തിരുവനന്തപുരം : തടി പിടിക്കാന്‍ എത്തിയ കൊല്ലം നെടുമങ്കാവ്‌ ശ്രീധര്‍മ്മ ശാസ്ത ക്ഷേത്രം വക മണികണ്ഠന്‍ എന്ന ആന ഇടഞ്ഞു. കല്ലേലി നടുവത്തുമൂഴി റേഞ്ചിലെ തടി പിടിക്കുവാന്‍ കൊണ്ടു വന്നതായിരുന്നു മണികണ്ഠനെ. ചൊവ്വാഴ്ച വൈകീട്ട്‌ പാപ്പന്മാരോട്‌ ഇടഞ്ഞ് അച്ഛന്‍ കോവിലാറിന്റെ തീരത്ത്‌ നിലയുറപ്പിച്ചു. അനുനയിപ്പിക്കുവാന്‍ ചെന്ന പാപ്പന്മാരെ സമീപത്തേക്ക്‌ അടുപ്പിച്ചില്ല. രാത്രി വൈകിയും പാപ്പാന്മാര്‍ പരിശ്രമം തുടര്‍ന്നു.
പിറ്റേന്ന് പഴയ പാപ്പാന്‍ എത്തി ആനയെ അനുനയിപ്പിച്ചെങ്കിലും ജനക്കൂട്ടത്തിന്റെ ആരവം കേട്ട്‌ അവന്‍ വീണ്ടും പിണങ്ങി. ആറു നീന്തി മറുകര എത്തിയ ആനയെ എലിഫെന്റ്‌ സ്ക്വാഡ്‌ എത്തി വടം കൊണ്ട്‌ കുരുക്കിട്ട്‌ പിടിച്ചു. പിന്നീട്‌ സുരക്ഷിത സ്ഥാനത്ത്‌ തളച്ചു.
കോഴിക്കോട്‌ : പ്രമുഖ പരിസ്ഥിതി പ്രവര്‍ത്തകനായ സി. ആര്‍. നീലകണ്ഠനെ ഒരു സംഘം ഡി.വൈ.എഫ്.ഐ. പ്രവര്‍ത്തകര്‍ മര്‍ദ്ദിച്ചു പരിക്കേല്‍പ്പിച്ചു. പേരാമ്പ്ര പാലേരിയില്‍ “മാവോയിസ്റ്റുകള്‍ ഉണ്ടാകുന്നത്” എന്ന വിഷയത്തില്‍ പ്രതി ചിന്ത എന്ന സംഘടന സംഘടിപ്പിച്ച സംവാദത്തില്‍ മുഖ്യ പ്രഭാഷണം നടത്താന്‍ എത്തിയതായിരുന്നു അദ്ദേഹം. പ്രസംഗിക്കാന്‍ മൈക്കിനു മുന്‍പില്‍ എത്തി ആദ്യ വാചകം പറഞ്ഞു തുടങ്ങിയ ഉടനെ ഒരു സംഘം ആളുകള്‍ വടികളും കസേരകളുമായി സ്റ്റേജിനു മുകളില്‍ കയറി നീലകണ്ഠനെ ആക്രമിച്ചു. അടിയേറ്റ് താഴെ വീണ അദ്ദേഹത്തെ ചുറ്റും വളഞ്ഞു നിന്ന് ചവിട്ടിയും അടിച്ചും മര്‍ദ്ദനം തുടര്‍ന്നു. കൈ കാലുകള്‍ക്കും, വയറിനും, നെഞ്ചത്തും, ദേഹം ആസകലവും പരിക്കേറ്റ അദ്ദേഹത്തെ ഏറെ നേരത്തേക്ക്‌ ആശുപത്രിയില്‍ എത്തിക്കാനും ഇവര്‍ സമ്മതിച്ചില്ല.
