മുംബൈ: പ്രശസ്ത ബോളിവുഡ് താരം മനീഷ കൊയ്‌രാളയ്ക്ക് ക്യാന്‍സര്‍ ബാധയുണ്ടെന്ന് സംശയിക്കുന്നതായി റിപ്പോര്‍ട്ടുകള്‍. ശാരീരികാസ്വസ്ഥതകള്‍ കണ്ടതിനെ തുടര്‍ന്ന് 42 കാരിയായ മനീഷയെ മുംബൈയിലെ ജെയിസ് ലോക് ആശുപത്രിയില്‍ ബുധനാഴ്ച പ്രവേശിപ്പിച്ചു. വിദഗ്ദരായ ഡോക്ടര്‍മാരുടെ നിരീക്ഷണത്തില്‍ നടിയെ വിശദമായ വൈദ്യ പരിശോധനകള്‍ക്ക് വിധേയയാക്കിക്കൊണ്ടിരിക്കുകയാണ്. ആശുപത്രിയില്‍ മനീഷയെ പരിചരിക്കുവാന്‍ അമ്മ സുഷമയും ഉണ്ട്. നേപ്പാളിലായിരുന്ന നടി കഴിഞ്ഞ ദിവസമാണ് മുംബൈയില്‍ എത്തിയത്. തന്റെ അസുഖത്തെ കുറിച്ച് മനീഷ അറിഞ്ഞതായും അതിനെ പോസിറ്റീവായാണ് കാണുന്നതെന്നും സൂചനയുണ്ട്.
വിവാഹ മോചനത്തിനു ശേഷം നേപ്പാളിലെ വീട്ടില്‍ താമസിച്ചു വരികയായിരുന്നു മനീഷ. അതിനിടയില്‍ ഏതാനും ആഴ്ചകള്‍ക്ക് മുമ്പ് ഭക്ഷ്യ വിഷബാധയെ തുടര്‍ന്ന് നടിയെ ആശുപത്രിയില്‍ പ്രവേശിപ്പിച്ചിരുന്നു. നേപ്പാളിലെ രാജകുടുമ്പാംഗമായ മനീഷ 1991-ല്‍ സുഭാഷ് ഗായ് സംവിധാനം ചെയ്ത് സൌധാഗറിലൂടെയാണ് വെള്ളിത്തിരയില്‍ എത്തിയത്. 1942 എ ലൌസ്റ്റോറി,അഗ്നി സാക്ഷി, അകേലെ ഹും അകേലെ റ്റും, ഖാമോഷി, ഗുപ്ത്, ദില്‍‌സേ, ഭൂത് തുടങ്ങിയ ഹിന്ദി ചിത്രങ്ങളും തമിഴില്‍ മണി രത്നം സംവിധാനം ചെയ്ത ബോബെ, കമല ഹാസന്‍ നായകനായ ഇന്ത്യന്‍, മുതല്‍‌വന്‍ തുടങ്ങി വന്‍ വിജയങ്ങളായ നിരവധി ചിത്രങ്ങളില്‍ നായികയായിട്ടുണ്ട്.
- എസ്. കുമാര്‍
