ഉക്രൈന് : ജപ്പാനിലെ ഇപ്പോഴത്തെ ആണവ പ്രതിസന്ധിയുടെ പശ്ചാത്തലത്തില് രാജ്യത്തെ എല്ലാ ആണവ നിലയങ്ങളുടെയും സുരക്ഷാ സംവിധാനങ്ങള് ശക്തമാക്കുമെന്ന് ഉക്രൈനിലെ ആണവ നിയന്ത്രണ കമ്മിറ്റി ചെയര്മാന് യെലേന മിക്കോളൈഷുക്. ആണവ വികിരണം നിയന്ത്രണ അതീതമായി തീര്ന്നിരിക്കുന്നതിനാല് ജപ്പാനിലെ തുടര്ന്നുള്ള അവസ്ഥകള് പ്രവചിക്കുക അസാധ്യമാണ്. എങ്കിലും ഉക്രൈനിലെ ചെര്ണോബില് ദുരന്തം പോലെ വളരെ ഭയാനകമായ ഒരു അവസാനമായിരിക്കും ഫുകുഷിമയിലേത് എന്ന് അവര് വിലയിരുത്തി.
ആണവോര്ജ്ജത്തെ ആശ്രയിക്കുന്ന മറ്റു ലോക രാജ്യങ്ങള് ജപ്പാനിലെ ഈ പ്രതിസന്ധിയില് നിന്നും കൂടുതല് പഠിക്കേണ്ടിയിരിക്കുന്നു. സ്ഫോടനങ്ങള് ഉണ്ടാകുമ്പോള് ആണവ റിയാക്ടറുകളില് ഉത്പാദിപ്പിക്കപ്പെടുന്ന ഹൈഡ്രജന് വാതകം സംഭരണം ചെയ്യാനുള്ള സംവിധാനങ്ങള് ഇന്ന് ലോകത്തുള്ള ഒട്ടു മിക്ക ആണവ റിയാക്ടറുകളിലും ഇല്ല. എന്നാല് അടുത്തിടെ കമ്മിഷന് ചെയ്യപ്പെട്ട ഉക്രൈനിലെ ഖെമേല്നിസ്ക് ആണവ നിലയത്തിലും റോവ്നോ ആണവ നിലയത്തിലും സുരക്ഷ സംവിധാനങ്ങള് മെച്ചപ്പെടുത്താന് ഈ സംവിധാനം ഏര്പ്പെടുത്തിയിട്ടുണ്ട്. ഉക്രൈനിലെ മറ്റു ആണവ നിലയങ്ങളിലും ഇത് പ്രാവര്ത്തികമാക്കാന് പദ്ധതി ഉണ്ട്. ഐക്യ രാഷ്ട്ര സഭയുടെ ആണവ സുരക്ഷ കണ്വെന്ഷനോട് അനുബന്ധിച്ച് ഉക്രൈനിലെ എല്ലാ ആണവ നിലയങ്ങളും ഏറ്റവും പുതിയ സുരക്ഷ നയങ്ങള് പാലിച്ച് പ്രവര്ത്തിക്കുന്നവയാണ്. ഇവ സാധ്യമല്ലാത്ത എല്ലാ നിലയങ്ങളും അടച്ചു പൂട്ടുകയും ചെയ്തു. ഭൂകമ്പബാധയെ ചെറുക്കുവാന് സാധിക്കുന്നവയാണ് ഈ നിലയങ്ങള്.
ജപ്പാനിലെ ആണവ നിലയങ്ങള് ഇങ്ങനെ രൂപകല്പന ചെയ്തിരുന്നവ ആയിരുന്നെങ്കിലും അവയ്ക്ക് തുടര്ന്നുണ്ടായ സുനാമിയെയും വെള്ളപ്പൊക്കത്തെയും തടുക്കുവാന് കഴിഞ്ഞില്ല . ഇവയെല്ലാം മുന്കൂട്ടി കണ്ടു കൊണ്ട് വേണം തുടര്ന്നുള്ള ഏതൊരു ആണവോര്ജ പദ്ധതിയും രൂപകല്പന ചെയ്യാന്.
