തിരുവനന്തപുരം : പി. എസ്. സി. നിയമനത്തിന് അപേക്ഷിക്കുവാനുള്ള പ്രായ പരിധി 40 വയസ്സ് ആക്കി ഉയർത്തുവാൻ മന്ത്രി സഭാ യോഗം തീരുമാനിച്ചു. നിലവിലെ പ്രായ പരിധിയിൽ (36) നിന്നും നാല് വർഷത്തെ വർദ്ധനവ് ആണിത്. ജനറൽ വിഭാഗത്തിന് അപേക്ഷിക്കാനുള്ള പ്രായപരിധിയാണ് 36 ൽ നിന്ന് 40 ആക്കിയത്.
പെൻഷൻ പ്രായം 55 ൽ നിന്ന് 56 ആക്കിയപ്പോൾ പി. എസ്. സി.ക്ക് അപേക്ഷിക്കാനുള്ള പ്രായപരിധി 35 ൽ നിന്ന് 36 ആക്കിയിരുന്നു.
പട്ടിക ജാതി, പട്ടിക വർഗ്ഗ വിഭാഗങ്ങൾക്ക് 45 വയസ്സു വരെയും മറ്റ് സംവരണ (ഓ. ബി. സി.) വിഭാഗക്കാർക്ക് 43 വയസ്സു വരെയും അപേക്ഷിക്കാം. നിലവിൽ ഈ വിഭാഗങ്ങളുടെ പ്രായപരിധി യഥാക്രമം 41, 39 എന്നിങ്ങനെയായിരുന്നു.
യൂണിഫോം തസ്തികകളിലേക്ക് അപേക്ഷിക്കാനുള്ള പ്രായ പരിധി നാല് വയസ്സു കൂടി വർദ്ധിപ്പിക്കും. ഇത് സംബന്ധിച്ച് വിശദമായ വിജ്ഞാപനം ഉടൻ പുറത്തിറക്കും.
തിരുവനന്തപുരം : സംസ്ഥാനത്തെ എയ്ഡഡ് സ്കൂളു കളിലെ അദ്ധ്യാപക / അനദ്ധ്യാപക നിയമനങ്ങളിൽ പരിഗണിക്കുന്നതിന് വേണ്ടി നാളിതു വരെ പേര് രജിസ്റ്റർ ചെയ്തിട്ടില്ലാത്ത ഭിന്ന ശേഷി വിഭാഗത്തിൽപ്പെട്ട ഉദ്യോഗാർത്ഥികൾ മതിയായ യോഗ്യത തെളിയിക്കുന്ന രേഖകളുടെ ഒറിജിനലുകൾ സഹിതം ബന്ധപ്പെട്ട എംപ്ലോയ്മെന്റ് എക്സ്ചേഞ്ചുകളിൽ ഹാജരായി രജിസ്ട്രേഷൻ നടത്തണം. 
