 |
 |
 |
 |
 |
 |
 |
 |
 |
 |
 |
 |
 |
 |
ടോക്യോ : ആണവ വികിരണ ഭീഷണിയെ തുടര്ന്ന് ജപ്പാനില് നിന്നും ഇറക്കുമതി ചെയ്യുന്ന ഭക്ഷണ പദാര്ത്ഥങ്ങള് അമേരിക്ക നിരോധിച്ചു. അന്താരാഷ്ട്ര തലത്തില് ജപ്പാനിലെ ആണവ ദുരന്തത്തെ കുറിച്ചുള്ള ആശങ്കകള് നിലനില്ക്കുന്ന അവസരത്തില് മറ്റു രാജ്യങ്ങളും ഇത്തരം നിരോധനങ്ങള് ഏര്പ്പെടുത്തുവാനുള്ള സാദ്ധ്യത തള്ളിക്കളയാനാവില്ല.
- ജെ.എസ്.
ട്രിപ്പോളി: ലിബിയന് ഏകാധിപതി മുവമ്മര് ഗദ്ദാഫി പൊതുജനമധ്യത്തില് പ്രത്യക്ഷപ്പെട്ട് അനുയായികളെ അഭിസംബോധന ചെയ്തു. ട്രിപ്പോളിയ്ക്കു സമീപം ഗദ്ദാഫിയുടെ വസതിയിലാണ് നൂറുകണക്കിനു അനുയായികളുടെ മധ്യത്തില് അദ്ദേഹം പ്രത്യക്ഷപ്പെട്ടത്.
സഖ്യസേന ബോംബ് വര്ഷം നടത്തിയ ബാബ് അല് അസീസിയയിലെ വസതിയിലാണ് ഗദ്ദാഫി അനുയായികള്ക്കിടയില് എത്തിയത്. വസതിയുടെ ബാല്ക്കണിയില് പ്രത്യക്ഷപ്പെട്ട ഗദ്ദാഫി അനുയായികളെ അഭിസംബോധന ചെയ്തു സംസാരിച്ചു. മിനിറ്റുകള് മാത്രം നീണ്ടു നിന്ന പ്രസംഗത്തിനിടെ സഖ്യസേനയെ ഉടന് പരാജയപ്പെടുത്തുമെന്നു അദ്ദേഹം പ്രഖ്യാപിച്ചു. അന്തിമവിജയം തങ്ങള്ക്കായിരിക്കുമെന്ന നിലപാടില് ഗദ്ദാഫി ഉറച്ചു നിന്നു. ഐക്യ രാഷ്ട്ര സഭയുടെ നിലപാടിനെ അദ്ദേഹം അപലപിച്ചു. ലോകത്തെ ഇസ്ലാമിക ശക്തികളെല്ലാം ലിബിയയെ പിന്തുണക്കണമെന്നും തന്റെ പ്രസംഗത്തില് അദ്ദേഹം ആവശ്യപ്പെട്ടു. ഇസ്ലാമിനെതിരേ കുരിശു യുദ്ധത്തിനാണ് പാശ്ചാത്യരാഷ്ട്രങ്ങള് ശ്രമിക്കുന്നതെന്ന് ഗദ്ദാഫി ആരോപിച്ചു. സഖ്യസേനയോടും പ്രക്ഷോഭകരോടും പൊരുതാന് അദ്ദേഹം തന്റെ അനുയായികളോടു ആഹ്വാനം ചെയ്തു.
തുടര്ച്ചയായ വ്യോമാക്രമണത്തേത്തുടര്ന്നു ഗദ്ദാഫിയുടെ സൈനിക പ്രതിരോധം ദുര്ബലമായെങ്കിലും പ്രക്ഷോഭകരുടെ നിയന്ത്രണത്തിലുള്ള നഗരങ്ങള് പിടിച്ചടക്കാനുള്ള നീക്കത്തില് അയവുവന്നിട്ടില്ല. തലസ്ഥാനമായ ട്രിപോളി ഉടന് സഖ്യസേനയുടെ നിയന്ത്രണത്തിലാകുമെന്നാണു സൂചന.
