ന്യൂഡല്ഹി : 2 ജി സ്പെക്ട്രം അഴിമതി വിവാദത്തില് കുരുങ്ങിയ കേന്ദ്ര ടെലികോം മന്ത്രി എ. രാജ രാജി വെച്ചു. എന്നാല് രാജി മാത്രം പോര എന്നും സംയുക്ത പാര്ലമെന്ററി സമിതി സ്പെക്ട്രം കുംഭകോണം അന്വേഷിക്കണം എന്നും ആവശ്യപ്പെട്ട് പ്രതിപക്ഷം പാര്ലമെന്റിലെ ഇരു സഭകളും സ്തംഭിപ്പിച്ചു. സര്ക്കാരിന് 1.76 ലക്ഷം കോടി രൂപയുടെ നഷ്ടമാണ് ഈ അഴിമതി മൂലം സംഭവിച്ചത് എന്നും അതിനാല് തുടര് നടപടികള് ഉണ്ടായില്ലെങ്കില് രാജി വെറും പ്രഹസനമാകും എന്നും പ്രതിപക്ഷം ചൂണ്ടിക്കാട്ടി. വിവാദ ഡി. എം. കെ. മന്ത്രി രാജയെ ഉടന് അറസ്റ്റ് ചെയ്യണം എന്ന് എ. ഐ. എ. ഡി. എം. കെ നേതാവ് ജയലളിത ആവശ്യപ്പെട്ടിട്ടുണ്ട്.
ന്യൂഡല്ഹി : കോമണ്വെല്ത്ത് ഗെയിംസുമായി ബന്ധപ്പെട്ട് ഉയര്ന്ന അഴിമതി ആരോപണങ്ങളെ കുറിച്ചുള്ള അന്വേഷണം സി. ബി. ഐ. ഏറ്റെടുത്തു. സി. ബി. ഐ. യുടെ അഴിമതി വിരുദ്ധ ശാഖയിലെ ഒരു സംഘം ഉദ്യോഗസ്ഥന്മാര് ഇന്നലെ സംഘാടക സമിതി ഓഫീസില് എത്തി ഖ്വീന്സ് ബാറ്റണ് റിലേ ഇടപാടുമായി ബന്ധപ്പെട്ട രേഖകള് ഒന്നടങ്കം കൈവശപ്പെടുത്തി. 
