ഒരു ചെറിയ ഇടവേളക്ക് ശേഷം അര്‍ച്ചന കവി മലയാള സിനിമയില്‍ തിരിച്ചെത്തുന്നു. നേമം പുഷ്പരാജ് സംവിധാനം ചെയ്യുന്ന കുക്കിലിയാര് എന്ന ചിത്രത്തിലൂടെ ആണ് അര്‍ച്ചനയുടെ തിരിച്ചു വരവ്‍. മനോജ് കെ.ജയന്റെ മകളായിട്ടാണ് ഈ ചിത്രത്തില്‍ അര്‍ച്ചന കവി അഭിനയിക്കുന്നത്.
നീലത്താമരയുടെ റീമേക്കിലൂടെ മലയാള സിനിമയില്‍ എത്തിയ നടിയാണ് അര്‍ച്ചനാ കവി. എം.ടി. വാസുദേവന്‍ നായര്‍ തിരക്കഥ രചിച്ച് വര്‍ഷങ്ങള്‍ക്ക് മുമ്പ് യൂസഫലി കേച്ചേരി സംവിധാനം ചെയ്ത ചിത്രം വര്‍ഷങ്ങള്‍ക്കിപ്പുറം ലാല്‍ ജോസ് ആണ് സംവിധാനം ചെയ്തത്. അര്‍ച്ചന കവി അവതരിപ്പിച്ച മാളു എന്ന നായിക കഥാപാത്രം ഏറേ ശ്രദ്ധിക്കപ്പെട്ടു എങ്കിലും പിന്നീട് അര്‍ച്ചന അഭിനയിച്ച പല ചിത്രങ്ങളും പരാജയപ്പെട്ടു. ഉര്‍വ്വശി കുഞ്ചാക്കോ ബോബന്‍ എന്നിവര്‍ക്കൊപ്പം അഭിനയിച്ച മമ്മി ആന്റ് മീ എന്ന ചിത്രമാണ് നീലത്താമരക്ക് ശേഷം നടിയെന്ന നിലയില്‍ അര്‍ച്ചനയ്ക്ക് അല്പമെങ്കിലും പ്രേക്ഷക ശ്രദ്ധ നേടുവാനായത്.
ബനാറസ് എന്ന ചിത്രത്തിനു ശേഷം നേമം പുഷ്പരാജ് ഒരുക്കുന്ന ചിത്രമാണ് കുക്കിലിയാര്. കാവ്യാമാധവനും വിനീതും നവ്യാനായരുമായിരുന്നു ബനാറസിലെ പ്രധാന അഭിനേതാക്കള്‍. ചിത്രം വിജയം ആയില്ലെങ്കിലും അതിലെ ഗാനങ്ങള്‍ ഏറെ ശ്രദ്ധിക്കപ്പെട്ടിരുന്നു.
