വി. കെ. പ്രകാശ് സംവിധാനം ചെയ്യുന്ന ട്രിവാന്‍ഡ്രം ലോഡ്ജ് എന്ന ചിത്രത്തില്‍ തെസ്നി ഖാന്‍ അഭിസാരികയുടെ വേഷം ചെയ്യുന്നു. ബ്യൂട്ടിഫുളില്‍ ഹോം നേഴ്സിന്റെ വേഷത്തില്‍ തെസ്നി ശ്രദ്ധിക്കപ്പെട്ടിരുന്നു. ബോട്ടു ജെട്ടിയിലും തെരുവിലുമെല്ലാം കറങ്ങി നടന്ന് അവശ്യക്കാരെ കണ്ടെത്തുന്ന കനക എന്ന അഭിസാരികയുടെ വേഷമാണ് ചിത്രത്തില്‍ തെസ്നി ഖാന്‍ അവതരിപ്പിക്കുന്നത്. സിനിമയിലും സീരിയലുകളിലും കോമഡി ഷോകളിലും സജീവമാണെങ്കിലും തെസ്നി ഖാന്‍ അവതരിപ്പിച്ച കഥാപാത്രങ്ങളില്‍ തികച്ചും വിഭിന്നമാണ് ഈ വി. കെ. പി. ചിത്രത്തിലെ അഭിസാരികയുടെ വേഷം. അഭിസാരികമാരുടെ ജീവിതത്തിലേക്കും അവരുടെ പ്രശ്നങ്ങളിലേക്കും ഈ കഥാപാത്രം കടന്നു ചെല്ലുന്നു.
അടുത്തയിടെ ഇറങ്ങിയ ഡയമണ്ട് നെക്ലസ് എന്ന ലാല്‍ജോസ് ചിത്രത്തിലെ കുശുമ്പിയായ ഹെഡ് നേഴ്സിന്റെ വേഷവും തെസ്നിയ്ക്ക് ഏറേ പ്രശംസ നേടി കൊടുത്തിരുന്നു. സ്വാഭാവികത നിറഞ്ഞതും ചടുലമായതുമായ സംഭാഷണവും ഒപ്പം ഹാസ്യം അവതരിപ്പിക്കുവാനുള്ള കഴിവും മറ്റേതൊരു താരത്തേക്കാളും തെസ്നി ഖാനെ വ്യത്യസ്ഥയാക്കുന്നു.
മോഡേണ്‍ വേഷങ്ങളിലും ഒപ്പം നാടന്‍ കഥാപാത്രമായും തെസ്നി നിരവധി ചിത്രങ്ങളില്‍ പ്രത്യക്ഷപ്പെട്ടിട്ടുണ്ട്. ഏഷ്യാനെറ്റിലെ സിനിമാലയിലൂടെ ആണ് തെസ്നി ഖാന്‍ പ്രേക്ഷകര്‍ക്ക് പ്രിയങ്കരിയായത്.
