ഒഞ്ചിയം: ടി. പി. ചന്ദ്രശേഖരന്റെ ഓര്മ്മകളുമായി ഭാര്യ രമയും മകനും അമ്മൂമ്മയും മുത്തശ്ശനും ടി. പി. എന്നു പേരിട്ട പുതിയ വീട്ടിലേക്ക് താമസം മാറി. ഒരു കുടുംബത്തിന്റേയും സ്വപ്നങ്ങളും പ്രതീക്ഷകളും സന്തോഷവുമാണ് ഒരു സംഘം കൊലയാളികൾ ഇരുളിന്റെ മറവില് അമ്പത്തൊന്നു വെട്ടുകളിലൂടെ ഇല്ലാതാക്കിയത്. സ്വന്തം വീട്ടില് ഒരു രാത്രി പോലും കിടന്നുറങ്ങുവാന് ടി. പി. ക്ക് ഭാഗ്യമുണ്ടായില്ല. വീടിന്റെ പണി പൂർത്തിയാകും മുൻപ് മെയ് നാലിന് രാത്രി പത്തു മണിയോടെ ഒരു സംഘം ടി. പി. ചന്ദ്രശേഖരനെ വെട്ടി കൊലപ്പെടുത്തി. ടി. പി. കൊല്ലപ്പെട്ടതിനു ശേഷം വി. എസ്. അച്യുതാനന്ദന് ജൂണ് രണ്ടിനു ടി. പി. യുടെ കുടുംബാംഗങ്ങളെ സന്ദര്ശിച്ചപ്പോള് അദ്ദേഹത്തിന്റെ കൈ പിടിച്ചാണ് രമ പുതിയ വീട്ടിലേക്ക് കയറിയത്. ജൂലൈ ആദ്യ വാരം ഗൃഹപ്രവേശം നടത്തണം എന്നായിരുന്നു ചന്ദ്രശേഖരന്റെ ആഗ്രഹം.
തന്റെ ജീവിതം ജനങ്ങള്ക്കൊപ്പമാണെന്ന് തിരിച്ചറിഞ്ഞ ടി. പി. ക്ക് സ്വന്താമായി വീടൊരുക്കുമ്പൊളും അക്കാര്യത്തില് നിര്ബന്ധമുണ്ടായിരുന്നു. കാണുവാന് വരുന്നവർക്ക് ഇരിക്കുവാനും ദൂര ദിക്കുകളീല് നിന്നും വരുന്ന സഖാക്കള്ക്ക് താമസിക്കുവാനും ഉള്ള സൌകര്യം വീട്ടില് ഒരുക്കിയിരുന്നു. സ്വന്തമായൊരു വീടെന്ന സ്വപ്നം ഇല്ലാതിരുന്ന ടി. പി. യെ ഭാര്യ രമയാണ് വീടു വെയ്ക്കുവാന് പ്രേരിപ്പിച്ചത്. 2009 നവമ്പറില് വീടിന്റെ നിര്മ്മാണം ആരംഭിച്ചു. വീടു നിര്മ്മിക്കുന്നതില് സഖാക്കളും ടി. പി. ക്കൊപ്പം ചേര്ന്നു. ടി. പി. യുടെ മരണ ശേഷം വീടിന്റെ നിര്മ്മാണ പ്രവര്ത്തനങ്ങള് നിലച്ചെങ്കിലും അദ്ദേഹത്തിന്റെ സഹോദരങ്ങള് അത് പൂര്ത്തിയാക്കുകയായിരുന്നു.
ടി. പി. ചന്ദ്രശേഖരന് ഇല്ലാത്ത വീടിന്റെ കുടിയിരിക്കല് ചടങ്ങ് വളരെ അടുത്ത ബന്ധുക്കള് മാത്രം പങ്കെടുത്ത ഒരു ചടങ്ങായി ചുരുക്കി. രമയുടെ പിതാവ് കെ. കെ. മാധവനും ഒപ്പം ചില അടുത്ത ബന്ധുക്കളും മാത്രമായിരുന്നു ചടങ്ങില് സംബന്ധിച്ചത്. ടി. പി. എന്ന ഈ വീട് ഒഞ്ചിയത്തിന്റെ ഭൂമിയില് രാഷ്ട്രീയ വൈരാഗ്യത്തിന്റെ നടുക്കം ജനിപ്പിക്കുന്ന ഒരു സ്മാരകം കൂടെയായി മാറുന്നു.
