- ലിജി അരുണ്
ന്യൂഡല്ഹി : ഫേസ്ബുക്ക്, ഗൂഗിള്, യൂട്യൂബ്, മൈക്രോസോഫ്റ്റ്, യാഹൂ, ഓര്ക്കുട്ട്, ബ്ലോഗ്സ്പോട്ട് എന്നിങ്ങനെ 21 സോഷ്യല് നെറ്റ്വര്ക്കിംഗ് സൈറ്റുകള്ക്ക് എതിരെ പ്രോസിക്യൂഷന് നടപടികള് സ്വീകരിക്കാന് സര്ക്കാര് അനുമതി നല്കി. രാജ്യത്തിന്റെ അഖണ്ഡതയ്ക്കും സമൂഹത്തില് വിള്ളല് ഉണ്ടാക്കുന്നതിനും ഈ വെബ് സൈറ്റുകള് കാരണമാകുന്നു എന്നതിന് മതിയായ തെളിവുകള് ഉണ്ട് എന്ന് സര്ക്കാര് ഡല്ഹി കോടതിയെ അറിയിച്ചു. ഈ വെബ് സൈറ്റുകള്ക്ക് എതിരെ ഇന്ത്യന് ശിക്ഷാ നിയമത്തിലെ 153-A, 153-B, 295-A എന്നീ വകുപ്പുകള് പ്രകാരം കുറ്റം ചുമത്താവുന്നതാണ് എന്നും കോടതിയില് സമര്പ്പിച്ച റിപ്പോര്ട്ടില് സര്ക്കാര് വ്യക്തമാക്കി.
ബ്ലോഗ് അടക്കം ഒട്ടേറെ മാദ്ധ്യമങ്ങള് വഴി വര്ഗ്ഗീയ വിദ്വേഷവും വിഭാഗീയതയും സാമുദായിക സ്പര്ദ്ധയും വര്ദ്ധിപ്പിക്കുന്ന രീതിയിലുള്ള വിവാദങ്ങളും സംവാദങ്ങളും പ്രചരിക്കുന്ന പ്രവണത അടുത്ത കാലത്തായി കണ്ടു വരുന്നത് ഇത്തരം മാദ്ധ്യമങ്ങളുടെ ദൂഷ്യ വശമായി ചൂണ്ടിക്കാണിക്കപ്പെടുന്നു. ഈ മാദ്ധ്യമങ്ങള്ക്ക് സെന്സര്ഷിപ്പ് ഏര്പ്പെടുത്തണം എന്ന വാദത്തിന് ഇത്തരം ദുരുപയോഗങ്ങള് ശക്തി പകരുന്നു.
- ജെ.എസ്.
വായിക്കുക: ഇന്റര്നെറ്റ്, തീവ്രവാദം, മനുഷ്യാവകാശം, മാധ്യമങ്ങള്, വിവാദം
ഭോപ്പാല് : മധ്യപ്രദേശ് സര്ക്കാര് സ്ക്കൂളുകളില് സൂര്യനമസ്ക്കാരം എന്ന യോഗാസനം കുട്ടികളെ പരിശീലിപ്പിക്കുന്നത് സംബന്ധിച്ച വിവാദം രൂക്ഷമാകുന്നു. ഒരു വശത്ത് നഗരത്തിലെ ഖാസി സൂര്യനമസ്ക്കാരം ചെയ്യുന്നതിന് എതിരെ ഫത്വ പുറപ്പെടുവിച്ചപ്പോള് മറുഭാഗത്ത് സര്ക്കാര് പരമാവധി വിദ്യാര്ത്ഥികളെ പങ്കെടുപ്പിച്ചു കൊണ്ട് ലോക റിക്കാര്ഡ് സ്ഥാപിക്കാനുള്ള ശ്രമത്തിലാണ്.
സൂര്യനമസ്ക്കാരം എല്ലാ വിദ്യാര്ത്ഥികളും നിര്ബന്ധമായി ചെയ്യണം എന്നൊന്നും സര്ക്കാര് നിഷ്കര്ഷിച്ചിട്ടില്ല. എന്നാല് സര്ക്കാര് വിദ്യാഭ്യാസ രംഗത്തെ കാവി പുതപ്പിക്കാന് ശ്രമിക്കുകയാണ് എന്നും വിദ്യാര്ത്ഥികളെ വര്ഗ്ഗീയമായി വിഭജിക്കുകയാണ് എന്നും കോണ്ഗ്രസ് നയിക്കുന്ന പ്രതിപക്ഷം ആരോപിക്കുന്നു.
സൂര്യന് കാവി നിറമോ പച്ച നിറമോ അല്ലെന്നും ആരോഗ്യവും ഏകാഗ്രതയും വര്ദ്ധിപ്പിക്കുന്നതിനുള്ള ഒരു വ്യായാമ മുറ മാത്രമാണ് സൂര്യനമസ്ക്കാരം എന്നുമാണ് അധികൃതരുടെ പക്ഷം. ഇത് താല്പര്യമില്ലാത്തവര് ചെയ്യണം എന്ന് നിര്ബന്ധവുമില്ല.
