കൊച്ചി: ചികിത്സാര്‍ഥം ഇന്ത്യയില്‍ തുടരാന്‍ അനുവദിക്കണമെന്ന ഇസ്രയേലി എഴുത്തുകാരി സൂസന്‍ നദാനിന്റെ അപ്പീലില്‍ വിധിപറയുന്നത് ഹൈക്കോടതി മാറ്റി വച്ചു. വിസാകാലാവധി കഴിയുന്നതോടെ ഇവര്‍ ഇന്ത്യ വിടണമെന്ന് അധികൃതര്‍ നോട്ടീസ് നല്‍കിയിരുന്നു. ഇതിനെ തുടര്‍ന്നാണ് സൂസണ്‍ ഹൈക്കോടതിയെ സമീപിച്ചത്. എന്‍.ഡി.എഫ്, സിമി പോലുള്ള ചില സംഘടനകളുമായി ഇവര്‍ക്ക് ബന്ധമുണ്ടെന്ന് സര്‍ക്കാര്‍ കോടതിയില്‍ ബോധിപ്പിച്ചു. വിസ അനുവദിച്ചപ്പോള്‍ പറഞ്ഞിട്ടുള്ള കാര്യങ്ങളില്‍ നിന്നും വ്യതിചലിച്ചു കൊണ്ട് സൂസന്‍ പ്രവര്‍ത്തിക്കുന്നതായി സര്‍ക്കാര്‍ വാദിച്ചു. പാലിയേറ്റീവ് കെയറുമായി ബന്ധപ്പെട്ട് പ്രവര്‍ത്തിക്കുവാന്‍ താല്പര്യം പ്രകടിപ്പിച്ചിരുന്ന ഇവര്‍ അതുമായി ബന്ധപ്പെട്ട് ഒരു കേന്ദ്രത്തിലും ഇവര്‍ പോയിട്ടില്ലെന്നായിരുന്നു കോടതിയുടെ ചോദ്യത്തിനു മറുപടിയായി പറഞ്ഞത്. എന്നാല്‍ മറ്റു ചില സമ്മേളനങ്ങളില്‍ ഇവര്‍ പങ്കെടുത്തതായും റിപ്പോര്‍ട്ടുണ്ട്. ഇവരുടെ വിസാ ദീര്‍ഘിപ്പിക്കുവാനുള്ള അപേക്ഷ കേന്ദ്ര ആഭ്യന്തര വകുപ്പിന്റെ പരിഗണനയിലാണ്. മലയാളത്തിലെ ചില മാധ്യമങ്ങളില്‍ സൂസന്‍ ലേഖനങ്ങള്‍ എഴുതിയിരുന്നു. ഇവരുടെ ‘ദ അദര്‍ സൈഡ് ഓഫ് ഇസ്രായേല്‍‘ എന്ന ഇവരുടെ പുസ്തകം മലയാളത്തില്‍ തര്‍ജ്ജമ ചെയ്യപ്പെട്ടിട്ടുണ്ട്.
