ബാംഗ്ലൂര് : തന്നെ ആരോ കൊല്ലാന് ശ്രമിക്കുന്നു എന്ന് ആര്ട്ട് ഓഫ് ലിവിംഗ് പ്രസ്ഥാനത്തിന്റെ അധിപനായ രവിശങ്കര് ആവര്ത്തിച്ചു പറയുന്നുണ്ടെങ്കിലും ഈ വാദം പോലീസ് അംഗീകരിക്കുന്നില്ല. പോലീസിനു പറയാനുള്ളത് മറ്റൊരു കഥയാണ്. രവിശങ്കറിന്റെ ആശ്രമത്തിനു സമീപം താമസിക്കുന്ന ഡോ. മഹാദേവ പ്രസാദ് എന്നയാള് ബാംഗ്ലൂര്ക്ക് പോകാനായി തന്റെ വീട്ടില് നിന്നും പുറത്തിറങ്ങിയപ്പോള് വഴി മുടക്കി മൂന്നു നാല് പട്ടികള് നില്ക്കുന്നതായി കണ്ടു. ഇവയെ വിരട്ടി ഓടിക്കാനായി ഇയാള് തന്റെ ലൈസന്സുള്ള .32 റിവോള്വര് പുറത്തെടുത്ത് പട്ടികള്ക്ക് നേരെ മൂന്നു തവണ വെടിയുതിര്ത്തു. ഇതില് ഒരു ബുള്ളറ്റാണ് ലക്ഷ്യം തെറ്റി 2500 അടി അകലെയുള്ള ആര്ട്ട് ഓഫ് ലിവിംഗ് ആശ്രമത്തില് എത്തിയത്. .32 റിവോള്വറിലെ ബുള്ളറ്റിന് 4000 അടി വരെ ദൂരം സഞ്ചരിക്കാനാവും എന്ന് പോലീസ് അറിയിച്ചു.
ഡോ. മഹാദേവ പ്രസാദിനെ പോലീസ് പിടി കൂടി കസ്റ്റഡിയില് വെച്ചു ചോദ്യം ചെയ്തെങ്കിലും ഇയാള്ക്ക് ഇങ്ങനെയൊരു സംഭവം നടന്നതായി പോലും അറിയുമായിരുന്നില്ല എന്ന് പോലീസ് പറഞ്ഞു. സംഭവത്തില് ആരുടെയും പേരില് കുറ്റം ചാര്ത്തിയിട്ടില്ലെന്നും ആരെയും അറസ്റ്റ് ചെയ്തിട്ടില്ലെന്നും പോലീസ് വ്യക്തമാക്കി. എന്നാല് പോലീസ് ഇത്രയൊക്കെ സമാശ്വസിപ്പിച്ചിട്ടും തന്റെ ജീവന് ഭീഷണിയുണ്ടെന്നും തന്നെ ആരോ കൊല്ലാന് ശ്രമിക്കുന്നു എന്നൊക്കെയാണ് രവിശങ്കര് ഇപ്പോഴും പറയുന്നത്.
ന്യൂഡല്ഹി : രാജ്യത്ത് 1500 ലേറെ പേര് മരിക്കാന് ഇടയാക്കിയ പന്നിപ്പനിയെ നേരിടാന് ഇന്ത്യ സ്വന്തമായി വാക്സിന് വികസിപ്പിച്ചു. കഴിഞ്ഞ വര്ഷമാണ് ലോക വ്യാപകമായി പന്നിപ്പനി പടര്ന്നു പിടിയ്ക്കാന് തുടങ്ങിയത്. പന്നിപ്പനിയെ നേരിടാനുള്ള മരുന്നുകള്ക്ക് സ്വന്തമായി പേറ്റന്റുള്ള വിദേശ കമ്പനികള് കോടിക്കണക്കിനു ഡോളറിന്റെ അമിത ലാഭമാണ് ഈ പകര്ച്ചവ്യാധി പകര്ന്നു തുടങ്ങിയതിനു ശേഷം ഉണ്ടാക്കിയത്. ലോക രാഷ്ട്രങ്ങള് ഈ കമ്പനികള്ക്ക് ഓര്ഡര് നല്കി മാസങ്ങളോളം കാത്തിരുന്നതിന് ശേഷമാണ് മരുന്നുകള് ലഭിച്ചത്. ഇത് ആരോഗ്യ രംഗത്ത് വന് ആശങ്കയ്ക്ക് വഴി വെയ്ക്കുകയും ചെയ്തിരുന്നു.
ചണ്ഡിഗര് : പതിനാലു വയസ്സുകാരിയായ രുചികയെ മാനഭംഗപ്പെടുത്തിയ മുന് ഹരിയാനാ ഡി. ജി. പി. എസ്. പി. എസ്. റാത്തോഡിനു കോടതി ഒന്നര വര്ഷം തടവ് ശിക്ഷ നല്കിയെങ്കിലും റാത്തോഡിന്റെ കരങ്ങള് ജെയിലിനു പുറത്തേയ്ക്കും നീളുന്നതായി സൂചന. കേസ് പിന്വലിപ്പിക്കാനായി രുചികയുടെ അച്ഛനും 18-കാരനായ സഹോദര നുമെതിരെ റാത്തോഡ് 11 ക്രിമിനല് കേസുകളായിരുന്നു കെട്ടിച്ചമച്ചത്. ഇപ്പോള് ഇതാ പുതിയൊരു വഞ്ചനാ കേസുമായി പോലീസ് രുചികയുടെ അഭിഭാഷകനെയും വേട്ടയാടുന്നു.
