തിരുവനന്തപുരം: കേരള ഗവർണർ ഷീല ദീക്ഷിത് സ്ഥാനം ഒഴിഞ്ഞു. ബി. ജെ. പി. അധികാരത്തിൽ വന്നതോടെ തങ്ങൾക്ക് അനഭിമതരായ എല്ലാ ഗവർണ്ണർമാരെയും തൽസ്ഥാനത്ത് മാറ്റുന്ന കാര്യം പരിഗണിക്കും എന്ന് വ്യക്തമാക്കിയിരുന്നു. ഇതിന് വഴങ്ങാതെ കുറച്ചു നാൾ പിടിച്ചു നിന്ന ഷീല ദീക്ഷിത് അവസാനം ബി. ജെ. പി. ആഗ്രഹിച്ച പ്രകാരം തന്നെ സ്ഥാനം ഒഴിയുകയാണ് ഉണ്ടായത്. ഗവർണർ പദവി സ്വീകരിച്ച് കേവലം ഏഴു മാസത്തിനകമാണ് രാജി. മാദ്ധ്യമ പ്രവർത്തകർക്ക് മുൻപിൽ തന്റെ രാജി സ്ഥിരീകരിച്ച അവർ, രാഷ്ട്രപതി രാജി സ്വീകരിച്ചതിനു ശേഷമേ ഭാവി പരിപാടികളെ കുറിച്ച് സംസാരിക്കൂ എന്ന് വ്യക്തമാക്കി.

ന്യൂഡൽഹി: പുതിയ ഭരണത്തിന് പഴയ തലമുറ വഴി മാറുന്ന പ്രക്രിയ ബി. ജെ. പി. യിൽ ഇന്ന് പൂർണ്ണതയിൽ എത്തി. പാർട്ടിയുടെ സ്ഥാപക നേതാക്കളായ അടൽ ബിഹാരി വാജ്പേയി, എൽ. കെ. അദ്വാനി, മുരളി മനോഹർ ജോഷി എന്നിവരെ പാർലിമെന്ററി ബോർഡ് അംഗത്വത്തിൽ നിന്നും ഒഴിവാക്കിയ തോടെയാണിത്. ഇതോടെ പരമ പ്രധാനമായ എല്ലാ സ്ഥാനങ്ങളിലും പ്രധാന മന്ത്രി നരേന്ദ്ര മോഡിയുടെ ആധിപത്യം ഉറപ്പാക്കപ്പെട്ടതായി രാഷ്ട്രീയ വൃത്തങ്ങൾ വിലയിരുത്തുന്നു.

ന്യൂഡെല്‍ഹി: പുതിയ ഗവര്‍ണ്ണര്‍മാരുടെ പട്ടികയില്‍ ബി. ജെ. പി. യുടെ മുതിര്‍ന്ന നേതാവും മുന്‍ കേന്ദ്ര മന്ത്രിയുമായ ഒ. രാജഗോപാല്‍ ഇല്ല. ബി. ജെ. പി. നേതാക്കളായ രാം നായിക്, കേസരി നാഥ് ത്രിപാഠി, കൈലാസ് ജോഷി, വി. കെ. മല്‍‌ഹോത്ര, ബി. ഡി. ഠണ്ഡന്‍ എന്നിവര്‍ ഇടം കണ്ടെത്തി.

കഴിഞ്ഞ ലോക്‍സഭാ തിരഞ്ഞെടുപ്പില്‍ തിരുവനന്തപുരത്ത് നിന്നും മത്സരിച്ച രാജഗോപാല്‍ ഡോ. ശശി തരൂരിനോട് പരാജയപ്പെട്ടിരുന്നു. കേരളത്തില്‍ നിന്നും ബി. ജെ. പി. ക്ക് പ്രാതിനിധ്യം ഇല്ലാത്തത്തിനാല്‍ രാജഗോപാലിനെ രാജ്യസഭ യിലേക്ക് എത്തിച്ച് മന്ത്രിയാക്കും എന്നൊരു പ്രചാരണം ഉയര്‍ന്നെങ്കിലും അതുണ്ടായില്ല. അതിനു ശേഷമാണ് രാജഗോപാല്‍ കര്‍ണ്ണാടകയില്‍ ഗവര്‍ണ്ണര്‍ ആകും എന്ന വാര്‍ത്തകള്‍ വന്നത്. എന്നാല്‍ രാജഗോപാലിന്റെ പേരു കേന്ദ്ര നേതൃത്വം പരിഗണിച്ചില്ലെന്ന് വേണം കരുതുവാന്‍.

യു. പി. എ. നിയമിച്ച ഗവര്‍ണ്ണര്‍മാരോട് രാജി വെക്കുവാന്‍ സര്‍ക്കാര്‍ ആവശ്യപ്പെട്ടിരുന്നു. ചിലര്‍ രാജി വെക്കുകയും ചെയ്തു. എന്നാല്‍ രാജി വെക്കാത്ത ഷീല ദീക്ഷിത്, ശിവരാജ് പാട്ടീല്‍, ശങ്കര നാരായണന്‍ എന്നിവരെ സ്ഥലം മാറ്റാന്‍ നീക്കങ്ങള്‍ നടക്കുന്നുണ്ട്.