- ലിജി അരുണ്
വായിക്കുക: മനുഷ്യാവകാശം, യുദ്ധം
ഇസ്ലാമാബാദ്: പാകിസ്താനിലെ ബലൂചിസ്താന് പ്രവിശ്യയില് ഞായറാഴ്ച ഒരു കല്ക്കരി ഖനിയിലുണ്ടായ സ്ഫോടനത്തില് മരിച്ചവരുടെ എണ്ണം 52 ആയി. ഇതില് 27 പേരുടെ ശരീരം മാത്രമേ പുറത്തെടുക്കുവാന് സാധിച്ചിട്ടുള്ളൂ. ബാക്കിയുള്ള മൃതദേഹങ്ങള് ഇപ്പോഴും ഖനിയില് കുടുങ്ങി കിടക്കുകയാണ്. ഇവയ്ക്ക് വേണ്ടിയുള്ള തിരച്ചില് തുടരുന്നു. പ്രവിശ്യാ തലസ്ഥാനമായ ക്വറ്റയില് നിന്നു 35 കിലോമീറ്റര് അകലെ സൊറാംഗി മേഖലയിലെ ഖനിയിലാണ് അപകടം നടന്നത്. മിഥേന് വാതകം കുമിഞ്ഞു കൂടി സ്ഫോടനം ഉണ്ടായതാണ് അപകട കാരണം. 12 തൊഴിലാളികളെ ഞായറാഴ്ച രക്ഷപ്പെടുത്തുകയുണ്ടായി. പുറത്തെടുക്കുമ്പോള് ഇവര് അബോധാവസ്ഥയില് ആയിരുന്നു. 2 ദിവസമായി വായു സഞ്ചാരം ഇല്ലാത്ത ഖനിയില് കഴിഞ്ഞ ബാക്കി തൊഴിലാളികളെ ജീവനോടെ രക്ഷപ്പെടുത്താന് സാധിച്ചില്ല.
സ്ഫോടനം നടക്കുമ്പോള് അമ്പതിലേറെ തൊഴിലാളികള് ഖനിയിലുണ്ടായിരുന്നു. സര്ക്കാറിന്റെ നിയന്ത്രണത്തിലുള്ളതാണ് സൊറോങിലെ ഈ സ്ഫോടനമുണ്ടായ ഖനി. ഉയര്ന്ന അപകട സാധ്യതയും മോശപ്പെട്ട സുരക്ഷാ സംവിധാനങ്ങളും മിഥേന് വാതകം കാരണം ഈ ഖനി അടച്ചു പൂട്ടുവാന് സര്ക്കാര് ഉത്തരവ് ഉണ്ടായിരുന്നെങ്ങിലും ഇവ ചെവി ക്കൊള്ളാതെയാണ് ഖനി നടത്തിപ്പ് കമ്പനിയായ പാക്കിസ്ഥാന് ധാതു വികസന കോര്പറേഷന് ഈ ഖനി പ്രവര്ത്തിപ്പിച്ചിരുന്നത്.
- ലിജി അരുണ്
വായിക്കുക: അപകടം, ദുരന്തം, പാക്കിസ്ഥാന്
ട്രിപ്പോളി: വെടി നിര്ത്തല് നടപ്പാക്കണമെന്ന ഐക്യ രാഷ്ട്ര സഭയുടെ നിര്ദേശം ഗദ്ദാഫി തള്ളിയതിനെ തുടര്ന്ന് ലിബിയയില് സഖ്യ സേനയുടെ ആക്രമണം ശക്തമായി. അമേരിക്ക, ബ്രിട്ടന്, ഫ്രാന്സ് എന്നീ രാജ്യങ്ങളുടെ നേതൃത്വത്തിലാണ് ആക്രമണം നടക്കുന്നത്. ഓപ്പറേഷന് ഒഡീസ്സിഡോണ് എന്ന് പേരിട്ട ആക്രമണത്തില് കാനഡ, ഇറ്റലി എന്നീ രാജ്യങ്ങളും പങ്കാളികളാണ്. ഗദ്ദാഫിയുടെ ട്രിപ്പോളിയിലെ ആസ്ഥാന മന്ദിരത്തിനു നേരെ മിസൈല് ആക്രമണമുണ്ടായി. ഗദ്ദാഫി അതിഥികളെ സ്വീകരിക്കുന്ന മന്ദിരം ആക്രമണത്തില് നിലം പൊത്തി.
എന്നാല് അതിനു പിന്നാലെ ഗദ്ദാഫിയുടെ കൊട്ടാരം സംരക്ഷിക്കാന് അദ്ദേഹത്തിന്റ അനുയായികളുടെ നേതൃത്വത്തില് മനുഷ്യച്ചങ്ങല തീര്ത്തു. ഗദ്ദാഫിയുടെ അനുയായികളായ 100 കണക്കിന് സ്ത്രീകളും കുട്ടികളും സൈനികരും ചേര്ന്നാണ് മനുഷ്യ കവചം തീര്ത്തിരിക്കുന്നത്. തങ്ങളെ വധിച്ചു മാത്രമേ പാശ്ചാത്യ ശക്തികള്ക്ക് ഗദ്ദാഫിയെ തൊടാന് സാധിക്കൂ എന്ന നിലപാടില് അവര് ഉറച്ചു നിന്നു. സഖ്യ സേന നടത്തുന്ന ഈ ആക്രമണത്തില് 64 പേര് മരിക്കുകയും 150 പേര്ക്കെങ്കിലും പരിക്കേല്ക്കുകയും ചെയ്തിട്ടുണ്ട്. ആക്രമണങ്ങളെ ഇന്ത്യ, റഷ്യ, ചൈന എന്നി രാജ്യങ്ങള് ശക്തമായി അപലപിച്ചു.
