ബോളിവുഡ്‌ താരം ജെനീലിയ ഡിസൂസ വിവാഹിതയായി. ജെനീലിയയും കേന്ദ്ര മന്ത്രിയും മുന്‍ മഹാരാഷ്ട്രാ മുഖ്യമന്ത്രിയുമായ വിലാസ്‌ റാവു ദേശ്മുഖിന്റെ മകനും അഭിനേതാവുമായ റിതേഷ് ദേശ്മുഖും തമ്മിലുള്ള ദീര്‍ഘ നാളത്തെ പ്രണയത്തിന് സാഫല്യമായ വിവാഹത്തില്‍ ഒട്ടേറെ രാഷ്ട്രീയ നേതാക്കളും സിനിമാ രംഗത്തെ പ്രമുഖരും പങ്കെടുത്തു. ഷാറൂഖ് ഖാന്‍, അഭിഷേക് ബച്ചന്‍, ജയാബച്ചന്‍, അജയ്‌ ദേവ്ഗന്‍, കാജോള്‍, ജാക്കി ഷ്രോഫ്, ലിയാണ്ടര്‍ പെയ്സ്‌, അക്ഷയ്കുമാര്‍, അസിന്‍, മഹാരാഷ്ട്രാ മുഖ്യമന്ത്രി പൃഥ്വിരാജ് ചൌഹാന്‍, സംസ്ഥാന കോണ്ഗ്രസ് അദ്ധ്യക്ഷന്‍ കൃപാശങ്കര്‍ സിംഗ്, ശിവസേനാ നേതാവ്‌ ഉദ്ദവ് താക്കറെയുടെ മകന്‍ ആദിത്യ താക്കറെ എന്നിങ്ങനെ ഒട്ടേറെ പേര്‍ പങ്കെടുത്ത വിവാഹം രണ്ടു ഘട്ടമായാണ് നടന്നത്.
പരമ്പരാഗത മറാത്തി ആചാര പ്രകാരം നടന്ന വിവാഹത്തിന് ശേഷം ബാന്ദ്രയിലെ സെന്റ്‌ ആന്‍സ്‌ പള്ളിയില്‍ കത്തോലിക്കാ ആചാര പ്രകാരവും ഇവര്‍ വിവാഹിതരായി. മുംബൈ സാന്താക്രൂസ് ഗ്രാന്‍ഡ്‌ ഹയാത്ത് ഹോട്ടലിലായിരുന്നു ആഡംബര പൂര്‍ണ്ണമായ ഈ താര വിവാഹം.
“തുജെ മേരി കസം” എന്ന ഇവരുടെ ആദ്യ ചിത്രത്തിന്റെ സെറ്റില്‍ വെച്ചാണ് ഇവാര്‍ ആദ്യമായി പ്രണയത്തിലായത് എന്ന് ബോളിവുഡ്‌ ഗോസിപ്പുകള്‍ പറയുന്നു. പിന്നീട് ഇവര്‍ ഇരുവരും ചേര്‍ന്ന് “മസ്തി” എന്ന ഒരു കോമഡി സിനിമയും അഭിനയിക്കുകയുണ്ടായി.
- ജെ.എസ്.
