പ്രശസ്ത സിനിമാ താരം സംവൃത സുനില്‍ വിവാഹിതയായി. കോഴിക്കോട് സ്വദേശിയും കാലിഫോര്‍ണിയയിലെ വാള്‍ട്ട് ഡിസ്നി കമ്പനിയില്‍ എഞ്ചിനീയറുമായ അഖിലാണ് വരന്‍. രാവിലെ 11 മണിക്കുള്ള മുഹൂര്‍ത്തത്തില്‍ പയ്യാമ്പലം ബേബി ബീച്ചിനു സമീപത്തെ ക്ലിഫ് ഹൌസില്‍ വെച്ചായിരുന്നു വിവാഹം. കേരളപ്പിറവി ദിനത്തിന്റെ സ്പര്‍ശം നല്‍കി ക്രീം കളര്‍ കസവു സാരിയണിഞ്ഞാണ് സംവൃത സുമംഗലിയായത്. സംവൃതയുടെ വിവാഹത്തിനു പ്രകൃതിയുടെ അനുഗ്രഹമെന്നോണം മഴയുമുണ്ടായിരുന്നു. ഭര്‍ത്താവിനൊപ്പം കാലിഫോര്‍ണിയയിലേക്ക് പോകുവാനുള്ള കടലാസു പണികള്‍ പൂര്‍ത്തിയാക്കുവാന്‍ നേരത്തെ ആര്യസമാജത്തില്‍ വച്ച് ഇരുവരും റെജിസ്റ്റര്‍ വിവാഹം കഴിച്ചിരുന്നു.
സിനിമാ രംഗത്തു നിന്നും ലാല്‍ ജോസ്, രഞ്ജിത്, ആന്‍ അഗസ്റ്റിന്‍ , മീരാ നന്ദന്‍ , കുഞ്ചന്‍ തുടങ്ങിയ പ്രമുഖര്‍ എത്തിയിരുന്നു. സിനിമാ രംഗത്തെ സുഹൃത്തുക്കള്‍ക്ക് നവമ്പര്‍ ആറാം തിയതി കൊച്ചി ലേ-മെറീഡിയനില്‍ വിരുന്ന് സല്‍ക്കാരം ഒരുക്കുന്നുണ്ട്. കണ്ണൂരിലെ ഇന്ത്യാ ഹൌസ് ഹോട്ടല്‍ ഉടമ ചാലാട്ട് സുനില്‍ കുമാറിന്റേയും സാധനയുടേയും മൂത്ത മകളായ സംവൃത ലാല്‍ ജോസ് ചിത്രമായ രസികനിലൂടെ ആണ് സംവൃത മലയാള സിനിമയിലേക്ക് എത്തുന്നത്. വിവാഹത്തോടെ സിനിമ വിടും എന്ന് പ്രഖ്യാപിച്ചിട്ടുള്ള സംവൃത അവസാനമായി അഭിനയിച്ചതും ലാല്‍ ജോസ് സംവിധാനം ചെയ്ത പൃഥ്‌വി രാജ് നായകനായ ചിത്രത്തിലാണ്. അയാളും ഞാനും തമ്മില്‍ എന്ന ഈ ചിത്രം ഇതിനോടകം റിലീസ് ചെയ്തു കഴിഞ്ഞു.