- ലിജി അരുണ്
വായിക്കുക: മനുഷ്യാവകാശം, യുദ്ധം
ബേസല് : വിത്സണ് സ്വിസ്സ് ഓപ്പണ് ഗ്രാന്ഡ് പ്രീ ഗോള്ഡ് ബാഡ്മിന്റണ് ഫൈനലില് 21 – 13, 21 – 14 എന്നീ സ്കോറുകള്ക്ക് ദക്ഷിണ കൊറിയയുടെ സുങ്ങ് ജി ഹ്യുനെ പരാജയപ്പെടുത്തി ഇന്ത്യയുടെ സൈന നെഹ്വാള് ഈ വര്ഷത്തെ ആദ്യ റൈറ്റില് സ്വന്തമാക്കി.
സുങ്ങ് ജിയെ നേരത്തെ ഇന്തോനേഷ്യ ഓപ്പണ് സൂപ്പര് സീരീസിലും സൈന തോല്പ്പിച്ചിട്ടുണ്ട്.
കളിയുടെ തുടക്കം മുതല് തന്നെ മല്സരം തന്റെ വരുതിയിലാക്കിയ സൈന 6 – 7 എന്ന സ്കോറില് നിന്നും തുടര്ച്ചയായി 7 പോയന്റുകള് നേടി കൊണ്ട് സ്കോര് 13 -7 എത്തിച്ചു. ഈ ലീഡ് നിലനിര്ത്തിയ സൈന ആദ്യ കളി ജയിക്കുകയായിരുന്നു.
രണ്ടാമത്തെ കളിയില് 7 – 3 ലീഡ് നേടിയ സൈന പിന്നീടൊരിക്കലും സുങ്ങ് ജിയെ മടങ്ങി വരാന് അനുവദിച്ചില്ല. കളിയില് ആധിപത്യം ഉറപ്പിച്ച സൈന വെറും 43 മിനിറ്റിനുള്ളില് വിജയം കാണുകയായിരുന്നു.
അന്താരാഷ്ട്ര മല്സരങ്ങളില് ഇത് സൈനയുടെ ഒന്പതാമത്തെ ടൈറ്റില് വിജയമാണ്. നാല് സൂപ്പര് സീരീസ് ടൈറ്റിലുകളും, മൂന്നു ഗ്രാന്ഡ് പ്രീ സ്വര്ണ്ണവും, രണ്ടു ഗ്രാന്ഡ് പ്രീ ടൂര്ണമെന്റുകളും സൈന നേരത്തെ സ്വന്തമാക്കിയിട്ടുണ്ട്.
- ജെ.എസ്.
വായിക്കുക: കായികം
ഉക്രൈന് : ജപ്പാനിലെ ഇപ്പോഴത്തെ ആണവ പ്രതിസന്ധിയുടെ പശ്ചാത്തലത്തില് രാജ്യത്തെ എല്ലാ ആണവ നിലയങ്ങളുടെയും സുരക്ഷാ സംവിധാനങ്ങള് ശക്തമാക്കുമെന്ന് ഉക്രൈനിലെ ആണവ നിയന്ത്രണ കമ്മിറ്റി ചെയര്മാന് യെലേന മിക്കോളൈഷുക്. ആണവ വികിരണം നിയന്ത്രണ അതീതമായി തീര്ന്നിരിക്കുന്നതിനാല് ജപ്പാനിലെ തുടര്ന്നുള്ള അവസ്ഥകള് പ്രവചിക്കുക അസാധ്യമാണ്. എങ്കിലും ഉക്രൈനിലെ ചെര്ണോബില് ദുരന്തം പോലെ വളരെ ഭയാനകമായ ഒരു അവസാനമായിരിക്കും ഫുകുഷിമയിലേത് എന്ന് അവര് വിലയിരുത്തി.
ആണവോര്ജ്ജത്തെ ആശ്രയിക്കുന്ന മറ്റു ലോക രാജ്യങ്ങള് ജപ്പാനിലെ ഈ പ്രതിസന്ധിയില് നിന്നും കൂടുതല് പഠിക്കേണ്ടിയിരിക്കുന്നു. സ്ഫോടനങ്ങള് ഉണ്ടാകുമ്പോള് ആണവ റിയാക്ടറുകളില് ഉത്പാദിപ്പിക്കപ്പെടുന്ന ഹൈഡ്രജന് വാതകം സംഭരണം ചെയ്യാനുള്ള സംവിധാനങ്ങള് ഇന്ന് ലോകത്തുള്ള ഒട്ടു മിക്ക ആണവ റിയാക്ടറുകളിലും ഇല്ല. എന്നാല് അടുത്തിടെ കമ്മിഷന് ചെയ്യപ്പെട്ട ഉക്രൈനിലെ ഖെമേല്നിസ്ക് ആണവ നിലയത്തിലും റോവ്നോ ആണവ നിലയത്തിലും സുരക്ഷ സംവിധാനങ്ങള് മെച്ചപ്പെടുത്താന് ഈ സംവിധാനം ഏര്പ്പെടുത്തിയിട്ടുണ്ട്. ഉക്രൈനിലെ മറ്റു ആണവ നിലയങ്ങളിലും ഇത് പ്രാവര്ത്തികമാക്കാന് പദ്ധതി ഉണ്ട്. ഐക്യ രാഷ്ട്ര സഭയുടെ ആണവ സുരക്ഷ കണ്വെന്ഷനോട് അനുബന്ധിച്ച് ഉക്രൈനിലെ എല്ലാ ആണവ നിലയങ്ങളും ഏറ്റവും പുതിയ സുരക്ഷ നയങ്ങള് പാലിച്ച് പ്രവര്ത്തിക്കുന്നവയാണ്. ഇവ സാധ്യമല്ലാത്ത എല്ലാ നിലയങ്ങളും അടച്ചു പൂട്ടുകയും ചെയ്തു. ഭൂകമ്പബാധയെ ചെറുക്കുവാന് സാധിക്കുന്നവയാണ് ഈ നിലയങ്ങള്.
