കണ്ണൂര്‍: ഡി. വൈ. എഫ്. ഐ. സംസ്ഥാന സെക്രട്ടറി ടി. വി. രാജേഷ് എം. എല്‍.എക്കും സി. പി. എം. ജില്ലാ സെക്രട്ടറി പി. ജയരാജനും നോട്ടീസ്.  തളിപ്പറമ്പ് അരിയിലിലെ എം. എസ്. എഫ്. പ്രവര്‍ത്തകന്‍ അബ്ദുള്‍ ഷുക്കൂര്‍ കൊല്ലപ്പെട്ട കേസില്‍ ചോദ്യം ചെയ്യലിന് ഹാജരാകാനാണ് വളപട്ടണം പോലീസ്  നോട്ടീസ് നല്‍കിയത്. സി. പി. എം ജില്ലാ കമ്മിറ്റി ഓഫീസില്‍ എത്തിയാണ് പോലീസ് നോട്ടീസ് നല്‍കിയത്. പി. ജയരാജന്‍ 12 നും ടി. വി. രാജേഷ് എം. എല്‍. എ 17 നും അന്വേഷണ സംഘത്തിന് മുന്നില്‍ നേരിട്ട് ഹാജരാകണം ഇവരുടെ പങ്കിനെ പറ്റി സി. പി. എം ലോക്കല്‍ സെക്രട്ടറി യു. വി. വേണു പോലീസിനു മുന്നില്‍ മൊഴി നല്‍കിയിരുന്നു. ടി.പി. വധവുമായി ബന്ധപെട്ടാണ് വേണുവിനെ കസ്റ്റഡിയില്‍ എടുത്തത്. തളിപ്പറമ്പില്‍ പി. ജയരാജനും ടി. വി. രാജേഷും അക്രമിക്കപ്പെട്ടതിന്റെ പ്രതികാരമായാണ് അബ്ദുള്‍ ഷുക്കൂര്‍ കൊല്ലപ്പെട്ടതെന്നാണ് പോലീസ് നിഗമനം.

കോഴിക്കോട്: റവല്യൂഷണറി മാര്‍ക്സിസ്റ്റ് പാര്‍ട്ടി നേതാവ് ടി. പി. ചന്ദ്രശേഖരന്‍ വധക്കേസ് നിര്‍ണ്ണായക വഴിത്തിരിവില്‍ മുഖ്യപ്രതി ടി. കെ. രജീഷിനെ  പൊലീസ് അറസ്റ്റുചെയ്തു  കസ്റ്റഡിയില്‍. മഹാരാഷ്ട്രയില്‍ നിന്നാണ് ഇയാളെ അറസ്റ്റ്‌ ചെയ്തത്. ഇയാളെ ഒളിവില്‍ കഴിയാന്‍ സഹായിച്ച മൂന്നുപേരെ നേരത്തെ തന്നെ പോലിസ്‌ അറസ്റ്റ്‌ ചെയ്തിരുന്നു.  ടി. പി. വധക്കേസില്‍ ഗൂഢാലോചനയിലും കൊലപാതകത്തിലും നേരിട്ട് പങ്കുണ്ടെന്ന് കരുതുന്ന  രജീഷിനെ അറസ്റ്റ്‌ ചെയ്തതോടെ കേസ്‌ പുതിയ വഴിത്തിരിവിലേക്ക് എത്തുമെന്നാണ് സൂചന.  കസ്റ്റഡിയിലെടുത്ത രജീഷിനെ വടകരയിലെത്തിച്ചു. നാളെ  ഇയാളെ കോടതിയില്‍ ഹാജരാക്കും. ഒളിവില്‍ കഴിയുന്ന കുഞ്ഞനന്തനും കോടി സുനിയും കീഴടങ്ങാന്‍ സാധ്യതയുണ്ടെന്നാണ് നിഗമനം.