ഷാര്‍ജയിലും ദുബായിലുമായി ചിത്രീകരണം പൂര്‍ത്തിയായ “ചിത്രങ്ങള്‍” എന്ന ടെലി സിനിമ, യു. എ. ഇ. യിലെ കലാസ്വാദ കര്‍ക്കായി പ്രദര്‍ശിപ്പിക്കുന്നു. മെയ്‌ 7 വെള്ളിയാഴ്ച വൈകീട്ട് 6 മണിക്ക്, ഷാര്‍ജ എമിറേറ്റ്സ് നാഷണല്‍ സ്കൂളില്‍ ഒരുക്കുന്ന പ്രദര്‍ശനത്തില്‍ സമൂഹത്തിലെ വിവിധ തുറകളിലുള്ള പ്രമുഖര്‍ സംബന്ധിക്കും.
പ്രവാസ ലോകത്തെ ശ്രദ്ധേയനായ കലാകാരന്‍ മുഷ്താഖ് കരിയാടന്‍ സംവിധാനം ചെയ്ത ചിത്രങ്ങള്‍, സമകാലിക സംഭവങ്ങള്‍ക്ക് നേരെ പിടിക്കുന്ന ഒരു കണ്ണാടിയാണ്.
സ്പന്ദനം എന്ന ടെലി സിനിമക്ക് ശേഷം ബഷീര്‍ കൊള്ളന്നൂര്‍ കഥയും തിരക്കഥയും സംഭാഷണവും രചിക്കുന്ന ഈ ടെലി സിനിമയില്‍, ഗള്‍ഫിലെ നാടക വേദികളിലും മിനി സ്ക്രീനിലും മികച്ച പ്രകടനങ്ങള്‍ കാഴ്ച വെച്ച കലാകാരന്‍ മാരായ റാഫി പാവറട്ടി, നിഷാദ് അരിയന്നൂര്‍, രാഘവ് കോക്കുല്‍, സഗീര്‍, സിയാദ്, പി. എം. അബ്ദുല്‍ റഹിമാന്‍, ജോഷി തോമസ്‌, മുസദ്ദിഖ്, ഫൈസല്‍ പുറമേരി, തോമസ്‌ പോള്‍ മാവേലിക്കര, ചന്ദ്രഭാനു, ഷഫീര്‍, വിദ്യാ ഹേമന്ത്, ബീനാ റജി, മേഘാ ദാസ്, ആര്യാ സനു തമ്പി, രേവതി, കൃഷ്ണ പ്രിയ, ഷിനി രാഹുല്‍, സുമാ സനി, ഷഫ്നാ ഇല്യാസ് തുടങ്ങി മുപ്പതോളം കലാകാരന്മാര്‍ വേഷമിടുന്നു. ക്യാമറ: ഖമറുദ്ധീന്‍ വെളിയംകോട്, നിര്‍മ്മാണം: അടയാളം ക്രിയേഷന്‍സ്.
ദുബായ്‌ ആസ്ഥാനമായുള്ള ഏഷ്യാ വിഷന്‍ അഡ്വര്‍ട്ടൈസിംഗ് ഏജന്‍സിയും, റേഡിയോ ഏഷ്യയും ചേര്‍ന്ന് ഓണ്‍ ലൈനിലൂടെ നടത്തിയ ആഗോള വോട്ടെടുപ്പില്‍ മികച്ച ടെലി സിനിമയായി തിരഞ്ഞെടുത്തത് മുഷ്താഖ് കരിയാടന്‍ സംവിധാനം ചെയ്ത ‘ആര്‍പ്പ്’ എന്ന ടെലി സിനിമ യായിരുന്നു. ചിത്രങ്ങള്‍ ഈ മാസം തന്നെ മലയാളത്തിലെ പ്രമുഖ ചാനലില്‍ സംപ്രേഷണം ചെയ്യും.
കലയും സാഹിത്യവും സംഗീതവും നൃത്തവും എല്ലാം ചേര്‍ന്ന് എല്ലാ തരം പ്രേക്ഷകര്‍ക്കും രസിക്കും വിധമാണ് മുഷ്താഖ് കരിയാടന്‍ ഈ ടെലി സിനിമ ഒരുക്കിയിരിക്കുനത്. യു. ഏ. ഇ. യില്‍ നിന്നും സംപ്രേഷണം ചെയ്യുന്ന എന്‍ . ടി. വി. യില്‍ (ഇ-വിഷന്‍ – ചാനല്‍ 144) “പ്രവാസ സ്പന്ദനം” എന്ന പരിപാടിയില്‍ വ്യാഴാഴ്ച രാത്രി 8:30ന് മുഷ്താഖുമായുള്ള അഭിമുഖം സംപ്രേഷണം ചെയ്യും. ഇതേ പരിപാടിയുടെ പുന: സംപ്രേഷണം വെള്ളിയാഴ്ച കാലത്ത് 11 ന് ഉണ്ടായിരിക്കും.
പ്രവാസി സംരംഭമായി ഒരു ടെലി ഫിലിം കൂടി ഒരുങ്ങുന്നു. ഷാര്‍ജയിലും അജ്മാനിലുമായി ചിത്രീകരണം പുരോഗമിക്കുന്ന “അഗ്നി പരീക്ഷ” എന്ന ടെലി ഫിലിം സ്വപ്നങ്ങളുടേയും യാഥാര്‍ത്ഥ്യ ങ്ങളുടേയും ഇടയില്‍ കണക്കു കൂട്ടലുകളുമായി പ്രവാസ ലോകത്ത്‌ ജീവിതം മുന്നോട്ടു കൊണ്ടു പോകുന്ന ഒരു ചെറുപ്പക്കാരന്റെയും, വിവാഹത്തോടെ അവന്റെ ജീവിത ത്തിലേക്ക്‌ കടന്നു വരുന്ന, വ്യത്യസ്ഥമായ ജീവിത വീക്ഷണങ്ങളും പശ്ചാത്തലവുമുള്ള ഒരു പെണ്‍കുട്ടിയുടെയും ജീവിതത്തില്‍ ഉണ്ടാകുന്ന സന്തോഷ ങ്ങളുടേയും ആത്മ സംഘര്‍ഷങ്ങളുടേയും കഥ പറയുന്നു.
അബുദാബിയിലെ കലാ പ്രവര്‍ത്തകരുടെ കൂട്ടായ്മയായ ‘നാടക സൌഹൃദം’ അവതരിപ്പിക്കുന്ന ടെലി സിനിമ ‘ജുവൈരയുടെ പപ്പ’ യുടെ പ്രിവ്യൂ ഷോ ജനുവരി 24 (ഞായറാഴ്ച) രാത്രി 8:30 മണിക്ക് അബുദാബി കേരളാ സോഷ്യല്‍ സെന്ററില്‍ നടന്നു. യു. എ. ഇ. യിലെ കലാ സാംസ്കാരിക മാധ്യമ രംഗത്തെ പ്രമുഖര്‍ ചടങ്ങില്‍ സംബന്ധിച്ചു. പ്രശസ്ത കഥാകൃത്ത് ഗിരീഷ് കുമാര്‍ കുനിയില്‍ രചിച്ച കഥയെ ആസ്പദമാക്കി, മാമ്മന്‍ കെ. രാജന്‍ സംവിധാനം ചെയ്ത ‘ജുവൈരയുടെ പപ്പ’ യില്‍ യു. എ. ഇ. യിലെ ശ്രദ്ധേയരായ കലാ കാരന്മാര്‍ വേഷമിടുന്നു. 
