മുംബൈ: പാക്കിസ്ഥാനില്‍ നിന്നും ഉള്ള ഐ. സി. സി. അമ്പയര്‍ ആസാദ് റൌഫ് വിവാഹ വാഗ്ദാനം നല്‍കി തന്നെ ലൈംഗികമായി പീഢിപ്പിച്ചെന്ന് മുംബൈ മോഡല്‍ ലീന കപൂര്‍. ഇതു സംബന്ധിച്ച് ലീന കപൂര്‍ പരാതി നല്‍കി. ശ്രീലങ്കയില്‍ വച്ചാണ് ആസാദ് റൌഫിനെ താന്‍ ആദ്യമായി കണ്ടു മുട്ടിയതെന്നും മൂന്നു ദിവസം തങ്ങള്‍ ഒരുമിച്ചു താമസിച്ചുവെന്നും ലീന കപൂര്‍ വ്യക്തമാക്കി. തൂടര്‍ന്ന് ടെലിഫോണ്‍ നമ്പറുകള്‍ പരസ്പരം കൈമാറുകയും ചെയ്തു. ആറു മാസമായി തങ്ങള്‍ പ്രണയത്തിലായിരുന്നു എന്നും ശ്രീലങ്കയിലും മുംബൈയിലും വച്ച് റൌഫ് തന്നെ പല തവണ ലൈംഗികമായി ഉപയോഗിച്ചതായി ലീന പറയുന്നു. വിവാഹം കഴിക്കാമെന്ന് ഉറപ്പു നല്‍കിയ റൌഫ് പിന്നെ അതില്‍ നിന്നും പിന്മാറുകയായിരുന്നു എന്നും ലീന ആരോപിച്ചു.
എന്നാല്‍ ലീന കപൂറിന്റെ ആരോപണങ്ങളെ റൌഫ് നിഷേധിച്ചു. മോഡലിനൊപ്പം ചേര്‍ന്ന് നിന്ന് ചില ചിത്രങ്ങള്‍ എടുത്തിട്ടുണ്ടെന്നും ബാക്കിയെല്ലാം പ്രശസ്തിക്കു വേണ്ടി ഉന്നയിക്കുന്ന ആരോപണങ്ങള്‍ ആണെന്നും റൌഫ് വ്യക്തമാക്കി. ഇരുവരുടേയും നിരവധി ചിത്രങ്ങള്‍ ഇതിനോടകം പുറത്തു വന്നിട്ടുണ്ട്.
