ന്യൂഡല്‍ഹി: പുതിയ  തെരഞ്ഞെടുപ്പ് മുഖ്യ കമീഷണറായി ‍ വി. എസ്. സമ്പത്ത് നിയമിതനാകും. മുഖ്യ തെരഞ്ഞെടുപ്പ് കമീഷണര്‍ എസ്. വൈ. ഖുറൈഷി വിരമിക്കുന്ന ഒഴിവിലേക്കാണ് നിയമനം വ്യാഴാഴ്ചയാണ് ഔദ്യോഗിക പ്രഖ്യാപനമുണ്ടാവുക. ജൂണ്‍ പത്തിന് നിലവിലെ തെരഞ്ഞെടുപ്പ് കമ്മീഷണര്‍ എസ്. വൈ ഖുറൈഷി വിരമിക്കും.  2009ലാണ് സമ്പത്ത് തെരഞ്ഞെടുപ്പ് കമീഷണറായി ചുമതലയേറ്റത്. നിലവിലെ കീഴ്വഴക്കം അനുസരിച്ച് മൂന്നുപേര്‍ അടങ്ങിയ കമ്മീഷണര്‍മാരില്‍ ഏറ്റവും സീനിയറായ ആളെ മുഖ്യ തെരഞ്ഞെടുക്കുകയാണ് പതിവ്.

സിംല: സിംല മുനിസിപ്പല്‍ കോര്‍പ്പറേഷന്‍ തിരഞ്ഞെടുപ്പില്‍ സി. പി. എം. ചരിത്രം സൃഷ്ടിച്ചു. മേയര്‍, ഡെപ്യൂട്ടി മേയര്‍ സ്ഥാനങ്ങളിലേയ്ക്ക് മത്സരിച്ച പാര്‍ട്ടിയുടെ സ്ഥാനാര്‍ഥികള്‍ ചരിത്ര വിജയം നേടി. സി. പി. എം സ്ഥാനാര്‍ഥികളായ സഞ്ജയ് ചൗഹാന്‍ തിക്കെന്ദര്‍ പന്‍വര്‍ എന്നിവരാണ് വന്‍ ഭൂരിപക്ഷത്തില്‍ തെരഞ്ഞെടുക്കപ്പെട്ടത്. കഴിഞ്ഞ 26 വര്‍ഷമായി കോണ്‍ഗ്രസാണ് സിംല ഭരിച്ചിരുന്നത്. കോണ്‍ഗ്രസിനെ അട്ടിമറിച്ചാണ് ഈ അപ്രതീക്ഷിത വിജയം. സഞ്ജയ് ചൗഹാന്‍ മേയറും തിക്കെന്ദര്‍ പന്‍വര്‍ ഡെപ്യൂട്ടി മേയറുമാണ്. ഇവിടെ മേയര്‍, ഡെപ്യൂട്ടി മേയര്‍ എന്നീ സ്ഥാനങ്ങളിലേക്ക് നേരിട്ട് തെരഞ്ഞെടുക്കുന്ന രീതിയാണ് നിലനില്‍ക്കുന്നത്. ഈ സീറ്റുകള്‍ കൂടാതെ മറ്റു മൂന്നു സീറ്റുകള്‍ കൂടി സി. പി. എം നേടി. എന്നാല്‍ 12 സീറ്റുകളില്‍ വിജയിച്ച ബി. ജെ. പി.യാണ് ഏറ്റവും വലിയ ഒറ്റകക്ഷി. ഭരണ കക്ഷിയായിരുന്ന കോണ്‍ഗ്രസിന് പത്ത് സീറ്റ് ലഭിച്ചു.