- ലിജി അരുണ്
വായിക്കുക: കുട്ടികള്, വിദ്യാഭ്യാസം
ഭോപ്പാല് : മധ്യപ്രദേശ് സര്ക്കാര് സ്ക്കൂളുകളില് സൂര്യനമസ്ക്കാരം എന്ന യോഗാസനം കുട്ടികളെ പരിശീലിപ്പിക്കുന്നത് സംബന്ധിച്ച വിവാദം രൂക്ഷമാകുന്നു. ഒരു വശത്ത് നഗരത്തിലെ ഖാസി സൂര്യനമസ്ക്കാരം ചെയ്യുന്നതിന് എതിരെ ഫത്വ പുറപ്പെടുവിച്ചപ്പോള് മറുഭാഗത്ത് സര്ക്കാര് പരമാവധി വിദ്യാര്ത്ഥികളെ പങ്കെടുപ്പിച്ചു കൊണ്ട് ലോക റിക്കാര്ഡ് സ്ഥാപിക്കാനുള്ള ശ്രമത്തിലാണ്.
സൂര്യനമസ്ക്കാരം എല്ലാ വിദ്യാര്ത്ഥികളും നിര്ബന്ധമായി ചെയ്യണം എന്നൊന്നും സര്ക്കാര് നിഷ്കര്ഷിച്ചിട്ടില്ല. എന്നാല് സര്ക്കാര് വിദ്യാഭ്യാസ രംഗത്തെ കാവി പുതപ്പിക്കാന് ശ്രമിക്കുകയാണ് എന്നും വിദ്യാര്ത്ഥികളെ വര്ഗ്ഗീയമായി വിഭജിക്കുകയാണ് എന്നും കോണ്ഗ്രസ് നയിക്കുന്ന പ്രതിപക്ഷം ആരോപിക്കുന്നു.
സൂര്യന് കാവി നിറമോ പച്ച നിറമോ അല്ലെന്നും ആരോഗ്യവും ഏകാഗ്രതയും വര്ദ്ധിപ്പിക്കുന്നതിനുള്ള ഒരു വ്യായാമ മുറ മാത്രമാണ് സൂര്യനമസ്ക്കാരം എന്നുമാണ് അധികൃതരുടെ പക്ഷം. ഇത് താല്പര്യമില്ലാത്തവര് ചെയ്യണം എന്ന് നിര്ബന്ധവുമില്ല.
എന്നാല് സൂര്യനെ നമസ്ക്കരിക്കുന്നത് വിഗ്രഹ ആരാധനയ്ക്ക് തുല്യമാണ് എന്നാണ് ഇതിനെതിരെ ഫത്വ ഇറക്കിയ ഖാസി പറയുന്നത്.
സംസ്ഥാനം ഭരിക്കുന്ന ബി.ജെ.പി. സര്ക്കാര് ആര്. എസ്. എസിന്റെ അജന്ഡ നടപ്പിലാക്കുകയാണ് എന്ന് കോണ്ഗ്രസ് ആരോപിക്കുന്നു. കഴിഞ്ഞ വര്ഷം പാഠ്യ പദ്ധതിയില് ഭഗവദ് ഗീതയില് നിന്നുമുള്ള ചില ഭാഗങ്ങള് സര്ക്കാര് ഉള്പ്പെടുത്തിയത് ഏറെ വിമര്ശന വിധേയമായിരുന്നു. കേന്ദ്ര സര്ക്കാര് ഫണ്ട് ഉപയോഗിച്ച് ആര്. എസ്. എസ്. പ്രസിദ്ധീകരണമായ “ദേവ് പുത്ര” എന്ന മാസിക സര്ക്കാര് സ്ക്കൂളുകളില് വിതരണം ചെയ്തതും ഏറെ ഒച്ചപ്പാട് ഉണ്ടാക്കിയിരുന്നു.
- ജെ.എസ്.
