എം. ടി. യുടെ ഇതിഹാസ നോവലായ രണ്ടാമൂഴം അഭ്രപാളിയിലേക്ക് പകര്‍ത്താന്‍ ഒരുങ്ങുന്നു. പഴശ്ശിരാജയ്ക്ക് ശേഷം എം. ടി. – ഹരിഹരന്‍ കൂട്ടുകെട്ട് ഒരിയ്ക്കല്‍ കൂടി ഒന്നിക്കുമ്പോള്‍ മറ്റൊരു വമ്പന്‍ ചിത്രം പിറക്കുമെന്ന പ്രതീക്ഷയിലാണ് പ്രേക്ഷകര്‍. ഇതിനു മുമ്പും രണ്ടാമൂഴം സിനിമയാകുമെന്ന വാര്‍ത്തകള്‍ വന്നിട്ടുണ്ട്. 1984ല്‍ പ്രസിദ്ധീകരിയ്ക്കപ്പെട്ട നോവല്‍ ഇനിയെങ്കിലും സിനിമയാകുമെന്ന പ്രതീക്ഷയ്ക്ക് വക നല്‍കിക്കൊണ്ട് കടലാസു പണികള്‍ നീങ്ങി തുടങ്ങി എന്നാണു റിപ്പോര്‍ട്ട്. രണ്ടാമൂഴം ബിഗ് സ്‌ക്രീനിലേക്ക് പകര്‍ത്തുമ്പോഴും എം. ടി. തന്നെയാണ് തിരക്കഥ രചിയ്ക്കുന്നത്. പഴശ്ശിരാജ സംവിധാനം ചെയ്ത ഹരിഹരന്‍ തന്നെയാണ് ഇതിന്റെയും സംവിധായകന്‍. ഭീമനായി മോഹന്‍ലാല്‍ വേഷമിടും എന്നാണ് സൂചന. കൂടാതെ ഭീമന്റെ ആജീവനാന്ത ശത്രുവും കൗരവ നായകനുമായ ദുര്യോധനന്റ വേഷത്തില്‍ മമ്മൂട്ടിയും എത്തും. അങ്ങിനെ വന്നാല്‍ രണ്ടു താര രാജാക്കന്മാരുടെ വമ്പന്‍ മല്‍സരം നമുക്കു പ്രതീക്ഷിക്കാം.
