തിരുവനന്തപുരം : പതിമൂന്നാം നിയമ സഭയിലേക്കുള്ള ജന പ്രതിനിധികളെ തെരഞ്ഞെടുക്കുവാന് ഇന്ന് കേരളം പോളിംഗ് ബൂത്തിലേക്ക് നീങ്ങും. സംസ്ഥാനത്തെ 140 മണ്ഡലങ്ങളിലായി സജ്ജമാക്കിയ 20,758 പോളിംഗ് ബൂത്തുകളില് ഇന്ന് രാവിലെ ഏഴു മണി മുതല് വൈകീട്ട് അഞ്ചു മണി വരെയാണ് വോട്ട് രേഖപ്പെടുത്താനുള്ള അവസരം ലഭിക്കുക. അടുത്ത മാസം 13നാണ് വോട്ടെണ്ണല്.
രാവിലെ തന്നെ കനത്ത പോളിംഗ് ആണ് കേരളത്തില് രേഖപ്പെടുത്തിയത് എന്ന് പ്രാഥമിക റിപ്പോര്ട്ടുകള് സൂചിപ്പിക്കുന്നു. ഏറ്റവും കൂടുതല് പോളിംഗ് രേഖപ്പെടുത്തിയ കോഴിക്കോട് ജില്ലയില് 20 ശതമാനം വോട്ടര്മാരാണ് ആദ്യ മണിക്കൂറില് തന്നെ തങ്ങളുടെ സമ്മതിദാന അവകാശം ഉപയോഗപ്പെടുത്തിയത്. തിരുവനന്തപുരം ജില്ലയാണ് പോളിംഗ് നിരക്കില് ഏറ്റവും പുറകില് എന്നും കണക്കുകള് സൂചിപ്പിച്ചു.
തിരുവനന്തപുരം : എം. ഐ. ഷാനവാസ് എം. പി. ക്കെതിരെ കെ. പി. സി. സി. പ്രസിഡന്റ് അച്ചടക്ക നടപടി എടുക്കണമെന്ന് കോണ്ഗ്രസ് നേതാവും മുന് മന്ത്രിയുമായിരുന്ന ടി. എച്ച്. മുസ്തഫ. ജമാഅത്തെ ഇസ്ലാമിയുമായി ചര്ച്ച നടത്തിയത് തെറ്റാണെന്നും, ഷാനവാസിന് എല്ലാ മുസ്ലീം തീവ്രവാദ സംഘങ്ങളുമായി ബന്ധമുണ്ടെന്നും അദ്ദേഹം പറഞ്ഞു. ഇത്തരം നീക്കങ്ങള് കോണ്ഗ്രസിനെ വിശ്വസിക്കു ന്നവര്ക്കിടയില് വിള്ളലുണ്ടാക്കുമെന്നും, ഇതിനെതിരെ നടപടി എടുക്കണമെന്നും ടി. എച്ച്. മുസ്തഫ വ്യക്തമാക്കി.
ന്യൂഡല്ഹി : സംസ്ഥാന സര്ക്കാര് നടപ്പിലാക്കുവാന് ശ്രമിച്ച 2 രൂപയ്ക്ക് അരി എന്ന പദ്ധതി തിരഞ്ഞെടുപ്പ് കമ്മീഷന്റെ ഇടപെടലിനെ തുടര്ന്ന് സുപ്രീം കോടതി സ്റ്റേ ചെയ്തു. അരി വിതരണം തിരഞ്ഞെടുപ്പിനെ ബാധിക്കുമെന്നും അതിനാല് തിരഞ്ഞെടുപ്പ് കഴിയും വരെ പദ്ധതി നിര്ത്തി വെയ്ക്കണമെന്നും തിരഞ്ഞെടുപ്പ് കമ്മീഷന് ആവശ്യപ്പെട്ടിരുന്നു. നേരത്തെ കമ്മീഷന്റെ വാദം ഹൈക്കോടതി തള്ളി. ഇതിനെ തുടര്ന്ന് കമ്മീഷന് സുപ്രീം കോടതിയെ സമീപിക്കുകയായിരുന്നു. കമ്മീഷന്റെ നിലപാടിനെതിരെ നേരത്തെ രാജാജി മാത്യു എം. എല്. എ. ഹൈക്കോടതിയെ സമീപിച്ചിരുന്നു.
