ചെന്നൈ: രാഷ്ട്രപതി സ്ഥാനത്തേക്ക് തന്റെ പിന്തുണ പ്രണബ് മുഖർജിക്ക് എന്ന് ഡി. എം. കെ. അദ്ധ്യക്ഷന്‍ എം. കരുണാനിധി വെളിപ്പെടുത്തി. പ്രണബിനെ 1969ല്‍ ചെന്നൈയിലേക്ക് കൊണ്ടു വന്ന് സംസ്ഥാന സ്വയംഭരണ മഹാ സമ്മേളനം നടത്തിയയാളാണ് താനെന്നും അതിനാല്‍ പ്രണബ് മുഖര്‍ജി രാഷ്ട്രപതി സ്ഥാനാര്‍ഥിയായാല്‍ പിന്തുണയ്ക്കാന്‍ മടിക്കില്ലെന്നും കരുണാനിധി പറഞ്ഞു. ഗോപാലപുരത്തെ വസതിയില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ഇതോടെ പ്രണബ് മുഖര്‍ജിയെ രാഷ്ട്രപതി സ്ഥാനാര്‍ഥിയായി കോൺഗ്രസ് മത്സരിപ്പിക്കാനുള്ള സാധ്യത വര്‍ധിച്ചു. പ്രണബ് മുഖര്‍ജിയോ ഹമീദ്‌ അന്‍സാരിയോ ആകും കോണ്ഗ്രസ് രംഗത്ത് കൊണ്ടു വരിക എന്ന കാര്യം ഏറെക്കുറെ ഉറപ്പായി. എന്നാല്‍ ബി. ജെ. പി. ആരെയാകും രംഗത്ത് ഇറക്കുക എന്ന് ഇപ്പോഴും വ്യക്തമല്ല. മുന്‍ രാഷ്ട്രപതി എ. പി. ജെ. അബ്ദുല്‍ കലാമിനെ രംഗത്ത് കൊണ്ട് വന്നു എങ്കിലും പ്രതീക്ഷിച്ച അത്ര പിന്തുണ മറ്റു പാര്‍ട്ടികളില്‍ നിന്നും ലഭിച്ചില്ല.
