താന്‍ റാണി മുഖര്‍ജിയുടെ കടുത്ത ആരാധകനാണെന്ന് നടന്‍ പൃഥ്‌വി രാജ്. ഇരുവരും അഭിനയിച്ച അയ്യ എന്ന ഹിന്ദി ചിത്രത്തിന്റെ ഓഡിയോ റിലീസ് പരിപാടികള്‍ ക്കിടയിലാണ് പൃഥ്‌വി ഇക്കാര്യം വ്യക്തമാക്കിയത്. റാണിയുടെ എല്ലാ ചിത്രങ്ങളും താന്‍ കണ്ടിട്ടുണ്ടെന്നും അവര്‍ക്കൊപ്പം അഭിനയിക്കുവാന്‍ സാധിച്ചത് വലിയ ഭാഗ്യമായി കരുതുന്നു എന്നും മലയാളത്തിന്റെ യങ്ങ് സൂപ്പര്‍ സ്റ്റാര്‍ വ്യക്തമാക്കി. 

ഡ്രീമും വേക്കപ്പും എന്ന് ആരംഭിക്കുന്ന ഗാന രംഗത്തില്‍ വളരെ സെക്സിയായാണ് റാണി മുഖര്‍ജി പൃഥ്‌വിക്കൊപ്പം  ചുവടു വെയ്ക്കുന്നത്. ഹിന്ദിയിലെ മറ്റു പല നായകന്മാരെയും പോലെ സിക്സ് പാക്ക് ബോഡിയുമായാണ് പൃഥ്‌വിയും എത്തുന്നത്. ചിത്രത്തില്‍ തമിഴ് നാട്ടില്‍ നിന്നും ഉള്ള ഒരു ചിത്രകാരന്റെ വേഷമാണ് പൃഥ്‌വിക്ക്. പൃഥ്‌വിയുടെ ആദ്യ ഹിന്ദി ചിത്രമാണ് അയ്യ. അനുരാഗ് കശ്യപ് നിര്‍മ്മിച്ച് സച്ചിന്‍ കുണ്ടല്‍ക്കറാണ് ചിത്രം സംവിധാനം ചെയ്തിരിക്കുന്നത്.

ചിത്രത്തിന്റെ റിലീസിനു മുമ്പു തന്നെ പൃഥ്‌വി ഹിന്ദിയില്‍ നിന്നും മൂന്നാമത്തെ ചിത്രത്തിന്റെ കരാര്‍ ഒപ്പിട്ടു കഴിഞ്ഞു. ചിത്രത്തിന്റെ ഗാന രംഗങ്ങള്‍  യൂറ്റൂബ് ഉള്‍പ്പെടെ ഉള്ള സോഷ്യല്‍ നെറ്റ്‌വര്‍ക്കുകളിലൂടെ പുറത്തു വന്നതോടെ അതിനെ അനുകൂലിച്ചും പ്രതികൂലിച്ചും വലിയ തോതില്‍ ചര്‍ച്ചകള്‍ ആരംഭിച്ചു കഴിഞ്ഞു.