എറണാകുളം : പ്രശസ്ത നടി ജ്യോതിര്‍മയി വിവാഹ മോചനത്തിനു ഒരുങ്ങുന്നു. ഭര്‍ത്താവ് നിഷാന്തുമായുള്ള വിവാഹ ബന്ധം വേര്‍പ്പെടുത്തുവാനായി ഇരുവരും സംയുക്തമായി എറണാകുളം കുടുംബ കോടതിയില്‍ ഹര്‍ജി നല്‍കി. അഭിപ്രായ ഭിന്നതകളെ തുടര്‍ന്ന് കുറച്ചു കാലമായി ഇരുവരും പിരിഞ്ഞു താമസിക്കുകയായിരുന്നു. പത്തു വര്‍ഷത്തെ പ്രണയ ത്തിനൊടുവില്‍ 2004-ല്‍ ആയിരുന്നു ജ്യോതിര്‍മയി യുടേയും നിഷാന്തിന്റേയും വിവാഹം. സോഫ്റ്റ്‌വെയര്‍ എഞ്ചിനീയറായ നിഷാന്ത് അമ്പലപ്പുഴ ശങ്കര നാരായണ പണിക്കരുടെ മകനാണ്. പരേതനായ ജനാര്‍ദ്ദന ഉണ്ണിയുടേയും സരസ്വതി ഉണ്ണിയുടേയും മകളാണ് ജ്യോതിര്‍മയി. വിവാഹ ശേഷവും സിനിമയില്‍ സജീവമായിരുന്നു ജ്യോതിര്‍മയി.
ഒരേ സമയം ഗ്ലാമര്‍ വേഷങ്ങളിലും അഭിനയ സാധ്യതയുള്ള വേഷങ്ങളിലും തിളങ്ങിയ ജ്യോതിര്‍മയി ലാല്‍ജോസ് സംവിധാനം ചെയ്ത മീശ മാധവന്‍ എന്ന ചിത്രത്തിലൂടെയാണ് ശ്രദ്ധിക്കപ്പെടുന്നത്. ഈ ചിത്രത്തില്‍ ജ്യോതിര്‍മയി ചെയ്ത “ചിങ്ങമാസം വന്നു ചേര്‍ന്നാല്‍” എന്ന ഐറ്റം ഡാന്‍സ് ഹിറ്റായിരുന്നു. തുടര്‍ന്ന് തമിഴ് സിനിമയിലും ജ്യോതിര്‍മയി ഏറെ ശ്രദ്ധിക്കപ്പെട്ടു. അന്യര്‍, ശേഷം, എന്റെ വീട് അപ്പൂന്റേം, കല്യാണ രാമന്‍ തുടങ്ങിയ ചിത്രങ്ങളില്‍ ശ്രദ്ധേയമായ വേഷം കൈകാര്യം ചെയ്ത ജ്യോതിര്‍മയി സാഗര്‍ ഏലിയാസ് ജാക്കി, നാന്‍ അവന്‍ അല്ലൈ തുടങ്ങിയ ചിത്രങ്ങളില്‍ നിര്‍ലോഭം ഗ്ലാമര്‍ പ്രദര്‍ശനവും നടത്തി.
മീശ മാധവനിലെ നായികയായിരുന്ന കാവ്യാ മാധവനും കഴിഞ്ഞ വര്‍ഷം വിവാഹ മോചനത്തിനായി കോടതിയെ സമീപിച്ചിരുന്നു.
