തിരുവനന്തപുരം: പാര്ട്ടി കോണ്ഗ്രസിനു ശേഷം വി. എസ്. അച്യുതാനന്ദന് കൂടംകുളം സന്ദര്ശിക്കാന് ഒരുങ്ങുന്നതിനിടെ പാര്ട്ടിയുടെ തടയിടല്. തമിഴ്നാട്ടിലെ കൂടംകുളം ആണവ നിലയത്തിന് എതിരായ സമരത്തില് പങ്കെടുക്കുന്നതില് നിന്ന് വി.എസിനെ വിലക്കണമെന്ന തമിഴ്നാട് ഘടകത്തിന്റെ ആവശ്യപ്രകാരമാണ് കേന്ദ്രനേതൃത്വത്തില് നിന്നും ഈ തീരുമാനമെന്ന് അറിയുന്നു. കൂടംകുളം നിലയത്തിന് അനുകൂല നിലപാടാണ് സിപിഎം തമിഴ്നാട് ഘടകത്തിന്റേത്. ആണവ നിലയങ്ങളോട് സിപിഎമ്മിന് എതിര്പ്പാണെങ്കിലും കൂടംകുളം നിലയത്തോടുള്ള നിലപാട് ഇതുവരെ സിപിഎം വ്യക്തമാക്കാന് തയ്യാറായിട്ടില്ല. എന്നാല് കൂടംകുളം വിരുദ്ധ സമരക്കാര് തന്നെ സമരത്തില് നിന്ന് പിന്മാറിയ സാഹചര്യത്തില് താനിടപ്പെട്ട് സമരം വീണ്ടും കുത്തിപ്പൊക്കണോ എന്ന് കരുതിയാണ് കുടംകുളം സന്ദര്ശിക്കുന്നതില് നിന്ന് പിന്മാറുന്നതെന്ന് വി.എസിന്റെ ഓഫീസ് അറിയിച്ചു. മുമ്പ് മുല്ലപെരിയാര് വിഷയത്തില് തമിഴ്നാടിന് അനുകൂലമായ നിലപാട് സ്വീകരിച്ച സിപിഎം കേന്ദ്രനേതൃത്വത്തെ പരസ്യമായി വെല്ലുവിളിച്ചിരുന്നു. എന്നാല് കൂടംകുളം സമരത്തോട് ആഭിമുഖ്യം പുലര്ത്തുന്ന നിലപാടുമായി വിഎസ് മുന്നോട്ട് തന്നെയാണ് എന്നതിന് സൂചനയാണ് തിരുവനന്തപുരത്തെത്തിയ സ്വാമി അഗ്നിവേശുമായി വി.എസ് കൂടിക്കാഴ്ച. കൂടംകുളം സമരത്തില് സമാന ആഭിമുഖ്യമുള്ളവരെ ക്ഷണിക്കുന്നതിനായിരുന്നു അഗ്നിവേശിന്റെ വരവ്. ലത്തീന് രൂപതാ ആര്ച്ച് ബിഷപ് ഡോ.സൂസാപാക്യവുമായി അഗ്നിവേശ് കൂടിക്കാഴ്ച നടത്തിയിരുന്നു. വി എസിന്റെ ഈ നീക്കം പാര്ട്ടിക്ക് കൂടുതല് തലവേദന സൃഷ്ടിക്കും.
- ന്യൂസ് ഡെസ്ക്
അനുബന്ധ വാര്ത്തകള്
വായിക്കുക: കേരള രാഷ്ട്രീയം, കേരള രാഷ്ട്രീയ നേതാക്കള്, പ്രതിരോധം
