ന്യൂഡല്ഹി: രാഷ്ട്രീയത്തിൽ ഇറങ്ങുമെന്ന വാര്ത്തകൾ നിഷേധിച്ചതിനു തൊട്ട് പിന്നാലെ ബി. ജെ. പി. ആവശ്യപ്പെട്ടാല് ഡല്ഹിയില് പാര്ട്ടിയുടെ മുഖ്യമന്ത്രി സ്ഥാനാര്ത്ഥി ആവാൻ തയ്യാറാണെന്ന് മുന് ഐ. പി. എസ്. ഉദ്യോഗസ്ഥ കിരണ് ബേദി. നരേന്ദ്ര മോഡിയെ പ്രകീര്ത്തിച്ച് കൊണ്ട് കിരണ് ബേദി തുടരെ തുടരെ പ്രസ്താവനകള് നടത്തിയിരുന്നു. തന്നെ ക്ഷണിച്ചാല് മുഖ്യമന്ത്രി ആവാൻ താൻ തയ്യാറാകുമെന്ന് കിരണ് ബേദി പറഞ്ഞു. ഡല്ഹിയില് ഡിസംബറില് നടന്ന നിയമസഭാ തിരഞ്ഞെടുപ്പില് ചാന്ദ്നിചൗക്ക് മണ്ഡലത്തില് നിന്ന് മല്സരിച്ച ഹര്ഷ വര്ധനെയാണ് ബി. ജെ. പി. മുഖ്യമന്ത്രി സ്ഥാനാര്ഥിയാക്കി ഉയര്ത്തിക്കാട്ടിയിരുന്നത്. എന്നാല് അദ്ദേഹം ലോൿസഭയിലേക്ക് തെരെഞ്ഞെടുക്ക പ്പെട്ടതോടെയാണ് ബേദിയുടെ സാധ്യത തെളിഞ്ഞത്. കിരണ് ബേദിക്ക് തന്നെയാണ് കൂടുതല് സാധ്യതയെന്ന് രാഷ്ട്രീയ നിരീക്ഷകര് വിലയിരുത്തുന്നു.