ജപ്പാനിലെ ആണവ നിലയങ്ങള് ഇങ്ങനെ രൂപകല്പന ചെയ്തിരുന്നവ ആയിരുന്നെങ്കിലും അവയ്ക്ക് തുടര്ന്നുണ്ടായ സുനാമിയെയും വെള്ളപ്പൊക്കത്തെയും തടുക്കുവാന് കഴിഞ്ഞില്ല . ഇവയെല്ലാം മുന്കൂട്ടി കണ്ടു കൊണ്ട് വേണം തുടര്ന്നുള്ള ഏതൊരു ആണവോര്ജ പദ്ധതിയും രൂപകല്പന ചെയ്യാന്.
ഉക്രൈനില് 4 ആണവ നിലയങ്ങളിലായി 15 റിയാക്ടറുകള് പ്രവര്ത്തിക്കുന്നുണ്ട്. രാജ്യത്തിന്റെ 50% ല് അധികം വൈദ്യുതി ഇവയില് നിന്നുമാണ് ഉത്പാദിക്കപ്പെടുന്നത്.
- ലിജി അരുണ്
മേരിലാന്ഡ് : ചന്ദ്രന് ഭൂമിയോട് ഏറ്റവും അടുത്ത് വരുന്ന പ്രതിഭാസമായ സൂപ്പര് മൂണ് ഇന്നാണ്. നഗ്ന നേത്രങ്ങള്ക്ക് ഇന്ന് ചന്ദ്രന് കൂടുതല് അടുത്തും വലുതുമായി കാണപ്പെടുന്നത് കൊണ്ടാണ് ഈ പ്രതിഭാസത്തെ സൂപ്പര് മൂണ് എന്ന് വിളിക്കുന്നത്. കഴിഞ്ഞ സൂപ്പര് മൂണ് പതിനെട്ട് വര്ഷങ്ങള്ക്കു മുന്പായിരുന്നു. ഈ പ്രതിഭാസം പൌര്ണ്ണമി ദിനത്തില് സംഭവിക്കുമ്പോഴാണ് ഇത്തരത്തില് നമുക്ക് ചന്ദ്രനെ ഏറ്റവും വലുതായി കാണുവാന് കഴിയുന്നത്. ഈ മാസത്തെ പൌര്ണ്ണമി മാര്ച്ച് 19 ശനിയാഴ്ച (ഇന്ന്) യാണ് വരുന്നത്.
എന്നാല് ജപ്പാനിലെ ഭൂകമ്പത്തിനും സുനാമിക്കും കാരണമായത് സൂപ്പര് മൂണ് ആണെന്ന പ്രചരണം നാസ തള്ളിക്കളയുന്നു. ചരിത്രത്തിലെ പല ഭൂകമ്പങ്ങളും വെളുത്ത വാവിനോ അതിനടുത്ത ദിവസങ്ങളിലോ ആയിരുന്നു എന്നും അതിനാല് സ്ഥിതി വിവര കണക്കുകളുടെ അടിസ്ഥാനത്തില് സൂപ്പര് മൂണ് ആണ് ജപ്പാനിലെ വന് ദുരന്തത്തിന് കാരണമായത് എന്ന് ഇന്ത്യയിലെ ചില ശാസ്ത്രജ്ഞര് അടക്കം അഭിപ്രായപ്പെട്ടിരുന്നു.
ഇന്നത്തെ സൂപ്പര് മൂണ് പ്രതിഭാസത്തില് ചന്ദ്രനും ഭൂമിയും തമ്മിലുള്ള ദൂരം 3,56,577 കിലോമീറ്റര് ആണ്. ഇത് ശരാശരി ദൂരമായ 3,82,900 കിലോമീറ്ററില് നിന്നും വെറും 26,323 കിലോമീറ്റര് കുറവാണ്. കാഴ്ചയില് പ്രകടമാണെങ്കിലും ജ്യോതിശാസ്ത്ര പരമായി ഇതൊരു വലിയ വ്യത്യാസമല്ല.
