ചെന്നൈ : പ്രശസ്ത സംവിധായകൻ ഐ.വി ശശി അന്തരിച്ചു. ശ്വാസം മുട്ടലിനെ തുടർന്ന് ആശുപത്രിയിലേക്ക് കൊണ്ടുപോകുന്നതിനിടെയായിരുന്നു അന്ത്യം. 69 വയസ്സായിരുന്നു. പ്രശസ്ത സിനിമാതാരം സീമയാണ് ഭാര്യ. നിരവധി ഹിറ്റ് സിനിമകൾ സംവിധാനം ചെയ്തിട്ടുള്ള അദ്ദേഹത്തിന്റെ മരണം സിനിമാലോകത്തിന് തീരാനഷ്ടമാണ്.
മലയാളത്തിന് പുറമേ തമിഴ്, തെലുങ്ക്, ഹിന്ദി ഭാഷകളിലായി 150 ലേറെ സിനിമകൾ സംവിധാനം ചെയ്തിട്ടുണ്ട്. വാണിജ്യ സിനിമകളിൽ പുതുവഴി തെളിയിക്കുകയും നടൻമാരെ സൂപ്പർ താരങ്ങളാക്കുന്നതിൽ പ്രധാന പങ്കു വഹിക്കുകയും ചെയ്ത സംവിധായകനാണ് ഐ വി ശശി. ദേശീയ പുരസ്കാര ജേതാവായ അദ്ദേഹത്തെ സംസ്ഥാന സർക്കാർ 2015 ൽ ജെ സി ഡാനിയേൽ പുരസ്കാരം നൽകി ആദരിച്ചിരുന്നു.2009 ൽ പുറത്തിറങ്ങിയ വെള്ളത്തൂവൽ ആണ് അവസാന ചിത്രം.
