ന്യൂഡല്ഹി : കോമണ്വെല്ത്ത് ഗെയിംസുമായി ബന്ധപ്പെട്ടു ഉയര്ന്നു വന്ന അഴിമതി ആരോപണങ്ങളുടെ പേരില് ഗെയിംസിന്റെ സംഘാടക സമിതി ചെയര്മാന് സുരേഷ് കല്മാഡിക്കെതിരെ സര്ക്കാര് നടപടി എടുക്കാന് നിര്ബന്ധിതമാകും എന്ന് സൂചന. എന്നാല് ഗെയിംസുമായി ബന്ധപ്പെട്ടു അഴിമതി ആരോപണം പരസ്യമായാല് ഉണ്ടാവുന്ന നാണക്കേട് ഒഴിവാക്കാന് ഗെയിംസ് തീരും വരെ കോണ്ഗ്രസ് നേതൃത്വം കാത്തിരിക്കാനാണ് സാധ്യത.
ബ്രിട്ടീഷ് കമ്പനിയായ എ. എം. ഫിലിംസിനു രണ്ടര ലക്ഷം പൌണ്ട് അധികം നല്കിയത് എന്തിനാണെന്ന ചോദ്യത്തിന് ഇത് വരെ കല്മാഡി വ്യക്തമായ ഉത്തരം നല്കിയിട്ടില്ല. ഇത് കൂടാതെ വ്യായാമ ഉപകരണങ്ങള്, എയര് കണ്ടീഷണറുകള്, ഫ്രിഡ്ജുകള് എന്നിങ്ങനെ ഒട്ടനവധി സാധന സാമഗ്രികള് വാങ്ങിയതിലും വന് തോതില് ക്രമക്കേട് നടന്നതായി ആരോപണമുണ്ട്. കല്മാഡിയുടെ വലം കൈയ്യായ ടി. എസ്. ദര്ബാരിയെ എക്സിക്യൂട്ടിവ് ബോര്ഡില് നിന്നും പുറത്താക്കാനുള്ള സ്പോര്ട്ട്സ് സെക്രട്ടറിയുടെ നിര്ദ്ദേശം നടപ്പിലാക്കാന് ഇത് വരെ കല്മാഡി അനുവാദം നല്കിയിട്ടുമില്ല.
അഴിമതി നടത്തിയതിനു പ്രതിഫലമായി ദര്ബാരി 28 ലക്ഷം രൂപയ്ക്കുള്ള വജ്രങ്ങള് യു.എ.ഇ. വഴി ഇന്ത്യയിലേക്ക് കടത്തിയതായും ആരോപണമുണ്ട്.
ഗാന്ധിനഗര് : കഴിഞ്ഞ ഏതാനും ദിവസങ്ങളായി ഒളിവില് ആയിരുന്ന മുന് ഗുജറാത്ത് ആഭ്യന്തര മന്ത്രി അമിത് ഷാ പോലീസിനു കീഴടങ്ങി. ഇന്ന് രാവിലെ പതിനൊന്നര മണിയ്ക്കാണ് ഇയാള് അഹമ്മദാബാദിലെ ബി.ജെ.പി. ഓഫീസില് പ്രത്യക്ഷപ്പെട്ടത്. തന്റെ മേല് ആരോപിച്ച കുറ്റങ്ങള് നിഷേധിച്ച അമിത് മാധ്യമ പ്രവര്ത്തകരെ അഭിമുഖീകരിക്കുകയും ചെയ്തു. തുടര്ന്ന് ഇയാള് ഗാന്ധി നഗറിലെ സി. ബി. ഐ. ഓഫീസില് എത്തി സി. ബി. ഐ. ക്ക് മുന്പില് കീഴടങ്ങി. ഔദ്യോഗികമായി അറസ്റ്റ് രേഖപ്പെടുത്തിയതിനു ശേഷം ഇയാളെ സി. ബി. ഐ. ജഡ്ജിക്ക് മുന്പില് ഹാജരാക്കിയെങ്കിലും സി. ബി. ഐ. ഇയാളുടെ കസ്റ്റഡി ആവശ്യപ്പെടാഞ്ഞതിനാല് കോടതി ഇയാളെ ജുഡീഷ്യല് കസ്റ്റഡിയില് വിടുകയാണ് ഉണ്ടായത്.