പൌര്ണമിക്കും അമാവാസിക്കും ചന്ദ്രന്റെ ആകര്ഷണം ഭൂമിയില് കൂടുതലായി അനുഭവപ്പെടുന്നു. ദിവസേനയുള്ള വേലിയേറ്റത്തിനു കാരണമാവുന്ന ചന്ദ്രന്റെ ആകര്ഷണ ബലം ഈ ദിവസങ്ങളില് ഭൂമിയുടെ ടെക്ടോണിക് പ്ലേറ്റുകളില് സാധാരണയില് കൂടുതലായ സമ്മര്ദ്ദം ചെലുത്തുകയും ചെയ്യുന്നുണ്ട്.
എന്നാല് ജപ്പാനിലെ ഭൂകമ്പം ഇങ്ങനെയൊരു ദിവസത്തില് നിന്നും ഒരാഴ്ച മാറി ചന്ദ്രന്റെ ആകര്ഷണ ശക്തി ഏറ്റവും കുറവ് അനുഭവപ്പെടുന്ന സമയത്താണ് സംഭവിച്ചത്. ചന്ദ്രന് ഭൂകമ്പങ്ങള്ക്ക് കാരണമാകുന്നില്ല എന്ന് മനസ്സിലാക്കുമ്പോള് തന്നെ ജപ്പാനിലെ ദുരന്തത്തിന് കാരണക്കാരന് സൂപ്പര് മൂണ് ആണെന്ന് പറയുന്നത് വീടിനു തീ പിടിച്ചതിനു കാരണം അടുത്ത നഗരത്തിലേക്ക് സന്ദര്ശനത്തിനു പോയ കൊള്ളി വെപ്പുകാരനാണ് എന്ന് പറയുന്നത് പോലെയാണ് എന്ന് ശാസ്ത്രജ്ഞര് പറയുന്നു.
സ്ഥിതി വിവര കണക്കുകള് നിരത്തി ചരിത്രത്തിലെ ചില ഭൂകമ്പങ്ങള് നടന്നത് പൌര്ണമി ദിവസത്തിന്റെ അടുത്ത ദിവസങ്ങളിലാണ് എന്ന് പറയുന്നവര് രണ്ടു കാര്യങ്ങള് മറച്ചു വെക്കുന്നു. ഒന്ന്, നേരത്തെ പറഞ്ഞ കൊള്ളി വെപ്പുകാരന് സ്ഥലത്തില്ലാത്ത പ്രശ്നം. രണ്ട്, ചരിത്രത്തില് നടന്ന ഭൂകമ്പങ്ങളില് ഭൂരിഭാഗവും നടന്നത് ഇത്തരം ദിവസങ്ങളിലല്ല എന്ന സത്യം.
- ജെ.എസ്.
മിനാമി സാന്റികു.(ജപ്പാന്) : “ഇന്ന് എന്റെ ജീവിതത്തിലെ അവസാനത്തെ ദിനം ആണെന്ന് ഞാന് ഉറപ്പിച്ചു”. 60 കാരനായ ഹിരോമിട്സു ശിങ്കാവ എന്ന ജപ്പാന്കാരന് തന്നെ രക്ഷപ്പെടുത്തിയവരോട് പറഞ്ഞു. 9 മൈല് ദൂരെ കടലില് തന്റെ വീടിന്റെ അവശിഷ്ടങ്ങള്ക്ക് മേലെ പറ്റിപ്പിടിച്ചു 2 ദിവസം കഴിഞ്ഞ ഇദ്ദേഹത്തെ ഇന്നലെയാണ് രക്ഷപെടുത്താന് സാധിച്ചത്. ഭൂകമ്പം ഉണ്ടായ ഉടനെ തന്നെ തന്റെ ഭാര്യയോടൊത്ത് വീട്ടില് നിന്നും അവശ്യ സാധനങ്ങള് എടുക്കുന്നതിനായി പുറപ്പെട്ട ഹിരോമിട്സുവിനെയും ഭാര്യയെയും എതിരിട്ടത് ഭീമന് സുനാമി തിരകള് ആയിരുന്നു. ”എനിക്ക് മേല്ക്കൂരയില് പറ്റിപ്പിടിച്ചു കിടക്കുവാന് സാധിച്ചു, എന്നാല് എന്റെ ഭാര്യ ഒഴുകി പോകുന്നത് നിസ്സഹായനായി നോക്കി നില്ക്കേണ്ടി വന്നു”, നിറ കണ്ണുകളോടെ ഹിരോമിട്സു പറയുന്നു. ഒഴുകി നടക്കുന്ന കെട്ടിടാവശിഷ്ടങ്ങള്ക്കിടയില് കിടന്നിരുന്ന ഹിരോമിട്സുവിനെ അടുത്ത് വന്ന ഹെലികോപ്ടറുകളും ബോട്ടുകളും കണ്ടില്ല. എന്നാല് എങ്ങനെയോ ഇദ്ദേഹം ഒരു വലിയ ചുവന്ന തുണി കൊണ്ട് ഒരു കൊടി ഉണ്ടാക്കുകയും അത് തുടര്ച്ചയായി വീശികൊണ്ടിരിക്കുകയും ചെയ്തു. അപ്പോള് രക്ഷാപ്രവര്ത്തനത്തില് ഏര്പ്പെട്ടിരുന്ന ജപ്പാന് നാവിക സേനയുടെ പ്രവര്ത്തകര് ഇത് കണ്ടു ഇദ്ദേഹത്തെ രക്ഷപ്പെടുത്തുകയായിരുന്നു.
