ഗുരുവായൂര്‍: കടന്നല്‍ കുത്തേറ്റ് മൂന്ന് പേര്‍ക്ക് പരിക്ക്. സാരമായി പരിക്കേറ്റ ഒമ്പതു വയസുകാരനെ തീവ്ര പരിചരണ വിഭാഗത്തില്‍ പ്രവേശിപ്പിച്ചു. കര്‍ണ്ണംകോട്ട് ബസാര്‍ പുലിമാന്തി പറമ്പില്‍ പൊന്നേത്ത് കബീറിന്റെ ഭാര്യ ദീനാര്‍ (30), മകന്‍ സാബിത്ത് (9), മാതാവ് സുഹറ (60) എന്നിവര്‍ക്കാണ് കടന്നല്‍ കൂട്ടത്തിന്റെ ആക്രമണത്തില്‍ പരിക്കേറ്റത്. ഇന്നലെ രാവിലെ ഏഴോടെ അടുത്ത വീട്ടില്‍ പാലു വാങ്ങാനായി പോയ സാബിത്തിനെയാണ് കടന്നല്‍ കൂട്ടം ആദ്യം ആക്രമിച്ചത്. ആക്രമണത്തില്‍ നിന്ന് രക്ഷ നേടാന്‍ വീട്ടിലേക്ക് തിരിഞ്ഞോടിയ സാബിത്തിനെ കടന്നല്‍ കൂട്ടം പിന്തുടര്‍ന്ന് ആക്ക്രമിച്ചു. മോട്ടോറില്‍ നിന്ന് വെള്ളം ഹോസ് ഉപയോഗിച്ച് പമ്പ് ചെയ്ത് കടന്നല്‍ കൂട്ടത്തെ അകറ്റി സാബിത്തിനെ രക്ഷിക്കാന്‍ ശ്രമിക്കുന്ന തിനിടെയാണ് സുഹറയ്ക്കും ദീനാറിനും കടന്നല്‍ കൂട്ടത്തിന്റെ ആക്രമണമേറ്റത്. കടന്നല്‍ കൂടിനെ പരുന്ത് ആക്രമിച്ചപ്പോള്‍ കടന്നല്‍ കൂടിന്റെ ഒരു ഭാഗം സാബിത്തിന്റെ തലയിലേക്ക് വന്നു വീണതിനെ തുടര്‍ന്നാണ് ആക്രമണം. സ്വകാര്യ വ്യക്തിയുടെ പറമ്പിലെ മാവിലാണ് ഭീമന്‍ കടന്നല്‍കൂട് നിന്നിരുന്നത്. പരിക്കേറ്റ മൂന്നു പേരെയും മുതുവട്ടൂര്‍ രാജ ആശുപത്രിയില്‍ പ്രവേശിപ്പിച്ചു. സാരമായി പരിക്കേറ്റ സാബിത്തിനെ തീവ്ര പരിചരണ വിഭാഗത്തില്‍ പ്രവേശിപ്പിച്ചു.
– ഷെരീഫ്‌
- ഡെസ്ക്
അനുബന്ധ വാര്‍ത്തകള്‍
വായിക്കുക: sherief-vakepurath
