കല അബുദാബി യുടെ ഈ വര്‍ഷത്തെ വാര്‍ഷികാ ഘോഷങ്ങള്‍ ‘കലാഞ്ജലി 2009 ‘ എന്ന പേരില്‍ നവംബര്‍ 30 മുതല്‍ ഡിസംബര്‍ 24 വരെ നീണ്ടു നില്‍ക്കുന്ന വിവിധ പരിപാടികളോടെ അബുദാബിയില്‍ ആരംഭിച്ചു. കലാഞ്ജലിയുടെ ഭാഗമായി ഒരുക്കുന്ന ‘ഫിലിം ഫെസ്റ്റ് ‘ യു. എ. ഇ. യിലെ സിനിമാ പ്രവര്‍ത്തകരുടെ ഹ്രസ്വ സിനിമകളുടെ പ്രദര്‍ശനമാണ്. ഫിലിം ഫെസ്റ്റ്, പ്രശസ്ത ബാല താരങ്ങളായ നിരഞ്ജന വിജയനും നിവേദിത വിജയനും ചേര്‍ന്ന് ഉദ്ഘാടനം ചെയ്യും.
 
ഡിസംബര്‍ 11 വെള്ളിയാഴ്ച വൈകീട്ട് 8 മണിക്ക് അബുദാബി കേരളാ സോഷ്യല്‍ സെന്ററില്‍ നടക്കുന്ന ഫിലിം ഫെസ്റ്റില്‍ 5 ഹ്രസ്വ സിനിമകള്‍ പ്രദര്‍ശിപ്പിക്കും. അല്‍ഐന്‍ ഇന്‍ഡ്യന്‍ സോഷ്യല്‍ സെന്‍റര്‍ സാഹിത്യ വിഭാഗം സംഘടിപ്പിച്ച ഹ്രസ്വ സിനിമ പ്രദര്‍ശന മത്സരത്തില്‍ ഒന്നാം സ്ഥാനം നേടിയ അയൂബ് കടല്‍മാട് സംവിധാനം ചെയ്ത രാത്രി കാലം, ശങ്കര്‍ ശ്രീലകം സംവിധാനം ചെയ്തു രണ്ടാം സ്ഥാനം നേടിയ Eയുഗം, ഷാജു മലയില്‍ സംവിധാനം ചെയ്ത ദൂരം, ആയൂര്‍ ശ്രീകുമാര്‍ സംവിധാനം ചെയ്തിരുന്ന ഓണച്ചെപ്പ്, ക്രയോണ്‍ ജയന്‍ സംവിധാനം ചെയ്ത കാലിഡോസ്കോപ് എന്നിവയാണു പ്രദര്‍ശിപ്പിക്കുക. സിനിമകളിലെ നടീ നടന്‍മാരും പിന്നണി പ്രവര്‍ത്തകരും പരിപാടിയില്‍ പങ്കെടുക്കും.
 
വിവരങ്ങള്‍ക്ക് വിളിക്കുക : ക്രയോണ്‍ ജയന്‍ 050 29 86 326, സുരേഷ് കാടാച്ചിറ 050 57 13 536
 
– പി. എം. അബ്ദുല്‍ റഹിമാന്‍, അബുദാബി
 
 

ഇന്റര്‍നാഷണല്‍ ഫിലിം ഫ്രാറ്റേണിറ്റി ഓഫ് ഒമാന്‍ ഏക ദിന സിനിമാ ആസ്വാദന ശില്‍പ്പശാല നടത്തുന്നു. ഓസ്ക്കാര്‍ പുരസ്ക്കാര ജേതാവ് റസൂല്‍ പൂക്കുട്ടി ശില്‍പ്പശാലയില്‍ പങ്കെടുത്ത് സിനിമയിലെ ശബ്ദ മിശ്രണത്തിന്റെ സാങ്കേതിക വശങ്ങള്‍ വിശദീകരിക്കും. സിനിമയുടെ വിവിധ ഘടകങ്ങളെ കുറിച്ച് ഡോ. ജബ്ബാര്‍ പട്ടേല്‍ ക്ലാസെടുക്കും.
 
