ഡമാസ്ക്കസ്: കലാപം തുടരുന്ന സിറിയയില് 32 കുട്ടികള് കൊല്ലപ്പെട്ടു. കലാപം അടിച്ചമര്ത്താനുള്ള സൈനിക നടപടിക്കിടയിലാണ് കുട്ടികള് കൊല്ലപെട്ടത് എന്നാണ് റിപ്പോര്ട്ട്. കഴിഞ്ഞ വര്ഷം പ്രസിഡന്റ് ബാഷല് അല് അസാദിനെതിരെ തുടങ്ങിയ പ്രക്ഷോഭം ഇപ്പോഴും തുടരുകയാണ് പ്രക്ഷോഭകരും സൈന്യവും തമ്മിലുള്ള ഏറ്റുമുട്ടലില് 90 പേര് സിറിയയില് കൊല്ലപ്പെട്ടതായി യു. എന്. സംഘം കണ്ടെത്തി. കലാപം ആരംഭിച്ചതിനുശേഷം രാജ്യത്ത് നടക്കുന്ന ഏറ്റവും ഭീകരമായ കൂട്ടക്കുരുതിയാണിതെന്നാണ് പറയുന്നത്. അന്താരാഷ്ട്ര നിയമത്തിന്റെ നഗ്നമായ ലംഘനമാണ് സിറിയയില് നടന്നതെന്നും സൈന്യം നടത്തിയ ക്രൂരകൃത്യത്തെ അപലപിക്കുന്നതായും ഉടന് തന്നെ അന്താരാഷ്ട്ര നിയമം വഴി നടപടി സ്വീകരിക്കുമെന്നും യു. എന്. സെക്രട്ടറി ജനറല് ബാന് കി മൂണ് പറഞ്ഞു.
ഇസ്ലാമാബാദ്: പാക്കിസ്ഥാനില് സോഷ്യല് നെറ്റ്വര്ക് ട്വിറ്ററിനു അപ്രഖ്യാപിത നിരോധനം. പാക്കിസ്ഥാനില് പല ഭാഗങ്ങളിലും ട്വിറ്റര് നിരോധിച്ചിരിക്കുകയാണ്. എന്നാല് ട്വിറ്റര് നിരോധിക്കാന് നിര്ദേശം നല്കിയിട്ടില്ലെന്നാണ് ആഭ്യന്തരമന്ത്രി റഹ്മാന് മാലികിന്റെ വാദം. എന്നാല്, ഇസ്ലാമാബാദും റാവല് പിണ്ടിയും ഉള്പ്പെടെ പ്രമുഖ നഗരങ്ങളിലൊന്നും ട്വിറ്റര് ഉപയോഗിക്കാന് കഴിയുന്നില്ലെന്നു പരാതിയുണ്ട് വ്യാപകമായുണ്ട്. കംപ്യൂട്ടറുകളിലും മൊബൈല് ഫോണിലും ട്വിറ്റര് ഉപയോഗിക്കാനുള്ള സൗകര്യം അപ്രഖ്യാപിതമായി വിലക്കി എന്നാണ് സൂചന.