മിനാമി സാന്റികുവില് 9500 ആള്ക്കാരെ കാണാതായിട്ടുണ്ട്. ഇത് ഈ നഗരത്തിന്റെ പകുതിയോളം ജനസംഖ്യയാണ്. വിരലില് എണ്ണാവുന്നത്രേം കെട്ടിടങ്ങളെ നില നില്ക്കുന്നവയുള്ളൂ. നഗര മധ്യത്തില്, സുനാമിയില് അകപ്പെട്ടു 3 കിലോമീറ്റര് കരയിലേക്ക് തള്ളപ്പെട്ട ഒരു ബോട്ട് അടിഞ്ഞു ചേര്ന്നിരിക്കുന്നു. സുനാമി തിര പൊങ്ങുന്നത് കണ്ടപ്പോള് താന് ഒരു ദുസ്വപ്നം കാണുകയാണ് എന്ന് കരുതിയതായി രക്ഷപ്പെട്ട ഒരാള് പറഞ്ഞു. വീടുകളെയും ആളുകളെയും കടല് വിഴുങ്ങി എടുക്കുന്നത് സഹിക്കാവുന്നതിലും അപ്പുറത്തുള്ള കാഴ്ചയായി.
വെള്ളിയാഴ്ച സുനാമി മുന്നറിയിപ്പ് ലഭിച്ചപ്പോള് തന്നെ ഭൂരിഭാഗം ജനങ്ങളും ഇവിടെ നിന്ന് ഓടി രക്ഷപ്പെടുകയുണ്ടായി. സ്വജീവനു വേണ്ടിയുള്ള നെട്ടോട്ടത്തില് പലര്ക്കും തങ്ങളുടെ കൂടെയുള്ള പ്രായമായവരെയും അംഗവൈകല്യം ഉള്ളവരെയും ഉപേക്ഷിക്കേണ്ടി വന്നു. മരിച്ചവരില് ഇങ്ങനെ ഉപേക്ഷിക്കപ്പെട്ടവര് നിരവധിയാണ്. ഒഴുകി നടക്കുന്ന കാറുകളില് നിന്നും, മരങ്ങളില് പറ്റി പിടിച്ചു കിടന്നിരുന്നവരുമൊക്കെ ആയി 42 പേരെ മിനാമി സാന്റികുവില് നിന്നും രക്ഷപ്പെടുത്തുകയുണ്ടായി. എന്നാല് അടിക്കടി ഉണ്ടായ തുടര് ചലനങ്ങളും സുനാമി മുന്നറിയിപ്പുകളും രക്ഷപ്രവര്ത്തനങ്ങള്ക്ക് തടസ്സം വരുത്തി.
- ലിജി അരുണ്
ഫുക്കുഷിമ : സുനാമിയെ തുടര്ന്നുണ്ടായ പ്രളയത്തില് തകരാറിലായ ജപ്പാനിലെ ഫുക്കുഷിമ ആണവ നിലയത്തിലെ ഒന്നാം നമ്പര് റിയാക്ടര് പൊട്ടിത്തെറിച്ചു. റിയാക്ടര് തണുപ്പിക്കുന്ന പമ്പുകള് പ്രവര്ത്തന രഹിതമായതിനെ തുടര്ന്ന് റിയാക്ടര് കോര് തണുപ്പിക്കാനുള്ള ശ്രമം പരാജയപ്പെടുകയും റിയാക്ടറിനകത്തെ മര്ദ്ദം ക്രമാതീതമായി വര്ദ്ധിക്കുകയുമാണ് ഉണ്ടായത് എന്ന് ഇവിടെ നിന്നുമുള്ള പ്രാഥമിക റിപ്പോര്ട്ടുകള് സൂചിപ്പിക്കുന്നു. മര്ദ്ദം കുറേശ്ശെയായി കുറയ്ക്കാന് ചില വാല്വുകള് തുറന്നു കൊണ്ട് ശ്രമം നടത്തി വരികയായിരുന്നു. എന്നാല് ചില വാല്വുകള് തുറക്കാനാകാത്ത വണ്ണം ഉറച്ചു പോയതിനാല് ഈ ശ്രമം വിജയം കണ്ടില്ല.
സ്ഥിതി ഗതികള് നിയന്ത്രണ വിധേയമാണ് എന്ന് അധികൃതര് പറയുന്നത് തെറ്റാണ് എന്ന് ഈ സ്ഫോടനം തെളിയിക്കു ന്നതായാണ് വിദഗ്ദ്ധര് വിലയിരുത്തുന്നത്. ആണവ നിലയം സ്ഥിതി ചെയ്ത കെട്ടിടം തകര്ന്നതിനാല് റിയാക്ടര് ഭാഗികമായി ഉരുകിയിട്ടു ണ്ടാകുമെന്നാണ് കരുതുന്നത്. ഇത് പൂര്ണ്ണമായ റിയാക്ടര് നാശത്തിന് വഴി വെയ്ക്കാം എന്നാണ് ആശങ്ക.
