ന്യൂയോര്‍ക്ക്: അണ്ഡാശയത്തില്‍ ക്യാന്‍സര്‍ ബാധയെ തുടര്‍ന്ന് പ്രശസ്ത ബോളീവുഡ് താരം മനീഷ കൊയ്‌രാളക്ക് നടത്തിയ ശസ്ത്രക്രിയ വിജയകരമാണെന്ന സന്ദേശം ലഭിച്ചതായി മാനേജര് സുബ്രതോ ഘോഷ്‍. തിങ്കാളാഴ്ച രാവിലെ ഒമ്പതു മണിയോടെ ആണ് ന്യൂയോര്‍ക്കിലെ ആശുപത്രിയില്‍ വച്ച് നടിയെ ശസ്ത്രക്രിയക്ക് വിധേയയാക്കിയത്. മനീഷയ്ക്കൊപ്പം മാതാപിതാക്കളും സഹോദരനും അടുത്ത ചില സുഹൃത്തുക്കളും ഉണ്ട്. ആരോഗ്യ പ്രശ്നങ്ങളെ തുടര്‍ന്ന് നവംബര്‍ 28 നു മനീഷയെ മുംബൈയിലെ ആശുപത്രിയില്‍ പ്രവേശിപ്പിച്ചിരുന്നു. ഇവിടെ നടത്തിയ പരിശോധനയിലാണ് നടിക്ക് ക്യാന്‍സര്‍ ബാ‍ധയുണ്ടെന്ന് സ്ഥിരീകരിച്ചത്. തുടര്‍ന്നാണ് മനീഷയെ വിദഗ്ദ്ധ ചികിത്സയ്ക്കായി അമേരിക്കയിലേക്ക് കൊണ്ടു പോയത്.
