മുംബൈ : അഴിമതി വിരുദ്ധ പ്രക്ഷോഭങ്ങളെ ചൊല്ലി വിവാദം കൊടുമ്പിരി കൊള്ളുമ്പോള് തന്നെ രാജ്യവ്യാപകമായി കൂടുതല് കുംഭകോണങ്ങളുടെ കഥകള് അനുദിനം പുറത്തു വന്നു കൊണ്ടിരിക്കുന്നു. മഹാരാഷ്ട്രയിലെ വിദ്യാഭ്യാസ വകുപ്പ് സ്ക്കൂളുകളില് നടത്തിയ പരിശോധനയിലാണ് 1000 കോടിയോളം രൂപയുടെ ഈ പുതിയ തട്ടിപ്പ് കണ്ടെത്തിയത്. ഒരു ജില്ലയിലെ പരിശോധനയില് മാത്രം 1.4 ലക്ഷം വ്യാജ വിദ്യാര്ത്ഥികളെ ഇവിടെ നിന്നും കണ്ടെത്തി. കുട്ടികള് തീരെ ഇല്ലാത്ത സ്കൂളുകളില് പല ക്ലാസുകളിലും ഒരു കുട്ടി പോലും ഇല്ല. എന്നാല് രാവിലത്തെ കുട്ടികളെ തന്നെ വീണ്ടും വൈകീട്ടത്തെ ക്ലാസിലും ഇരുത്തി പരിശോധനയ്ക്ക് വന്ന ഉദ്യോഗസ്ഥരെ കബളിപ്പിക്കാന് ശ്രമിച്ച സ്ക്കൂളുകളെ വരെ ഇവിടെ കണ്ടെത്തി. ഇത്തരം വ്യാജ കണക്കുകള് കാണിച്ചു 120 കോടി രൂപയാണ് ഈ സ്ക്കൂളുകള് സര്ക്കാരില് നിന്നും ധനസഹായം പറ്റുന്നത്. ഇത് സംസ്ഥാന വ്യാപകമായി കണക്കാക്കിയാല് ചുരുങ്ങിയത് 1000 കോടിയുടെ തട്ടിപ്പെന്കിലും നടക്കുന്നുണ്ടാവും എന്നാണ് അധികൃതരുടെ കണക്കുകൂട്ടല്. തെരഞ്ഞെടുപ്പ് സമയത്ത് ചെയ്യുന്നത് പോലെ വിദ്യാര്ത്ഥികളുടെ വിരലില് മഷി അടയാളം ഇട്ട് ഇവരുടെ തല എണ്ണാന് ആണ് ഇപ്പോള് അധികൃതര് ആലോചിക്കുന്നത്.
ന്യൂഡല്ഹി : ഇന്ത്യയില് ഇന്ന് മുതല് വിദ്യാഭാസം കുട്ടികളുടെ മൌലികാവകാശമാകും. ആറു വയസ്സ് മുതല് പതിനാല് വയസ്സ് വരെ പ്രായമുള്ള കുട്ടികളുടെ വിദ്യാഭ്യാസം മൌലികാവകാശം ആക്കുന്ന നിയമം ഇന്ന് (ഏപ്രില് 1) മുതല് പ്രാബല്യത്തില് വരും. സ്കൂളില് പോകാന് നിവൃത്തിയില്ലാത്ത ഒരു കോടിയോളം കുട്ടികള്ക്ക് ഇതോടെ വിദ്യാഭ്യാസം എന്ന സ്വപ്നം യാഥാര്ത്ഥ്യം ആവും. ഇവരെ സ്കൂളില് അയക്കാനുള്ള ബാധ്യത ഇനി സംസ്ഥാന സര്ക്കാരുകളില് നിക്ഷിപ്തമാകും. കുട്ടികളാണ് രാജ്യത്തിന്റെ ഭാവി ഭാഗധേയം നിര്ണ്ണയിക്കുന്നത് എന്നും അതിനാല് ഈ നിയമം ചരിത്രപരമായി സുപ്രധാനമായ ഒന്നാണെന്നും നിയമം പ്രാബല്യത്തില് വരുന്നതിനു മുന്നോടിയായി രാഷ്ട്രത്തെ അഭിസംബോധന ചെയ്ത് കൊണ്ട് പ്രധാന മന്ത്രി മന്മോഹന് സിങ് പറഞ്ഞു. വിദ്യാഭാസ രംഗത്ത് രാഷ്ട്രത്തിനു ഇത് വീണ്ടും വിധിയുമായി ഒരു മുഖാമുഖമാണ് എന്ന് 1947 ഓഗസ്റ്റ് 14 അര്ദ്ധരാത്രി ഇന്ത്യയുടെ സ്വാതന്ത്ര്യ ലബ്ധിയെ തുടര്ന്ന് ജവഹര് ലാല് നെഹ്റു നടത്തിയ പ്രശസ്തമായ വരികള് കടമെടുത്ത് കേന്ദ്ര മാനവ വിഭവ ശേഷി വികസന മന്ത്രി കപില് സിബല് അഭിപ്രായപ്പെട്ടു.