ആണവ നിലയത്തിലെ ഇന്ധനത്തിന്റെ താപനില നിയന്ത്രണ വിധേയമായി നിര്ത്താന് ഇന്ധന ദണ്ഡുകള് വെള്ളം ഉപയോഗിച്ച് തണുപ്പി ക്കുകയാണ് ചെയ്യുന്നത്. ഈ വെള്ളം റിയാക്ടറില് നിന്നും പുറത്തു വരുന്നത് നീരാവി യായിട്ടാണ് എന്നതിനാല് ഇത് വീണ്ടും ഉപയോഗി ക്കാനാവില്ല. റിയാക്ടര് തണുപ്പിക്കാനായി തുടര്ച്ചയായി പുതിയ വെള്ളം പമ്പ് ചെയ്തു കൊണ്ടിരിക്കണം എന്നര്ത്ഥം. സുനാമിയില് പ്രവര്ത്തന രഹിതമായ വൈദ്യുതി ബന്ധവും പമ്പിംഗ് സംവിധാനവും തണുപ്പിക്കാനുള്ള സംവിധാനത്തെ തകരാറിലാക്കി. ഇന്ധന ദണ്ഡുകള് തണുപ്പിക്കാനുള്ള വെള്ളം പമ്പ് ചെയ്യാന് കഴിയാ താവുന്നതോടെ ജല നിരപ്പ് കുറയുകയും ദണ്ഡുകള് ചൂടാവുകയും ഇവ ഉരുകുകയും ചെയ്യും. ഇതോടെ ആണവ വികിരണം ക്രമാതീതമാവും.
ഫുക്കുഷിമ ഒന്നിലെ ഒന്നാം നമ്പര് റിയാക്ടറാണ് ഇപ്പോള് പൊട്ടിത്തെറിച്ചത്. എന്നാല് ഇവിടെ ആറു റിയാക്ടറുകള് ഉണ്ട്. ഫുക്കുഷിമ രണ്ടില് നാല് റിയാക്ടറുകള് ആണുള്ളത്. അല്പ്പം വടക്കായി വേറെയും മൂന്നു റിയാക്ടറുകള് ഉണ്ട്. ഇവിടങ്ങളില് എല്ലാം സ്ഥിതി ഗതികള് ആശങ്കാ ജനകമാണ്.
പരിസര പ്രദേശങ്ങളിലെ ജനങ്ങളോട് നേരത്തെ അധികൃതര് പറഞ്ഞത് പ്രദേശം വിട്ടു പോകുവാനായിരുന്നു. എന്നാല് ഇപ്പോള് ഇവരോട് വീടിനകത്ത് തന്നെ ഇരിക്കുവാനാണ് പുതിയ നിര്ദ്ദേശം. ഇത് അന്തരീക്ഷത്തില് വന് തോതിലുള്ള ആണവ പ്രസരണം ഉണ്ട് എന്നാണ് സൂചിപ്പിക്കുന്നത്.
ഫുക്കുഷിമയിലെ ആണവ നിലയത്തിന്റെ മേല്ക്കൂര തകര്ന്നത് ആണവ പ്രസരണം പുറത്തേയ്ക്ക് വരുന്നതിനു എത്രത്തോളം സഹായകര മായിട്ടുണ്ട് എന്ന് ഇനിയും അറിവായിട്ടില്ല. എന്നാല് വന് തോതിലുള്ള ചോര്ച്ചയാണ് ഉണ്ടായത് എങ്കില് ഇത് ബഹിരാകാശത്തേയ്ക്ക് വരെ പരക്കുവാനും, ശാന്ത സമുദ്രത്തിനപ്പുറത്തുള്ള അമേരിക്ക വരെ മഞ്ഞും മഴയുമായി പെയ്തിറങ്ങാനും സാദ്ധ്യതയുണ്ട്. ചെര്ണോബില് ആണവ അപകടത്തെ തുടര്ന്ന് ഇത്തരം ആണവ മഴകള് അമേരിക്കയിലും യൂറോപ്പിലും ഉണ്ടായിട്ടുണ്ട്.
ആണവ ഊര്ജ്ജം നമുക്ക് വേണ്ട എന്ന് പരിസ്ഥിതി പ്രവര്ത്തകര് പറയുമ്പോള് പരിസ്ഥിതി പ്രവര്ത്തകര് വികസന വിരോധികളാണ് എന്നാരോപിക്കുന്ന രാഷ്ട്രീയ നേതൃത്വത്തിനെ ഈ ദുരന്തങ്ങള് ഇരുത്തി ചിന്തിപ്പിച്ചാല് നന്ന്. അല്ലെങ്കില് ഭാവി തലമുറകള് നാം എത്ര വിഡ്ഢികളായിരുന്നു എന്ന് പറയുമെന്ന് തീര്ച്ച.
- ജെ.എസ്.
