കോഴിക്കോട്: സച്ചാര് കമ്മിറ്റി ശുപാര്ശയുടെ ഭാഗമായി രൂപീകരിച്ച പാലോളി കമ്മിറ്റിയുടെ നിര്ദേശ പ്രകാരം സംസ്ഥാന സര്ക്കാര് നടപ്പാക്കുന്ന മദ്രസ അദ്ധ്യാപക ക്ഷേമനിധി പദ്ധതി 26ന് ആരംഭിക്കും. തപാല് വകുപ്പ്, കോഴിക്കോട് ജില്ലാ സഹകരണ ബാങ്ക് എന്നിവയുടെ സഹകരണ ത്തോടെയാണു മദ്രസ അദ്ധ്യാപകരുടെയും മദ്രസ കമ്മിറ്റി മാനേജ് മെന്റുകളുടെയും പങ്കാളിത്തത്തോടെ പദ്ധതി നടപ്പാക്കുന്നത്. 20 വയസ്സ് തികഞ്ഞവരും മദ്രസ അദ്ധ്യാപക ജോലിയില് ഏര്പ്പെട്ടവരുമായ എല്ലാവര്ക്കും പദ്ധതിയില് അംഗത്വം ലഭിക്കും. 65 വയസ്സു വരെ ജോലിയില് തുടര്ന്നു കൊണ്ടു ക്ഷേമനിധി അംഗത്വം നിലനിര്ത്താം.
ക്ഷേമനിധി വിഹിതമായി മദ്രസ അദ്ധ്യാപകരും മദ്രസ മാനേജ്മെന്റ് കമ്മിറ്റിയും പ്രതിമാസം 50 രൂപ വീതം സൗകര്യ പ്രദമായ തപാല് ഓഫിസുകളില് അടയ്ക്കണം. ക്ഷേമനിധിയില് വീഴ്ച കൂടാതെ അഞ്ചു വര്ഷം പൂര്ത്തിയാ ക്കുന്നവര്ക്കു മിനിമം പെന്ഷനായ 500 രൂപ പ്രതിമാസം ലഭിക്കും. 30 വര്ഷം അംഗത്വം തുടരുന്ന അധ്യാപകന് 1,200 രൂപയ്ക്കു മേല് പ്രതിമാസ പെന്ഷന് ലഭിക്കും. ഇവരുടെ കാലശേഷം കുടുംബത്തിനു രണ്ടു ലക്ഷം രൂപ വരെ നിക്ഷേപ ത്തുകയായും ലഭിക്കും. 40 വര്ഷം അംഗത്വം തുടരുന്നവര്ക്കു 3,100 രൂപയ്ക്കു മുകളില് പെന്ഷനായി ലഭിക്കും. കൂടാതെ, നിക്ഷേപ ത്തുകയായ നാലര ലക്ഷത്തോളം രൂപയും കിട്ടും. കേരളത്തില് ഇതു വരെ ആവിഷ്കരിച്ച സമാന പദ്ധതി കളെക്കാള് മെച്ചപ്പെട്ട ആനുകൂല്യങ്ങള് ഈ പദ്ധതി പ്രകാരം ഉറപ്പു നല്കുന്നതായി ബന്ധപ്പെട്ടവര് പറഞ്ഞു.
മദ്രസ അദ്ധ്യാപകരുടെ ജീവിതം സുരക്ഷിത മാക്കുന്നതിനു വേണ്ടിയുള്ള പദ്ധതിയില് സംസ്ഥാനത്തെ 49,000 ത്തോളം മദ്രസ അദ്ധ്യാപകര്ക്കു പ്രയോജനം ലഭിക്കും. പെന്ഷന് പദ്ധതിയുടെ സംസ്ഥാനതല അംഗത്വ വിതരണ ഉദ്ഘാടനവും, പദ്ധതിക്കായുള്ള സര്ക്കാര് ഫണ്ടിന്റെ വിതരണവും, കോഴിക്കോട് ടാഗോര് ഹാളില് ജൂണ് 26നു വൈകീട്ട് 4 മണിക്ക് മന്ത്രി പാലോളി മുഹമ്മദ് കുട്ടി നിര്വഹിക്കുമെന്നു സ്വാഗത സംഘം ചെയര്മാന് ജില്ലാ പഞ്ചായത്ത് പ്രസിഡന്റ് കെ. പി. കുഞ്ഞമ്മദ് കുട്ടി മാസ്റ്റര് വാര്ത്താ സമ്മേളനത്തില് അറിയിച്ചു.
