തിരുവനന്തപുരം : പാതയോരങ്ങളില് പൊതു യോഗം നടത്തുന്നത് നിരോധിച്ചു കൊണ്ടുള്ള കേരള ഹൈക്കോടതിയുടെ വിധി സുപ്രീം കോടതി ശരി വെച്ചു. ആലുവയിലെ ബസ് സ്റ്റാന്ഡ് പരിസരത്ത് പൊതു യോഗം നിരോധിക്കണമെന്ന് ആവശ്യപ്പെട്ടു നല്കിയ ഒരു സ്വകാര്യ ഹര്ജിയെ തുടര്ന്ന് 2010 ജൂണിലാണ് ഹൈക്കോടതി വിധിയുണ്ടായത്. വിധിയില് സംസ്ഥാനത്ത് ഒട്ടാകെ പാതയോരങ്ങളില് പൊതു യോഗം നിരോധിക്കണമെന്ന് ഉണ്ടായിരുന്നു. ഇതിനെ ചോദ്യം ചെയ്ത് കേരള സര്ക്കാര് സുപ്രീം കോടതിയെ സമീപിക്കുകയായിരുന്നു. സുപ്രീം കോടതില് ജസ്റ്റിസ് എച്ച്. എല്. ദത്ത്, ഡി. കെ. ജയിന് എന്നിവര് അടങ്ങിയ ബഞ്ചാണ് ഹര്ജി പരിഗണിച്ചത്. പാതയോരങ്ങളില് യോഗങ്ങള് നടത്തുന്നതു മൂലം പൊതു ജനങ്ങള് വല്ലാതെ ബുദ്ധിമുട്ട അനുഭവിക്കുന്നുണ്ടെന്നും, വിശാലമായ പൊതു താല്പര്യം കണക്കിലെടുത്താണ് ഹൈക്കോടതി വിധി ശരി വെയ്ക്കുന്നത് എന്നും ഹര്ജി പരിഗണിക്കവെ ഡിവിഷന് ബെഞ്ച് വ്യക്തമാക്കി.
വിധിയെ അനുകൂലിച്ചും പ്രതികൂലിച്ചും അഭിപ്രായങ്ങള് വന്നു തുടങ്ങിയിട്ടുണ്ട്. പൊതുവില് രാഷ്ട്രീയ പാര്ട്ടികള് വിധിയോട് വിയോജിപ്പ് രേഖപ്പെടുത്തി. പൊതു യോഗം നിരോധിക്കുന്നത് ജനാധിപത്യ രാജ്യത്ത് പൌരന്റെ സ്വതന്ത്രമായ ആശയ വിനിമയത്തിനുള്ള അവസരം നഷ്ടപ്പെടുത്തുമെന്ന് ഒരു വിഭഗം പറയുമ്പോള് പല പൊതു യോഗങ്ങളും തങ്ങള്ക്ക് സഞ്ചാര സ്വാതന്ത്ര്യം നിഷേധിക്കു ന്നതായിട്ടാണ് കോടതി വിധിയെ അനുകൂലിക്കുന്നവരുടെ വാദം.
കൊല്ലം : തീവണ്ടി വരുന്ന സമയം അറിയാന് പറവൂര് റെയില്വേ സ്റ്റേഷനില് രാത്രി കാലങ്ങളില് വിളിച്ചിട്ട് കാര്യമില്ല എന്ന് കൊല്ലത്തുകാര്ക്ക് നന്നായിട്ടറിയാം. കാരണം വിളിച്ചിട്ട് ഫലമില്ലാതായി നേരിട്ട് സ്റ്റേഷനില് ചെന്ന പലരും കണ്ടത് പുതച്ചു മൂടി ഉറങ്ങുന്ന “അന്വേഷണ” ഉദ്യോഗസ്ഥനെയാണ്. പണ്ടൊന്നും ഇങ്ങനെ ആയിരുന്നില്ല എന്നും ഇവര് പറയുന്നുണ്ട്. അടുത്ത കാലത്താണ് ഈ പരിപാടി തുടങ്ങിയതത്രെ. സ്റ്റേഷനിലേക്ക് വിളിച്ചാല് ഈയിടെയായി രാത്രി ഫോണ് എടുക്കാറേയില്ല. രാത്രി വണ്ടികളില് യാത്ര ചെയ്യുന്നവര്ക്ക് ഏറെ ബുദ്ധിമുട്ട് ഇത് മൂലം ഉണ്ടാകുന്നു. തീവണ്ടി വൈകിയാണ് എത്തുന്നത് എന്ന് അറിഞ്ഞാല് അതിന് അനുസരിച്ച് മാത്രം വീട്ടില് നിന്നും ഇറങ്ങിയാല് മതിയല്ലോ എന്ന് കരുതി റേയില്വേ സ്റ്റേഷനിലേക്ക് വിളിക്കുന്നവര്ക്ക് ഇവിടെ നിന്നും മറുപടി ലഭിക്കാറേയില്ല. 
കണ്ണൂര് : കണ്ണൂരിലെ കണ്ടല് പാര്ക്ക് പൂട്ടണമെന്ന് കേന്ദ്ര വനം പരിസ്ഥിതി മന്ത്രാലയം ഉത്തരവിട്ടു. തീരദേശ പരിപാലന നിയമം ലംഘിച്ചു കൊണ്ടാണ് നിര്മ്മാണ പ്രവര്ത്തനങ്ങള് നടത്തിയിരിക്കുന്നതെന്നും അവ പൊളിച്ചു നീക്കണമെന്നും ആവശ്യപ്പെട്ടിട്ടുണ്ട്. പാപ്പിനിശ്ശേരിയിലെ ഇക്കോ ടൂറിസം സൊസൈറ്റിയ്ക്കാണ് ഇതു സംബന്ധിച്ച് നിര്ദ്ദേശം നല്കിയിരിക്കുന്നത്.
