ചെന്നൈ: ചെന്നൈയില്‍ അഞ്ച് ബാങ്ക് കൊള്ളക്കാരെ പൊലീസ് ഏറ്റുമുട്ടലില്‍ വെടിവെച്ചു കൊന്നു. മരിച്ചവര്‍ ബീഹാര്‍, ഉത്തര്പ്രദേശ് സ്വദേശികളാണ്. ഇന്നലെ പുലര്‍ച്ചെ ഒരു മണിയോടെ വേളാച്ചേരിയിലാണ് സംഭവം. സംഭവവുമായി ബന്ധപ്പെട്ട് കൊള്ളക്കാരായ 10 വിദ്യാര്‍ഥികള്‍ അറസ്റ്റിലായി. എറ്റുമുട്ടലില്‍ രണ്ടു പൊലീസുകാര്‍ക്ക് പരിക്കേറ്റു. ചെന്നൈ നഗരത്തില്‍ കഴിഞ്ഞ ഒരു മാസത്തിനിടെ ഇന്ത്യന്‍ ഓവര്‍സീസ് ബാങ്ക്, ബാങ്ക് ഓഫ് ബറോഡ എന്നീ ബാങ്കുകള്‍ കൊള്ളയടിച്ച സംഘമാണിതെന്ന് പൊലീസ് പറഞ്ഞു. വേളാച്ചേരിയില്‍ കൊള്ളസംഘം ഒരു വീട്ടില്‍ ഒളിവില്‍ കഴിയുന്നുണ്ടെന്ന് വിവരം ലഭിച്ചതിനെ തുടര്‍ന്ന് പൊലീസ് എത്തി സംഘത്തോട് കീഴടങ്ങാന്‍ ആവശ്യപ്പെട്ടങ്കിലും പൊലീസിന് നേരെ വെടിയുതിര്‍ക്കുകയായിരുന്നു . തുടര്‍ന്ന് പൊലീസ് പ്രത്യാക്രമണം നടത്തി. രാത്രി 11ന് ആരംഭിച്ച ഏറ്റുമുട്ടല്‍ പുലര്‍ച്ചെ ഒന്ന് വരെ നീണ്ടുവെന്നാണ് റിപ്പോര്‍ട്ട്.