പദ്ധതിയുടെ ഉദ്ഘാടന ച്ചടങ്ങില് സര്ക്കാര് അനുവദിച്ച ഫണ്ട്, കോഴിക്കോട് ജില്ലാ സഹകരണ ബാങ്ക് പ്രസിഡന്റ് എം. മെഹബൂബും, മദ്രസ അദ്ധ്യാപകരുടെ അംഗത്വ വരിസംഖ്യ സംസ്ഥാന ചീഫ് പോസ്റ്റ് മാസ്റ്റര് ജനറല് ശോഭാ കോശിയും സ്വീകരിക്കും. ഉദ്ഘാടന ത്തോടനുബന്ധിച്ചു ടാഗോര് ഹാളില് സജ്ജീകരിക്കുന്ന കൗണ്ടറുകളില് നിന്നു ക്ഷേമനിധി പെന്ഷന് അപേക്ഷാ ഫോറം വിതരണം ചെയ്യും. കലക്ടറേറ്റിലും ഒപ്പം കോഴിക്കോട് ജില്ലാ സഹകരണ ബാങ്കിന്റെ ശാഖകളിലും ഫോറം ലഭിക്കും. വാര്ത്താ സമ്മേളനത്തില് തപാല് വകുപ്പ് സീനിയര് സൂപ്രണ്ട് പി. രാമകൃഷ്ണന്, ക്ഷേമനിധി മാനേജര് വി. ആര്. രാജന് എന്നിവര് പങ്കെടുത്തു.
തൃശ്ശൂര് : സംസ്ഥാനത്ത് മണല്ക്ഷാമം രൂക്ഷമായതിനെ തുടര്ന്ന് കെട്ടിട നിര്മ്മാണം രംഗം സ്തംഭനാവസ്ഥ യിലേക്ക് നീങ്ങുന്നു. കെട്ടിട നിര്മ്മാണത്തില് ഏറ്റവും പ്രാധാന്യമുള്ള അസംസ്കൃത വസ്തുവായ മണല് ലഭിക്കാതായതോടെ പലയിടങ്ങളും കെട്ടിടങ്ങളുടെ നിര്മ്മാണ പ്രവര്ത്തനം മുടങ്ങി ക്കൊണ്ടിരിക്കുന്നു. മണല് ക്ഷാമം നേരിടുവാന് തുടങ്ങിയിട്ട് നാളുകള് ആയെങ്കിലും മഴ പെയ്തതോടെ നദികളില് നിന്നും മണലെടുക്കുവാന് സാധിക്കാതെ വന്നതോടെ ക്ഷാമം കൂടുതല് രൂക്ഷമായി.
കിളിരൂര് : തിരുനക്കര ശിവന് എന്ന കൊമ്പന് കിളിരൂരിനു സമീപം ഇടഞ്ഞു. കിളിരൂര് ക്ഷേത്രത്തിനു സമീപത്ത് തളച്ചിരുന്ന ആനയെ രണ്ടാം പാപ്പാന് ഉപദ്രവിച്ചതിനെ തുടര്ന്നാണ് ഇടഞ്ഞത്. നട പൂട്ടിയിരുന്ന ചങ്ങല ആന വലിച്ചു പൊട്ടിക്കുകയും അടുത്തുണ്ടായിരുന്ന മരം കുത്തി മറിച്ചിടുകയും ചെയ്തു. ആനയിടഞ്ഞ വാര്ത്ത പരന്നതോടെ ധാരാളം ആളുകള് ഓടി കൂടി. ഇതിനിടയില് മയക്കു വെടി വെയ്ക്കുവാന് ശ്രമിച്ചെങ്കിലും നാട്ടുകാര് തടഞ്ഞു. ആനയുടെ ഒന്നാം പാപ്പാന് വന്നാല് ആനയെ ശാന്തനാക്കുവാന് കഴിയും എന്ന് അവര് അറിയിച്ചു. ആനയെ ബന്ധനസ്ഥ നാക്കിയ ശേഷം രണ്ടാം പാപ്പനെ ഏല്പിച്ച് വീട്ടിലേക്ക് പോയ ഒന്നാം പാപ്പാന്റെ അസാന്നിധ്യത്തില് ആനയെ ചട്ടമാക്കുവാന് രണ്ടാം പാപ്പാന് ശ്രമിച്ചതാണ് ആനയെ പ്രകോപിതനാക്കിയത്.
കണ്ണൂര് : മഹാകവി പി. കുഞ്ഞിരാമന് നായര് സ്മാരക കവിതാ പുരസ്കാരം കവി പി. കെ. ഗോപിക്ക് സമ്മാനിച്ചു. “സുഷുംനയിലെ സംഗീതം” എന്ന കവിതാ സമാഹാര ത്തിനാണ് പുരസ്കാരം ലഭിച്ചത്. ജൂണ് 6നു മയ്യില് ഐ. എം. എന്. എസ്. ജി. എച്ച്. എസ്. സ്കൂളില് നടന്ന ചടങ്ങില് ഡോ. സുകുമാര് അഴീക്കോടാണ് പുരസ്കാരം സമ്മാനിച്ചത്. മന്ത്രി രാമചന്ദ്രന് കടന്നപ്പള്ളി ചടങ്ങ് ഉദ്ഘാടനം ചെയ്തു. പി. സ്മാരക ട്രസ്റ്റ്, കെ. വി. കുഞ്ഞിരാമന് സ്മാരക ട്രസ്റ്റ് മയ്യില്, ശ്രീരാഗം കലാക്ഷേത്രം എന്നിവയുടെ ആഭിമുഖ്യത്തിലാണ് പുരസ്കാര സമര്പ്പണവും അനുസ്മരണ സമ്മേളനവും നടന്നത്.