വായിക്കുക: ആരോഗ്യം, ഇന്ത്യന് രാഷ്ട്രീയം, കുട്ടികള്, തീവ്രവാദം, മതം, വിദ്യാഭ്യാസം, വിവാദം
മുംബൈ : 4 മിനിട്ടില് 5 വയസില് താഴെ പ്രായമുള്ള ഒരു കുഞ്ഞു വീതം ഇന്ത്യയില് ന്യൂമോണിയ പോലുള്ള ഒഴിവാക്കാവുന്ന അസുഖങ്ങള് മൂലം മരണമടയുന്നു എന്നാണ് കണക്ക്. പ്രതിരോധ മരുന്നുകള് ലഭ്യമാക്കാത്തത് മൂലമാണ് ഇത് എന്ന് അന്താരാഷ്ട്ര ഏജന്സികള് കുറ്റപ്പെടുത്തുന്നു. എന്നാല് ന്യൂമോണിയ മൂലം പ്രതിവര്ഷം മരിക്കുന്ന 3.71 ലക്ഷം കുട്ടികളുടെ ജീവന് രക്ഷിക്കാന് കേവലം പ്രതിരോധ മരുന്ന് മാത്രമാണോ വഴി? അല്ലെന്ന് ആരോഗ്യ രംഗത്തെ വിദഗ്ദ്ധര് അറിയിക്കുന്നു. ശുചിത്വമുള്ള ജീവിത സാഹചര്യങ്ങള് തന്നെയാണ് ന്യൂമോണിയ തടയാന് ഏറ്റവും ആവശ്യം എന്ന് ഇവര് ചൂണ്ടിക്കാട്ടുന്നു.
വികസ്വര രാജ്യങ്ങളില് മുഴുവന് പ്രതിരോധ കുത്തിവെപ്പ് നടത്താന് ശുപാര്ശ ചെയ്യുന്ന അന്താരാഷ്ട്ര ഏജന്സികള് പക്ഷെ പ്രതിരോധ വാക്സിന്റെ വില കുറയ്ക്കുവാന് കൂടി നടപടികള് സ്വീകരിക്കണം എന്ന് ഡോക്ടര്മാര് പറയുന്നു. 4 ബൂസ്റ്റര് കുത്തിവെപ്പുകള് കൂടിയാവുമ്പോള് ന്യൂമോനിയയുടെ പ്രതിരോധത്തിനുള്ള ചിലവ് 16000 രൂപയാവും. സമൂഹത്തിലെ ഒരു ചെറിയ വിഭാഗത്തിന് മാത്രമേ ഇത് താങ്ങാനാവൂ എന്നതാണ് ഇന്ത്യയില് നിലവിലുള്ള അവസ്ഥ. എയിഡ്സ് മരുന്നിന് വില കുറച്ചത് പോലെ പ്രതിരോധ കുത്തിവെപ്പുകളുടെ വിളകള് കൂടി കുറയ്ക്കണം എന്ന് ആരോഗ്യ രംഗത്തെ വിദഗ്ദ്ധര് ആവശ്യപ്പെടുന്നു.
- ജെ.എസ്.
വായിക്കുക: ആരോഗ്യം, കുട്ടികള്
ന്യൂഡല്ഹി : 15 സെക്കണ്ടില് ഒരു കുട്ടി വീതം ഇന്ത്യയില് വയറിളക്കം പോലുള്ള ഒഴിവാക്കാവുന്ന രോഗങ്ങള് മൂലം മരണമടയുന്നു. പോഷകാഹാര കുറവ് മൂലം കുട്ടികളുടെ രോഗ പ്രതിരോധ ശേഷി കുറയുന്നത് കൊണ്ടാണ് ഇത്തരം അസുഖങ്ങള് വര്ദ്ധിക്കുന്നത് എന്ന് ആരോഗ്യ വിദഗ്ദ്ധര് ചൂണ്ടിക്കാണിക്കുന്നു. രാജ്യത്തിന്റെ തലസ്ഥാനത്തെ കുട്ടികളുടെ കാര്യവും മറ്റിടങ്ങളില് നിന്നും വ്യത്യസ്തമല്ല എന്ന് കുട്ടികളുടെ അവകാശങ്ങള്ക്ക് വേണ്ടി പ്രവര്ത്തിക്കുന്ന സംഘടനയായ ക്രൈ (CRY – Child Rights and You) നടത്തിയ സര്വേയില് വെളിപ്പെട്ടു. അമ്പതു ശതമാനത്തില് അധികം കുട്ടികള്ക്ക് ഇവര് പോഷകാഹാര കുറവ് കണ്ടെത്തി. പോഷകാഹാര കുറവും പട്ടിണിയും കാരണം കുട്ടികളുടെ രോഗ ടി]പ്രതിരോധ ശേഷി കുറയുകയും അവര്ക്ക് വയറിളക്കം, മലേറിയ എന്നിങ്ങനെയുള്ള രോഗങ്ങള് പിടിക്കുകയും ചെയ്യുന്നു. യഥാര്ത്ഥത്തില് കുട്ടികളുടെ മരണ കാരണം ഈ രോഗങ്ങളല്ല, മറിച്ചു ഈ രോഗങ്ങള് പിടികൂടാന് കാരണമാവുന്ന പോഷകാഹാര കുറവാണ് എന്ന് ഇവര് വിശദീകരിക്കുന്നു.