എന്നാല് സൂര്യനെ നമസ്ക്കരിക്കുന്നത് വിഗ്രഹ ആരാധനയ്ക്ക് തുല്യമാണ് എന്നാണ് ഇതിനെതിരെ ഫത്വ ഇറക്കിയ ഖാസി പറയുന്നത്.
സംസ്ഥാനം ഭരിക്കുന്ന ബി.ജെ.പി. സര്ക്കാര് ആര്. എസ്. എസിന്റെ അജന്ഡ നടപ്പിലാക്കുകയാണ് എന്ന് കോണ്ഗ്രസ് ആരോപിക്കുന്നു. കഴിഞ്ഞ വര്ഷം പാഠ്യ പദ്ധതിയില് ഭഗവദ് ഗീതയില് നിന്നുമുള്ള ചില ഭാഗങ്ങള് സര്ക്കാര് ഉള്പ്പെടുത്തിയത് ഏറെ വിമര്ശന വിധേയമായിരുന്നു. കേന്ദ്ര സര്ക്കാര് ഫണ്ട് ഉപയോഗിച്ച് ആര്. എസ്. എസ്. പ്രസിദ്ധീകരണമായ “ദേവ് പുത്ര” എന്ന മാസിക സര്ക്കാര് സ്ക്കൂളുകളില് വിതരണം ചെയ്തതും ഏറെ ഒച്ചപ്പാട് ഉണ്ടാക്കിയിരുന്നു.
- ജെ.എസ്.
വായിക്കുക: ആരോഗ്യം, ഇന്ത്യന് രാഷ്ട്രീയം, കുട്ടികള്, തീവ്രവാദം, മതം, വിദ്യാഭ്യാസം, വിവാദം
ന്യൂഡല്ഹി : മുംബൈ ഭീകര ആക്രമണ കേസിലെ സൂത്രധാരന് ഡേവിഡ് കോള്മാന് ഹെഡ്ലിയുമായി അമേരിക്കന് അധികൃതര് ഉണ്ടാക്കിയ ധാരണ തങ്ങള് അംഗീകരിക്കുന്നില്ല എന്നും എത്രയും വേഗം കുറ്റവാളി കൈമാറ്റ നിയമ പ്രകാരം ഇയാളെ ഇന്ത്യയിലേക്ക് കൊണ്ട് വരണമെന്നും ദേശീയ അന്വേഷണ ഏജന്സി ഡല്ഹി കോടതിയില് ബോധിപ്പിച്ചു. ജമാഅത്ത് ഉദ് ദവ നേതാക്കളായ ഹാഫിസ് മുഹമ്മദ് സയീദ്, സക്കി ഉര് റഹ്മാന് ലഖ്വി എന്നിവരോടൊപ്പം ഡേവിഡ് കോള്മാന് ഹെഡ്ലി യെയും മറ്റ് അഞ്ചു പേരെയും മുംബൈ ഭീകര ആക്രമണത്തിന്റെ ആസൂത്രണം നടത്തി എന്ന് കഴിഞ്ഞ മാസം ദേശീയ അന്വേഷണ ഏജന്സി കുറ്റം ചാര്ത്തിയിരുന്നു.
- ജെ.എസ്.
ബിജാപൂര് : സിന്ദഗി തഹസില്ദാര് ഓഫീസില് പാക്കിസ്ഥാന് ദേശീയ പതാക ഉയര്ത്തിയത് ഹിന്ദുത്വ വാദികള് ആണെന്ന് പോലീസ് അറിയിച്ചു. ഇത് സംബന്ധിച്ച് 6 യുവാക്കളെ പോലീസ് പിടി കൂടിയിട്ടുണ്ട്. ഇവര് ശ്രീ രാമ സേന എന്ന സംഘടനയുടെ പ്രവര്ത്തകരാണ്.
പോലീസ് നടത്തിയ അന്വേഷണത്തില് തഹസില്ദാര് ഓഫീസിനടുത്ത് ഒരു സ്കൂട്ടര് കിടന്നിരുന്നതായി വിവരം ലഭിച്ചിരുന്നു. ഈ സ്കൂട്ടറിന്റെ ഉടമയെ തേടി പിടിച്ച് ചോദ്യം ചെയ്തതോടെയാണ് പ്രതികളെ കുറിച്ചുള്ള സൂചനകള് ലഭിച്ചത്. സംഭവ ദിവസം സ്കൂട്ടര് യാത്രക്കാര് രണ്ടു യുവാക്കളെ തഹസില്ദാര് ഓഫീസിന്റെ വളപ്പില് സംശയകരമായ സാഹചര്യത്തില് കണ്ടിരുന്നു. ഇവരോട് പോലീസ് സംഘം സ്ഥലത്ത് റോന്തു ചുറ്റുന്നുണ്ട് എന്നും അതിനാല് വേഗം സ്ഥലം വിട്ടു കൊള്ളുവാനും ഇവര് ഉപദേശിച്ചതായി ഇവര് പോലീസിനോട് വെളിപ്പെടുത്തി. ഈ യുവാക്കളെ പോലീസ് ചോദ്യം ചെയ്തപ്പോഴാണ് പതാക ഉയര്ത്തിയത് തങ്ങളാണ് എന്ന് ഇവര് സമ്മതിച്ചത്.
- ജെ.എസ്.