പാലക്കാട് : അഭ്യൂഹങ്ങള്‍ക്ക് വിരാമമിട്ടു കൊണ്ട് ഒടുവില്‍ യങ്ങ് സൂപ്പര്‍ സ്റ്റാര്‍ പൃഥ്വിരാജ് വിവാഹിതനായി. പാലക്കാട് സ്വദേശിനിയും മുംബൈയില്‍ മാധ്യമ പ്രവര്‍ത്തകയുമായ സുപ്രിയ മേനോന്‍ ആണ് വധു. പാലക്കാട്ടെ തേന്‍‌കുറിശ്ശി കണ്ടോത്ത് ഹെറിറ്റേജ് വില്ലയില്‍ ആയിരുന്നു വിവാഹം. അടുത്ത മാധ്യമ പ്രവര്‍ത്തകരെയും ആരാധകരേയും ഒഴിവാക്കാനായി അതീവ രഹസ്യമായിട്ടായിരുന്നു വിവാഹത്തിന്റെ ഒരുക്കങ്ങള്‍ നടത്തിയത്. അടുത്ത ബന്ധുക്കളെയും സുഹൃത്തുക്കളെയും മാത്രമേ ചടങ്ങില്‍ പങ്കെടുപ്പിച്ചുള്ളൂ. പൃഥ്വിരാജിന്റെ വിവാഹം മെയ് ഒന്നിനു നടക്കുമെന്ന് അമ്മയും നടിയുമായ മല്ലിക സുകുമാരന്‍ നേരത്തെ പറഞ്ഞിരുന്നു.
പൃഥ്വിരാജ് മുംബൈയിലെ ഒരു മാധ്യമ പ്രവര്‍ത്തകയുമായി പ്രണയത്തിലാണെന്നും വിവാഹം ഉടനെ ഉണ്ടാകുമെന്നും വാര്‍ത്തകള്‍ ഉണ്ടായിരുന്നു. എന്നാല്‍ ഒരു അവസരത്തില്‍ പൃഥ്വിരാജ് വിവാഹത്തെ കുറിച്ചുള്ള ഊഹാപോഹങ്ങളെ നിഷേധിക്കുകയും ചെയ്തിരുന്നു.
ബി. ബി. സി. വേള്‍ഡില്‍ മാധ്യമ പ്രവര്‍ത്തകയായ സുപ്രിയ ഒരു വര്ഷം മുന്‍പ്‌ ദക്ഷിണേന്ത്യന്‍ സിനിമയെ കുറിച്ച് ഒരു റിപ്പോര്‍ട്ട് തയ്യാറാക്കുന്നതിന്റെ ഇടയിലാണ് പൃഥ്വിരാജുമായി കാണുന്നതും ഇവര്‍ പ്രണയ ബദ്ധരാകുന്നതും. ഇടയ്ക്കിടയ്ക്ക് പൃഥ്വിരാജ് സുപ്രിയയെ കാണാന്‍ മുംബൈക്ക് പറക്കുന്നത് കഴിഞ്ഞ കുറെ കാലമായി പതിവായിരുന്നു.
വിവാഹം രഹസ്യമായിരുന്നെങ്കിലും സിനിമാ പ്രവര്‍ത്തകര്‍ക്കും ആരാധകര്‍ക്കും ഒരു ഗംഭീര വിരുന്നു തന്നെ തിരുവനന്തപുരത്ത് നല്‍കുന്നുണ്ട്.
ന്യൂ ഡല്‍ഹി : 56-ാമത് ദേശീയ ചലച്ചിത്ര പുരസ്കാരങ്ങള്‍ പ്രഖ്യാപിച്ചു. ബംഗാളി ചലച്ചിത്രമായ “അന്താഹീന്‍” ആണ് മികച്ച ചിത്രം. അനിരുദ്ധ റോയ് ചൌധരി സംവിധാനം ചെയ്ത ഈ ചിത്രത്തില്‍ രാഹുല്‍ ബോസ് നായകനായും അപര്‍ണ സെന്‍ നായികയായും അഭിനയിച്ചിരിക്കുന്നു. ഇവര്‍ക്ക് പുറമെ ഷര്‍മിള ടാഗോര്‍, മീത വസിഷ്ഠ് എന്നിവരും ഈ ചിത്രത്തില്‍ പ്രധാന കഥാപാത്രങ്ങള്‍ കൈകാര്യം ചെയ്തിരിക്കുന്നു. 