ശുചിത്വമില്ലാത്ത ജീവിത സാഹചര്യങ്ങളാണ് പലപ്പോഴും രോഗഹേതുവെങ്കിലും രോഗ പ്രതിരോധ ശേഷി കുറയുന്നതോടെ കുട്ടികള് രോഗബാധിതരാകുന്നു. മിക്ക വീടുകളുടെയും പരിസരത്ത് പഴകിയ ഭക്ഷണവും മറ്റു മാലിന്യങ്ങളും കിടക്കുന്നു. അഴുക്ക് ചാലുകള് ഒഴുകുന്നു. ഭക്ഷണം പാകം ചെയ്യുന്നതിന് മുന്പ് അമ്മമാര് കൈ സോപ്പ് ഉപയോഗിച്ച് കഴുകുക എന്ന ശീലം സ്വായത്തമാക്കിയാല് തന്നെ അതിസാരം പോലുള്ള രോഗങ്ങള് ഒരു വലിയ പരിധി വരെ നിയന്ത്രിക്കാന് സാധിക്കും എന്ന് യുനിസെഫ് പറയുന്നത് ശ്രദ്ധേയമാണ്. ആഹാരത്തിന് മുന്പ് കൈ കഴുകുവാനും കുട്ടികളെ പരിശീലിപ്പിക്കണം. പ്രതിദിനം ഇന്ത്യയില് 1000 കുട്ടികളാണ് വയറിളക്കം മാത്രം ബാധിച്ച് മരിക്കുന്നത് എന്ന് അറിയുമ്പോള് ഈ ശുചിത്വ ശീലങ്ങളുടെ പ്രാധാന്യം മനസിലാവും.
- ജെ.എസ്.
വായിക്കുക: ആരോഗ്യം, കുട്ടികള്
ജുനാഗഡ് : രക്തം മാറ്റി വെച്ചത് മൂലം ഗുജറാത്തിലെ ജുനാഗഡ് സര്ക്കാര് ആശുപത്രിയില് 23 കുട്ടികള് എച്ച്. ഐ. വി. ബാധിതരായതായി കണ്ടെത്തി. 5 മുതല് 10 വയസു വരെ പ്രായമുള്ള തലസീമിയ രോഗികളായ കുട്ടികള്ക്കാണ് ഈ ദുരന്തം ഉണ്ടായത്. ആശുപത്രിയിലെ രക്ത ബാങ്കില് നിന്നുമാണ് എച്ച്. ഐ. വി. ബാധിത രക്തം കുട്ടികള്ക്ക് നല്കിയത്. രക്തത്തിനു എച്ച്. ഐ. വി. ബാധയുണ്ടോ എന്ന് മുന്കൂട്ടി പരിശോധിക്കാനുള്ള സംവിധാനം ഈ ആശുപത്രിയില് ഉണ്ടായിരുന്നില്ല. ആദ്യം തങ്ങളുടെ തെറ്റ് ആശുപത്രി അധികൃതര് സമ്മതിച്ചിരുന്നുവെങ്കിലും പിന്നീട് ഇവര് ഇത് തിരുത്തി. കുട്ടികള് നേരത്തേ എച്ച്. ഐ. വി. ബാധിതരായിരുന്നു എന്നാണ് ഇപ്പോള് ഡോക്ടര്മാര് പറയുന്നത്.
തലസീമിയ രോഗം ബാധിച്ച കുട്ടികള്ക്ക് പതിവായി ഇത്തരത്തില് രക്തം നല്കേണ്ടതുണ്ട്. നേരെതെയും പല തവണ ഇവര്ക്ക് ഈ ആശുപത്രിയില് നിന്നും രക്തം നല്കിയിട്ടുമുണ്ട്. എച്ച്. ഐ. വി. ബാധ പരിശോധിക്കാനുള്ള സംവിധാനം ഇല്ലാത്ത ഈ ആശുപത്രിയില് നിന്നും ഇനിയും എത്ര പേര്ക്ക് ഇത്തരത്തില് എച്ച്. ഐ. വി. ബാധ ഉണ്ടായിട്ടുണ്ട് എന്നത് ഉറപ്പാക്കാനാവില്ല എന്നത് ഏറെ ഭീതി ജനകമായ വസ്തുതയാണ്.
- ജെ.എസ്.
വായിക്കുക: ആരോഗ്യം, കുട്ടികള്, വൈദ്യശാസ്ത്രം