ന്യൂഡല്ഹി : സി. ബി. ഐ. തിരയുന്ന കുറ്റവാളിയും മുന് ഗുജറാത്ത് ആഭ്യന്തര മന്ത്രിയുമായ അമിത് ഷാ നിരപരാധി യാണെന്ന് ഗുജറാത്ത് മുഖ്യ മന്ത്രി നരേന്ദ്ര മോഡി. അമിത് ഷാ രാജ്യത്തെ നിയമ വ്യവസ്ഥയെ മാനിക്കുന്ന വ്യക്തിയാണ്. (ഇയാള് ഇപ്പോഴും ഒളിവിലാണ്) അമിത് ഭായ് നിരപരാധിയാണ്. സി. ബി. ഐ. അദ്ദേഹത്തിനെതിരെ ചുമത്തിയിരിക്കുന്ന കുറ്റങ്ങള് എല്ലാം കെട്ടിച്ചമച്ചതാണ് എന്നും മോഡി പറഞ്ഞു.
അഹമ്മദാബാദ് : ഗുജറാത്ത് ആഭ്യന്തര മന്ത്രി അമിത് ഷായ്ക്കെതിരെ സി. ബി. ഐ. കുറ്റപത്രം സമര്പ്പിക്കുകയും, ഷായുടെ മുന്കൂര് ജാമ്യാപേക്ഷ സി. ബി. ഐ. പ്രത്യേക കോടതി തള്ളുകയും ചെയ്ത സാഹചര്യത്തില് അമിത് ഷായെ ഉടന് തന്നെ അറസ്റ്റ് ചെയ്യുവാനുള്ള സാധ്യത വര്ധിച്ചു. ഗുജറാത്ത് മുഖ്യ മന്ത്രി നരേന്ദ്ര മോഡിയുടെ വലം കൈയ്യായ ഷാ രണ്ടു തവണ സമന്സ് അയച്ചു വിളിപ്പിച്ചിട്ടും സി. ബി. ഐ. ക്ക് മുന്പില് ഹാജരാവാന് കൂട്ടാക്കിയിരുന്നില്ല. കഴിഞ്ഞ ഏതാനും ദിവസങ്ങളായി ഇയാള് ഒളിവിലാണ്.
ദുബായ് : മലയാളി എന്ജിനിയര് സാംദീപ് മോഹന് വര്ഗ്ഗീസിനെ പഞ്ചാബ് പോലീസ് വേട്ടയാടുന്നത് സംബന്ധിച്ച വാര്ത്തകള് പത്രങ്ങളില് വന്നതിനെ തുടര്ന്ന് തന്നെ ചില രാഷ്ട്രീയ നേതാക്കളും മറ്റും ബന്ധപ്പെടുകയുണ്ടായി എന്ന് സാംദീപ് e പത്രത്തോട് വെളിപ്പെടുത്തി. പഞ്ചാബില് നിന്നുമുള്ള എം.പി. യും, യൂത്ത് കോണ്ഗ്രസ് മുന് പ്രസിഡണ്ടും ഇപ്പോള് കോണ്ഗ്രസ് വക്താവുമായ മനീഷ് തിവാരി ഇന്ന് രാവിലെ തന്നെ ഫോണില് വിളിക്കുകയും പ്രശ്നത്തില് ഉടന് തന്നെ പരിഹാരം കാണാന് വേണ്ടത് ചെയ്യും എന്ന് ഉറപ്പു തന്നു എന്നും സാംദീപ് അറിയിച്ചു.
