ഹൈദരാബാദ്: നാനോ എക്സല്‍ തട്ടിപ്പു കേസില്‍ കമ്പനിയുടെ എം. ഡി. ഹരീഷ് മദനീനി ഹൈദരാബാദില്‍ അറസ്റ്റിലായി. ഇയാള്‍ക്കെതിരെ പോലീസ് ലുക്കൌട്ട് നോട്ടീസ് പുറപ്പെടുവിച്ചിരുന്നു. മണി ചെയിന്‍ രീതിയില്‍ വിവിധ ഉല്പന്നങ്ങള്‍ വിറ്റു വന്‍ തോതില്‍ കമ്പനി പണം തട്ടിയതായി ആരോപണമുണ്ട്. ഇതു സംബന്ധിച്ച് കേരളത്തില്‍ നിരവധി ഇടങ്ങളില്‍ കമ്പനിക്കെതിരെ പരാതികള്‍ പോലീസിനു ലഭിച്ചിരുന്നു. തൃശ്ശൂര്‍, വയനാട് ജില്ലകളിലാണ് ഏറ്റവും കൂടുതല്‍ കേസുകള്‍ ഉള്ളത്. കേരളത്തില്‍ നിന്നും നാനൂറു കോടിയിലധികം രൂപ ഇവര്‍ തട്ടിയെടുത്തതായി കരുതുന്നു. ആരോഗ്യ രക്ഷയ്ക്കായുള്ള ഉല്‍പ്പന്നങ്ങള്‍ ആണ് പ്രധാനമായും കമ്പനി മണി ചെയിന്‍ മാതൃകയില്‍ ആളുകളെ ചേര്‍ത്തി വിതരണം ചെയ്തിരുന്നത്. നാനോ എക്സല്‍ തട്ടിപ്പുമായി ബന്ധപ്പെട്ട് ഇദ്ദേഹത്തിന്റെ ഭാര്യയ്ക്കെതിരെയും കേസുണ്ട്. വില്പന നികുതി തട്ടിപ്പു നടത്തുവാന്‍ കമ്പനിയെ സഹായിച്ചതിന്റെ പേരില്‍ ടാക്സ് അസി. കമ്മീഷ്ണര്‍ നേരത്തെ അറസ്റ്റിലായിരുന്നു. മദനീനിയെ ഉടന്‍ കേരള പോലീസിനു കൈമാറും.
