മൂന്നാമത്തെ വിവാഹവും വേർ പിരിയുന്നതോടെ തന്റെ സിനിമയുടെ പേര് പോലെ തന്നെ വിവാഹവും തനിക്ക് ഇമ്പോസിബ്ൾ ആണെന്ന് ടോം ക്രൂസ് തെളിയിച്ചു. സിനിമാ നടി കാതി ഹോംസ് മിഷൻ ഇമ്പോസിബ്ൾ – 3 നായകൻ ടോം ക്രൂസുമായുള്ള വിവാഹ ബന്ധം വേർപെടുത്താനുള്ള നിയമ നടപടികൾ സ്വീകരിച്ചു കഴിഞ്ഞു. കഴിഞ്ഞ ദിവസം വരെ തന്റെ ഭാര്യയുമായുള്ള ബന്ധത്തിൽ താൻ ഏറെ സന്തുഷ്ടനാണെന്ന് മാദ്ധ്യമ പ്രവർത്തകരോട് പറഞ്ഞു കൊണ്ടിരുന്ന ടോം ക്രൂസിന് ഇത് മൂന്നാമത്തെ വിവാഹ മോചനമാണ്. മിമി റോജേഴ്സ്, നിക്കോൾ കിഡ്മാൻ എന്നിവരാണ് ടോം ക്രൂസിന്റെ മുൻ ഭാര്യമാർ.
ടോം ക്രൂസിൽ ഉണ്ടായ തന്റെ മകൾ സൂരിയുടെ കസ്റ്റഡി തനിക്ക് വേണം എന്നാണ് കാതിയുടെ ആവശ്യം. നിക്കോൾ കിഡ്മാനുമായുള്ള വിവാഹത്തിൽ പിറന്ന തന്റെ രണ്ടു പെൺ മക്കളെ വളർത്തുന്നതിൽ ഏറെ ശ്രദ്ധാലുവായ ടോം ക്രൂസ് പക്ഷെ അവർക്ക് ഏറെ സ്വാതന്ത്ര്യം അനുവദിക്കുന്നു എന്നാണ് കാതിയുടെ പരാതി. തന്റെ മകളെ കൂടുതൽ നിയന്ത്രണത്തോടെ വളർത്തണം എന്നതിനാലാണ് താൻ ബന്ധം വേർപെടുത്തുന്നത് എന്ന് അവർ വ്യക്തമാക്കി.
