ക്വാലാലമ്പൂര്‍ : വിദേശ കറന്‍സികള്‍ വില്‍പ്പന നടത്തി ലാഭം ഉണ്ടാക്കുന്നത്‌ ഇസ്ലാമിക ശരിയത്ത്‌ നിയമങ്ങള്‍ക്ക് വിരുദ്ധമാണ് എന്നും അതിനാല്‍ ഈ വ്യാപാരത്തില്‍ ഏര്‍പ്പെടുന്നത് മുസ്ലിംകള്‍ക്ക് ഹറാം ആണെന്നും മലേഷ്യയിലെ ദേശീയ ഫത്വ സമിതി അറിയിച്ചു.
ഇത്തരം വ്യാപാരം കറന്‍സിയുടെ വിലയുടെ ഊഹക്കച്ചവടം ആണെന്ന് തങ്ങള്‍ നടത്തിയ പഠനത്തില്‍ കണ്ടെത്തിയതായി സമിതി പറഞ്ഞു. ഇത് ഇസ്ലാമിന് എതിരാണ്. എന്നാല്‍ കറന്‍സി സ്വാഭാവികമായി വിനിമയം ചെയ്യുന്നതോ സാമ്പത്തിക സ്ഥാപനങ്ങള്‍ വഴി കൈമാറുന്നതോ തെറ്റല്ല എന്നും സമിതി വ്യക്തമാക്കി. കാരണം ഇത്തരം ഇടപാടുകളില്‍ ഊഹക്കച്ചവടമോ കച്ചവട ലാഭത്തിന്റെ കാര്യത്തില്‍ അനിശ്ചിതത്വമോ നിലനില്‍ക്കുന്നില്ല എന്ന് സമിതി ചൂണ്ടിക്കാട്ടി.
സോഫിയ: തെക്കന്‍ ബള്‍ഗേറിയന്‍ ജില്ലയായ ഹോസകോവില്‍ ബൈസര്‍ എന്ന ഗ്രാമത്തില്‍ അണക്കെട്ട് തകര്‍ന്ന് 8 പേര്‍ മരിച്ചു. നിരവധി പേരെ കാണാതായിട്ടുണ്ട്. കനത്ത മഴയെ തുടര്‍ന്നുണ്ടായ പ്രളയത്തിലാണ് ഇവാനൊവൊ എന്ന അണക്കെട്ട് തകര്‍ന്നത്. അണക്കെട്ട് തകര്‍ന്ന് നിമിഷങ്ങള്‍ക്കുള്ളില്‍ സമീപത്തെ ഗ്രാമത്തില്‍ രണ്ടര മീറ്റര്‍ ഉയരത്തില്‍ വെള്ളം പൊങ്ങുകയും ഗ്രാമത്തിലെ 90% വീടുകളും വെള്ളത്തിനടിയിലാവുകയും ചെയ്തു. മേഖലയില്‍ അടിയന്തരാവസ്ഥ പ്രഖ്യാപിച്ചിരിക്കുകയാണ്. ഡാം നിര്‍മ്മിച്ചതിലുള്ള അപാകതയാണോ അപകടമുണ്ടാക്കിയത് എന്നറിയില്ലെന്നും അതിനെ പറ്റി അന്വേഷണം നടത്തുമെന്നും രാജ്യത്തെ എല്ലാ അണക്കെട്ടുകളും ഉടന്‍ തന്നെ എ. ഐ. എസ്. സിയുടെ നിയന്ത്രണത്തില്‍ കൊണ്ടുവരുമെന്നും (authority of Irrigation Systems Company) ബള്‍ഗേറിയന്‍ പ്രധാനമന്ത്രി ബോയികോ ബോറിസോവ് പറഞ്ഞു.