ടോക്യോ: ഭൂകമ്പവും സുനാമിയും അനേക മനുഷ്യ ജീവനുകള് കവര്ന്ന ജപ്പാനില്, ഇപ്പോള് ആണവ ഭീതിയും. രാജ്യത്തെ രണ്ടു ആണവോര്ജ്ജ ഉത്പാദന കേന്ദ്രങ്ങളിലെ ശീതീകരണ സംവിധാനം തകരാറിലായി എന്ന് വിദഗ്ധര് സ്ഥിരീകരിച്ചു. ഇവയില് ഒന്നില് ചെറിയ തോതില് ചോര്ച്ചയും കണ്ടെത്തിയിട്ടുണ്ട്. ടോക്യോയുടെ 160 കിലോമീറ്റര് വടക്ക് സ്ഥിതി ചെയ്യുന്ന ഒരു പ്രധാന ആണവോര്ജ്ജ ഉത്പാദന കേന്ദ്രമായ ഫുകുഷിമ ദൈചിയിലെ 5 ആണവ റിയാക്ടറുകളില് ഒന്നില് നിന്നും ആണവ ഇന്ധനം ചോര്ച്ച ഉണ്ടായി. ഈ റിയാക്ടറിലും ഇചിരോ ഫുജിസാകി എന്ന മറ്റൊരു ആണവ നിലയത്തിലും ശീതീകരണ സംവിധാനം തകരാറിലായി എന്ന് അമേരിക്കയിലെ ജപ്പാന് അംബാസഡര് അഭിപ്രായപ്പെട്ടു. ഇവയില് ഒന്നിലെ ശീതീകരണ പ്രക്രിയയ്ക്ക് ഉപയോഗിക്കുന്ന വെള്ളത്തിന്റെ താപനില 100 ഡിഗ്രിക്ക് മേലെ ആയി. ഈ ആണവ നിലയങ്ങളുടെ 10 കിലോമീറ്റര് ചുറ്റളവില് താമസിക്കുന്ന ജനങ്ങളോട് ഒഴിഞ്ഞു പോകുവാന് സര്ക്കാര് ആവശ്യപ്പെട്ടിട്ടുണ്ട്. ജപ്പാനില് ആണവ അടിയന്തരാവസ്ഥ പ്രഖ്യാപിച്ചു.
ഈ ആണവ നിലയങ്ങളിലെ റിയാക്ടറുകളിലെ സമ്മര്ദം വര്ധിച്ചതിനാല് ഇവയിലെ വാല്വുകള് തുറക്കുവാന് ജപ്പാന് ആണവ സുരക്ഷ ഏജന്സി അധികൃതരോട് ആവശ്യപ്പെട്ടിട്ടുണ്ട്. ഇവയിലെ അധിക താപനില കാരണം വെള്ളം തിളയ്ക്കുകയും, അധികമായ സമ്മര്ദ്ദം ഉണ്ടാവുകയും ചെയ്തു. റിയാക്ടറുകളിലെ പ്രധാന കണ്ട്രോള് മുറികളില് അണു പ്രസരണം സാധാരണ അണു പ്രസരണത്തില് നിന്നും ആയിരം മടങ്ങ് വര്ധിച്ചതായി റിപ്പോര്ട്ടുകള് സൂചിപ്പിക്കുന്നു. ആണവ നിലയങ്ങള് അടച്ചാലും അവയിലെ ആണവ ഇന്ധനം ഉടന് തന്നെ നിര്വീര്യം ആകുന്നില്ല. എന്നാല് ഇത് വരെ ആണവ അപകടങ്ങള് ഒന്നും തന്നെ റിപ്പോര്ട്ട് ചെയ്തിട്ടില്ല. ഈ ആണവ നിലയങ്ങളുടെ പ്രവര്ത്തനം നിലച്ചതോടെ പത്തു ലക്ഷത്തില് അധികം ആളുകള് വൈദ്യുതി ഇല്ലാതെ ബുദ്ധിമുട്ടില് ആയി.
ജപ്പാനില് തന്നെ ഹിരോഷിമയും നാഗസാക്കിയും ഈ ഊര്ജ്ജ രൂപത്തിന്റെ നശീകരണ ശേഷി ലോകത്തെ ബോധ്യപ്പെടുത്തിയിട്ടുണ്ട്. അത്യന്തം വികിരണ ശേഷി ഉള്ളതായ ഈ പ്രക്രിയ ഇത്തരം ഒരു പ്രകൃതി ദുരന്തത്തില് എങ്ങനെ സുരക്ഷിതമായി സൂക്ഷിക്കാമെന്നുള്ളത് ഇപ്പോഴും ഒരു സമസ്യയായി തുടരുന്നു.
- ലിജി അരുണ്
വാര്ത്തകള് കേരളം
|
കലാ സാഹിത്യം ലേഖനങ്ങള്
മഞ്ഞ (മാഗസിന്) |
കോളംസ് പള്സ്
പച്ച (പരിസ്ഥിതി) |
മറ്റ് പംക്തികള് ചരമം |
