പോണ്ടിച്ചേരി : റോഡ് നികുതിയിനത്തിൽ 20 ലക്ഷത്തിന്റെ നികുതി വെട്ടിപ്പ് നടത്തിയതിന്റെ പേരിൽ പ്രശസ്ത സിനിമാതാരം അമലാ പോളിനെതിരെ അന്വേഷണം. അമലയുടെ പുതിയ ബെൻസ് കാർ രജിസ്റ്റർ ചെയ്തിരിക്കുന്നത് അവരെ നേരിട്ട് അറിയുക പോലും ചെയ്യാത്ത പോണ്ടിച്ചേരിയിലുള്ള ഒരു എഞ്ചിനീയറിങ്ങ് വിദ്യാർഥിയുടെ പേരിലാണെന്ന് വ്യക്തമായി.
ഒരു കോടി 12 ലക്ഷം രൂപ വിലയുള്ള മെർസിഡിസ് എ ക്ലാസ്സ് ബെൻസ് കേരളത്തിൽ രജിസ്റ്റർ ചെയ്യണമെങ്കിൽ നികുതിയിനത്തിൽ 20 ലക്ഷം അടക്കണമെന്ന സാഹചര്യത്തിൽ വ്യാജ വിലാസം ഉപയോഗിച്ച് വെറും ഒന്നേകാൽ ലക്ഷം രൂപയ്ക്ക് പോണ്ടിച്ചേരിയിൽ വെച്ച് രജിസ്റ്റർ ചെയ്യുകയായിരുന്നു. ഏഴു വർഷം വരെ തടവ് ലഭിക്കാവുന്ന ശിക്ഷയാണിത്. പോണ്ടിച്ചേരിയിലാണ് രജിസ്റ്റർ ചെയ്തതെങ്കിലും ബെൻസ് ഓടുന്നത് കൊച്ചി ഇടപ്പള്ളിയിലാണ്.