ക്ലാസിക് സിനിമയിലെയും സമകാലിക സിനിമയിലെയും ആഖ്യാന ശൈലികളിലെ വ്യത്യസ്തതകള്‍ ഉദാഹരണ സഹിതം ചര്‍ച്ചയ്ക്ക് വിഷയമാക്കും. ലോക സിനിമാ ചരിത്രത്തിലെ നാഴിക കല്ലുകളായ ക്ലാസിക് ചിത്രങ്ങളുടെ പ്രദര്‍ശനവും ചര്‍ച്ചയും നടക്കും. നവമ്പര്‍ ആറിന് രാവിലെ എട്ട് മണിക്ക് വാഡി കബീറിലെ ക്രിസ്റ്റല്‍ ഹോട്ടല്‍ അപ്പാര്‍ട്ട്മെന്റ്സിലെ സാഫിര്‍ ഹാളിലാണ് ശില്പ ശാല നടത്തുവാന്‍ നിശ്ചയിച്ചത് എങ്കിലും വേദിയില്‍ മാറ്റം ഉണ്ടാവാം എന്ന് ഭാരവാഹികള്‍ അറിയിച്ചു.

കുവൈറ്റ് : കാവാലം നാരായണ പണിക്കരുടെ പ്രസിദ്ധമായ നാടകം “അവനവന്‍ കടമ്പ” കുവൈറ്റില്‍ അരങ്ങേറി. കേരളത്തിലെ എഞ്ചിനിയറിംഗ് കോളജുകളിലെ പൂര്‍വ്വ വിദ്യാര്‍ത്ഥികളുടെ സംഘടനകളുടെ പൊതു വേദിയായ കുവൈറ്റ് എഞ്ചിനിയേഴ്‌സ് ഫോറത്തിന്റെ ആഭിമുഖ്യത്തില്‍ നടന്ന ഓണാഘോഷ ത്തോടനു ബന്ധിച്ചായിരുന്നു ഫോറം അംഗങ്ങള്‍ നാടകം അവതരിപ്പിച്ചത്.
 

 
കുവൈറ്റില്‍ സന്ദര്‍ശനം നടത്തുന്ന കാവാലം നാരായണ പണിക്കരുടെ നേരിട്ടുള്ള ശിക്ഷണത്തിലാണ് മലയാളി എഞ്ചിനിയര്‍മാര്‍ നാടകം പരിശീലിച്ചത്. കേരളത്തിനു പുറത്ത് ഈ നാടകം ആദ്യമായാണ് അവതരിപ്പിക്കപ്പെടുന്നത് എന്ന് നടനും, നാടക സംഘം പ്രവര്‍ത്തകനും, പാലക്കാട് എന്‍. എസ്. എസ്. കോളജ് ഓഫ് എഞ്ചിനിയറിംഗിലെ പൂര്‍വ്വ വിദ്യാര്‍ത്ഥിയുമായ അരവിന്ദന്‍ എടപ്പാള്‍ അറിയിച്ചു. കലാലയ കാലഘട്ടത്തില്‍ പാലക്കാട്ടെ നാടക സംഘത്തില്‍ സജീവമായിരുന്ന തനിക്ക് നീണ്ട പ്രവാസ ജീവിതത്തിന്റെ വിരസതയ്ക്കിടയില്‍ വേദിയിലേക്കുള്ള ഈ തിരിച്ചു പോക്കിനുള്ള അവസരം ലഭിച്ചത് ഒരു വഴിത്തിരിവായി. കാവാലം നാരായണ പണിക്കരുടെ നേതൃത്വത്തില്‍ നടന്ന നാടക കളരി തങ്ങളെ ഏറെ ആവേശ ഭരിതരാക്കിയിട്ടുണ്ട്. നാടക പ്രവര്‍ത്തനങ്ങള്‍ തുടര്‍ന്നും സജീവമായി മുന്നോട്ട് കൊണ്ടു പോവാന്‍ തന്നെയാണ് കെ. ഇ. എഫ്. തീരുമാനിച്ചിരിക്കുന്നത് എന്നും അരവിന്ദന്‍ എടപ്പാള്‍ അറിയിച്ചു.