ന്യൂഡല്ഹി : കാശ്മീരിലെ വിവിധ ജന വിഭാഗങ്ങളുമായി അഭിപ്രായ സമന്വയത്തില് എത്താം എന്ന പ്രതീക്ഷയുമായാണ് കേന്ദ്ര സര്ക്കാര് ഇന്ന് സര്വ കക്ഷി യോഗം ചേരുന്നത്. സായുധ സേനാ പ്രത്യേക അധികാര നിയമം (Armed Forces Special Powers Act – AFSPA) ഭേദഗതി ചെയ്തു സൈന്യത്തിന്റെ അധികാരങ്ങള്ക്ക് കടിഞ്ഞാണ് ഇടുന്നത് മാത്രമാവില്ല ഇന്നത്തെ സര്വ കക്ഷി യോഗത്തിലെ ചര്ച്ചാ വിഷയം എന്നാണ് കരുതപ്പെടുന്നത്. വിവിധ വിഭാഗങ്ങളുമായി ഫലപ്രദമായ ചര്ച്ചകള് തുടങ്ങി വെയ്ക്കുക എന്ന ലക്ഷ്യമാണ് സര്ക്കാരിന് മുന്നില് പ്രധാനമായി ഉണ്ടാവുക. കാശ്മീര് പ്രശ്നത്തിന് മാന്യമായ ഒരു ശാശ്വത പരിഹാരത്തിന് ചര്ച്ച മാത്രമാണ് ഫലപ്രദം എന്ന കാബിനറ്റ് സുരക്ഷാ സമിതിയുടെ നിരീക്ഷണത്തിനാവും ഇന്നത്തെ യോഗത്തില് മുന്തൂക്കം ലഭിക്കുക.
ബാംഗ്ലൂര് : ബാംഗ്ലൂര് സ്ഫോടന കേസില് പ്രതിയായ പി. ഡി. പി. നേതാവ് അബ്ദുല് നാസര് മഅദനിയുടെ ജാമ്യാപേക്ഷ ബാംഗ്ലൂര് കോടതി തള്ളി. അതീവ ഗുരുതരമായ കേസാണിത് എന്ന് പബ്ലിക് പ്രോസിക്യൂട്ടര് പറയുന്നു. തീവ്രവാദ സ്വഭാവമുള്ള ഇത്തരം കേസുകളില് കോടതിക്ക് കുറ്റകൃത്യത്തിന്റെ സ്വഭാവവും ഗൌരവവും കണക്കിലെടുത്തേ മതിയാവൂ എന്നും അദ്ദേഹം ചൂണ്ടിക്കാട്ടി.
ഗുജറാത്ത് : തീവ്രവാദത്തിനു കാവിയുടെ നിറം നല്കിയ കേന്ദ്ര ആഭ്യന്തര മന്ത്രി കാശ്മീരില് നടക്കുന്ന തീവ്രവാദത്തിന്റെ നിറം എന്തെന്ന് വിശദീകരി ക്കണമെന്ന് ഗുജറാത്ത് മുഖ്യമന്ത്രി നരേന്ദ്ര മോഡി ആവശ്യപ്പെട്ടു. ബി. ജെ.പിയുടെ യുവജന വിഭാഗത്തിന്റെ ഒരു സെമിനാറില് സംസാരിക്കുമ്പോളാണ് മോഡി ഇക്കാര്യം ഉന്നയിച്ചത്. കാശ്മീരി പണ്ഡിറ്റുകള്ക്ക് നേരെ ഉള്ള ഭീകരതയുടെ നിറമെന്താണ്, കാശ്മീര് ജനത നേരിടുന്ന ഭീകരതയുടെ നിറമെന്താണ് തുടങ്ങിയ ചോദ്യങ്ങള് മോഡി ഉന്നയിച്ചു.
