പി. ജെ. ജോസഫും കേരള കോണ്ഗ്രസ് ജെ യിലെ ഒരു വിഭാഗവും യു. ഡി. എഫിലെ ഘടക കക്ഷിയായ കേരള കോണ്ഗ്രസ് മാണി ഗ്രൂപ്പില്‍ ലയിക്കുമ്പോള്‍ അത് യു. ഡി. എഫില്‍ ചര്‍ച്ച ചെയ്യേണ്ടത്‌ അനിവാര്യമാണെന്ന് പ്രതിപക്ഷ നേതാവ് ഉമ്മന്‍ ചാണ്ടി പറഞ്ഞു. കഴിഞ്ഞ നാലു വര്‍ഷക്കാലം എല്‍. ഡി. എഫ്. മന്ത്രിസഭയില്‍ അംഗമായിരിക്കെ നിരവധി ആരോപണങ്ങള്‍ക്ക് വിധേയനായ ഒരാളെ യു. ഡി. എഫില്‍ ഉള്‍പ്പെടുത്തുമ്പോള്‍ ജനങ്ങള്‍ക്ക്‌ മുന്നില്‍ അപഹാസ്യ മാകരുതെന്നും അദ്ദേഹം ഓര്‍മ്മിപ്പിച്ചു. എന്നാല്‍ ലയനം മാണി കോണ്ഗ്രസ്സിന്റെ ആഭ്യന്തര കാര്യമാണെങ്കില്‍ ലയനത്താല്‍ ഉണ്ടാകുന്ന ഗുണവും ദോഷവും മാണി തന്നെ സഹിക്കേണ്ടി വരും എന്നും യു. ഡി. എഫിന് ഒരു ബാധ്യതയും ഉണ്ടായിരി ക്കില്ലെന്നും ഉമ്മന്‍ ചാണ്ടി മുന്നറിയിപ്പ് നല്‍കി.

കേരളാ കോണ്‍ഗ്രസ്സ് ജോസഫ് വിഭാഗം പിളര്‍ന്നു. ഇന്ന് കോട്ടയത്തു നടന്ന വിമത വിഭാഗം ജോസഫിനെ പുറത്താക്കുകയും പുതിയ ചെയര്‍മാനായി പി. സി. തോമസിനെ തിരഞ്ഞെടുക്കുകയും ചെയ്തു. കെ സുരേന്ദ്രന്‍ പിള്ള എം. എല്‍. എ. അടക്കം ഒരു വിഭാഗം പ്രവര്‍ത്തകരാണ് പി. സി. തോമസിന്റെ നേതൃത്വത്തില്‍ എല്‍. ഡി. എഫില്‍ ഉറച്ചു നില്‍ക്കുവാന്‍ തീരുമാനിച്ചത്. ജോസഫ് പാര്‍ട്ടി വഞ്ചിച്ചെന്നും അധികാരം മോഹിച്ചാണ് ജോസഫ് മാണിയോടൊപ്പം ചേര്‍ന്നതെന്നും യോഗത്തില്‍ അഭിപ്രായം ഉയര്‍ന്നു. കേരളാ കോണ്‍ഗ്രസ്സ് ജോസഫ് വിഭാഗം പിളരും എന്ന സൂചനകള്‍ നേരത്തെ ഉണ്ടായിരുന്നു. ഇന്നലെ പി. സി. തോമസ് ഇടതു നേതൃത്വവുമായി ചര്‍ച്ച നടത്തിയിരുന്നു. ഇതിനിടയില്‍ ജോസഫ് മാണി ഗ്രൂപ്പില്‍ ലയിച്ച് യു. ഡി. എഫിന്റെ ഭാഗമാകുന്നതില്‍ കോണ്‍ഗ്രസ്സ്, യൂത്ത്‌ കോണ്‍ഗ്രസ്സ് പ്രവര്‍ത്തകരില്‍ നിന്നും ഒരു വിഭാഗം നേതാക്കന്മാരില്‍ നിന്നും ശക്തമായ എതിര്‍പ്പ് നിലനില്‍ക്കുന്നുണ്ട്.