യക്തമാക്കി ബിഎസ്പി അദ്ധ്യക്ഷ മായാവതി. ‘ഏത് സീറ്റിൽ നിന്നാലും ജയിക്കും. എന്നാലും ഇന്നത്തെ പ്രത്യേക രാഷട്രീയ സാഹചര്യത്തിൽ മത്സരിക്കാനില്ല.’ മായാവതി വ്യക്തമാക്കി.

2014ൽ 503 ലോക്സഭാ മണ്ഡലങ്ങളിൽ ബിഎസ്പി മത്സരിച്ചിരുന്നെങ്കിലും ഒരെണ്ണത്തിൽ പോലും വിജയിക്കാൻ സാധിച്ചിരുന്നില്ല. ഇത്തവണ ഉത്തർപ്രദേശിൽ എസ്പിയും ബിഎസ്പിയും സഖ്യം രൂപീകരിച്ച് ഒരുമിച്ചാണ് മത്സരിക്കുന്നത്.

ബംഗളൂരു: അഭ്യൂഹങ്ങള്‍ക്ക് വിരാമമിട്ട് കര്‍ണാടകത്തിലെ മാണ്ഡ്യ ലോക്‌സഭ മണ്ഡലത്തില്‍ സ്വതന്ത്രസ്ഥാനാര്‍ത്ഥിയായി മത്സരിക്കുമെന്ന് അന്തരിച്ച കോണ്‍ഗ്രസ് എംപി എം.എച്ച്.അംബരീഷിന്റെ ഭാര്യ സുമലതയുടെ പ്രഖ്യാപനം. അംബരീഷിന്റെ പാരമ്പര്യം നിലനിര്‍ത്താനാണ് താന്‍ ജനവിധി തേടുന്നതെന്നും അവര്‍ പറഞ്ഞു. മാണ്ഡ്യയില്‍ കോണ്‍ഗ്രസ് സീറ്റ് നിഷേധിച്ചതിനെത്തുടര്‍ന്നാണ് സ്വതന്ത്രയായി മത്സരിക്കാന്‍ സുമലത തീരുമാനിച്ചത്.

“മാണ്ഡ്യയില്‍ ഞാന്‍ നേരില്‍ക്കണ്ട ജനങ്ങളെല്ലാം അംബരീഷില്‍ അവര്‍ക്കുണ്ടായിരുന്ന വിശ്വാസത്തെക്കുറിച്ച് എന്നോട് പറഞ്ഞു. ആ വിശ്വാസം അവര്‍ക്ക് എന്നോടുമുണ്ട്. അദ്ദേഹത്തിന്റെ ഓര്‍മ്മയും പാരമ്പര്യവും നിലനിര്‍ത്താനാണ് എന്റെയീ പോരാട്ടം. എന്റെ തീരുമാനം ആരെയെങ്കിലും വേദനിപ്പിക്കുന്നുവെങ്കില്‍ ഞാന്‍ ക്ഷമ ചോദിക്കുന്നു.” സുമലത പറഞ്ഞു.