കൊച്ചി: മുന് മന്ത്രിയും ജനതാ ദള് സെക്യുലര് എം.എല്.എയുമായ ജോസ് തെറ്റയിലിനും മകനുമെതിരെ ലൈംഗിക പീഡനം ആരോപിച്ച് യുവതി പരാതി നല്കി. പരാതിയ്ക്കൊപ്പം തെളിവായി എം.എല്.എയും യുവതിയും തമ്മില് ഇടപഴകുന്ന ദൃശ്യങ്ങളും നല്കി. എം.എല്.എയുട മകനുമായി വിവാഹം ഉറപ്പിച്ചിരുന്നതായും എം.എല്.എയുടെ മകന് തന്നെ ലൈംഗികമായി പീഡിപ്പിച്ചു വെന്നും പിന്നീട് എം.എല്.എയും തന്നെ പീഡിപ്പിച്ചതായുമാണ് യുവതി പരാതിയില് പറയുന്നത്. വിവാഹ വാഗ്ദാനത്തില് നിന്നും പിന്മാറിയതോടെ യുവതി എം.എല്.എയുമായി ഫ്ലാറ്റില് വച്ച് ബന്ധപ്പെടുന്നതിന്റെ ദൃശ്യങ്ങള് വെബ്ക്യാം വഴി പകര്ത്തുകയായിരുന്നു എന്ന് പറയുന്നു. അങ്കമാലി മഞ്ഞപ്ര സ്വദേശിനിയായ യുവതിയാണ് ആലുവ റൂറല് എസ്പിക്ക് പരാതി നല്കിയത്.
ഒരു സ്വകാര്യ ചാനല് യുവതിയുടെ പരാതിയും ഒളിക്യാമറ ദൃശ്യങ്ങളും പുറത്ത് വിട്ടതിനെ തുടര്ന്ന് ജോസ് തെറ്റയിലിന്റെ രാജി ആവശ്യപ്പെട്ട് വിവിധ യുവജന സംഘടനകള് പ്രകടനം നടത്തി.എന്നാല് ആരോപണം രാഷ്ടീയ ഗൂഢാലോചനയാണെന്നും യുവതി കമ്പ്യൂട്ടര് വിദഗ്ദയായതിനാല് മോര്ഫ് ചെയ്ത് നിര്മ്മിച്ചതാണെന്നും തെറ്റയില് പറഞ്ഞു. യുവതിയെ അറിയാമെന്നും എന്നാല് മകനുമായി വിവാഹം ഉറപ്പിച്ചിട്ടില്ലെന്നും അദ്ദേഹം പ്രതികരിച്ചു.
ലൈംഗിക ആരോപണം ഉയര്ന്ന സാഹചര്യത്തില് തെറ്റയില് രാജിവെക്കണമെന്ന് എല്.ഡി.എഫിലും ആവശ്യം ഉയര്ന്നു. എം.എല്.എ സ്ഥാനം രാജിവെച്ചാല് അറസ്റ്റ് ഉണ്ടാകും എന്ന് കരുതി തെറ്റയില് മുന്കൂര് ജാമ്യത്തിനു ശ്രമിക്കുന്നതായും സൂചനയുണ്ട്.