ഉക്രൈനില് 4 ആണവ നിലയങ്ങളിലായി 15 റിയാക്ടറുകള് പ്രവര്ത്തിക്കുന്നുണ്ട്. രാജ്യത്തിന്റെ 50% ല് അധികം വൈദ്യുതി ഇവയില് നിന്നുമാണ് ഉത്പാദിക്കപ്പെടുന്നത്.
സിയോള്: അമേരിക്ക ദക്ഷിണ കൊറിയയുമായി ചേര്ന്ന് സംയുക്ത സൈനിക പരിശീലനം നടത്തിയാല് തിരിച്ചടിയായി ആണവ യുദ്ധം പോലും തുടങ്ങാന് തങ്ങള് മടിക്കില്ല എന്ന് ഉത്തര കൊറിയ വ്യക്തമാക്കി. സംയുക്ത സൈനിക പരിശീലനം തങ്ങള്ക്കു നേരെയുള്ള സൈനിക വെല്ലുവിളിയാണ്. ഇതിനെതിരെ ശക്തമായി തന്നെ തങ്ങള് പ്രതികരിക്കും. വേണ്ടി വന്നാല് ഇതിനായി ആണവായുധങ്ങള് പോലും പ്രയോഗിക്കാന് തങ്ങള് മടിക്കില്ല. ഇതൊരു വിശുദ്ധ യുദ്ധമാണ് എന്നും ഉത്തര കൊറിയയുടെ ഉന്നത തല സൈനിക നേതൃത്വം അറിയിച്ചു. 
ടൊറോന്റോ : യുദ്ധേതര ആവശ്യങ്ങള്ക്കായി കാനഡയുമായി സഹകരിക്കാനുള്ള ആണവ കരാറില് ഇന്ത്യ ഒപ്പു വെച്ചു. പതിനാറു വര്ഷത്തിനിടയ്ക്ക് കാനഡയില് സന്ദര്ശനം നടത്തുന്ന ആദ്യ ഇന്ത്യന് പ്രധാന മന്ത്രിയായ മന്മോഹന് സിംഗും, കാനഡയുടെ പ്രധാന മന്ത്രി സ്റ്റീഫന് ഹാര്പ്പറും ഈ കരാര് കാനഡയുമായുള്ള ഇന്ത്യയുടെ ഉഭയ കക്ഷി ബന്ധങ്ങളെ പുതിയ മാനങ്ങളില് എത്തിക്കുന്നതാണ് എന്ന് അഭിപ്രായപ്പെട്ടു. ഈ കരാര് പ്രാബല്യത്തില് വരുന്നതോടെ ഇന്ത്യയിലേക്ക് കാനഡയിലെ കമ്പനികള്ക്ക് യുറേനിയവും ആണവ ഉപകരണങ്ങളും ഇറക്കുമതി ചെയ്യാനാവും. ഇന്ത്യന് ആണവ വിപണിയില് 200 ബില്യണ് ഡോളറിന്റെ കച്ചവടത്തിന് സാദ്ധ്യതയുണ്ട് എന്നാണ് കണക്കാക്കിയിട്ടുള്ളത്.
ന്യൂഡല്ഹി : ഇന്ത്യ അമേരിക്കയുമായി ഉണ്ടാക്കിയ ആണവ കരാറു പോലൊരു കരാര് തങ്ങള്ക്കും വേണമെന്ന പാക്കിസ്ഥാന്റെ ആവശ്യം അമേരിക്ക തള്ളിയതിനെ തുടര്ന്ന് പാക്കിസ്ഥാന് ചൈനയുമായ് സമാനമായ ഒരു ആണവ കരാര് ഉണ്ടാക്കാന് ഒരുങ്ങുന്നതായി സൂചന. ഇന്ത്യ അമേരിക്കയുമായി ഉണ്ടാക്കിയ ഉടമ്പടി നടപ്പിലാക്കാന് ആണവ വിതരണ സംഘം (NSG – Nuclear Suppliers Group) ഇന്ത്യയെ ചില നിബന്ധനകളില് നിന്നും ഒഴിവാക്കിയിരുന്നു. ഇതിനു സമാനമായി ആണവ വിതരണ സംഘത്തിന്റെ പരിധിയ്ക്ക് പുറത്തുള്ള ഒരു ഉടമ്പടിയാണ് പാക്കിസ്ഥാന് ചൈനയുമായി ഉണ്ടാക്കാന് ഒരുങ്ങുന്നത്. പാക്കിസ്ഥാന്റെ ഔദ്യോഗികമായ തീവ്രവാദ ബന്ധവും, മുന്കാല ഭീകരവാദ അനുകൂല നിലപാടുകളുടെ ചരിത്രവും കണക്കിലെടുക്കാതെയുള്ള ഈ ചൈനീസ് നടപടി ലോകത്തോടുള്ള വെല്ലുവിളിയായാണ് കണക്കാക്കപ്പെടുന്നത്.
ന്യൂയോര്ക്ക് : ഇറാനെതിരെ ഐക്യ രാഷ്ട്ര സഭയുടെ സുരക്ഷാ സമിതി പുതിയ ഉപരോധങ്ങള് ഏര്പ്പെടുത്തി. ഇറാന്റെ ആണവ പരിപാടികള്ക്ക് തടയിടാന് ഉദ്ദേശിച്ചുള്ളതാണ് ഇത് എന്നാണു സുരക്ഷാ സമിതി പറയുന്നത്. എന്നാല് ഇത്തരം സാമ്പത്തിക ഉപരോധങ്ങള് കൊണ്ട് ഇറാന്റെ ആണവ പദ്ധതികളുടെ വികസനത്തെ തടയാന് ആവില്ല എന്നാണു വിദഗ്ദ്ധരുടെ അഭിപ്രായം. എന്നാല് സാധാരണ ജനത്തിന്റെ ജീവിതം ഇത്തരം ഉപരോധങ്ങള് കൊണ്ട് നരക തുല്യമാവുകയും ചെയ്യും. കൂടുതല് കനത്ത നിയന്ത്രണങ്ങള് ഉപരോധ പ്രമേയത്തില് ഉണ്ടായിരുന്നെങ്കിലും ചൈനയുടെയും റഷ്യയുടെയും എതിര്പ്പ് മൂലം ഇവ ഒഴിവാക്കുകയായിരുന്നു. ബ്രസീലും തുര്ക്കിയും ഉപരോധത്തെ എതിര്ത്തപ്പോള് ലെബനോന് വോട്ടെടുപ്പില് നിന്നും വിട്ടുനിന്നു.
ന്യൂയോര്ക്ക് : ആണവ നിര്വ്യാപന ഉടമ്പടിയില് ഒപ്പ് വെയ്ക്കാന് ഇന്ത്യയ്ക്കു മേല് ഐക്യരാഷ്ട്ര സഭ സമ്മര്ദ്ദം ചെലുത്തുന്നു. കീഴ് വഴക്കങ്ങള്ക്കു വിരുദ്ധമായി ഇതാദ്യമായാണ് ഒരു രാജ്യത്തെ പേരെടുത്തു പറഞ്ഞു കൊണ്ട് ഐക്യ രാഷ്ട്ര സഭ ഇത്തരമൊരു ആവശ്യം ഉന്നയിക്കുന്നത്. ഇന്ത്യയ്ക്കു പുറമേ പാക്കിസ്ഥാനോടും ഇസ്രയേലിനോടും ഐക്യ രാഷ്ട്ര സഭ ഇനിയും വൈകിക്കാതെയും, മറ്റ് ഉപാധികളൊന്നും മുന്പോട്ടു വെയ്ക്കാതെയും ആണവ നിര്വ്യാപന ഉടമ്പടിയിലും (Non- Proliferation Treaty – NPT) സമഗ്ര പരീക്ഷണ നിരോധന ഉടമ്പടിയിലും (Comprehensive Test Ban Treaty – CTBT) ഒപ്പ് വെയ്ക്കാന് ആവശ്യപ്പെട്ടിട്ടുണ്ട്.
